ބްލޮގަރ ޔާމިން ރަޝީދުގެ މަރުގެ މައްސަލައާއ އަދި ނޫސްވެރިޔާ ރިޟްވާން ގެއްލުވާލި މައްސަލާގައި ތިން މީހެއްގެ މައްޗަށް ދައުވާ ކުރުމަށް ޕީޖީން މިއަދު ކުރިމިނަލް ކޯޓަށް ފޮނުވައިފިއެވެ.
ދައުވާ ކުރަން ފޮނުވާފައިވާ ތިން މީހުންގެ މައްޗަށްވެސް ދައުވާކުރުމަށް ފޮނުވާފައިވަނީ މަރު ކޮމިޝަނުން ކޮށްފައިވާ ތަހުގީގުތަކުގެ މައްޗަށެވެ. މި ދެމައްސަލާގައި ދައުވާ ކުރުމަށް ފޮނުވާފައިވަނީ އިސްމާއީލް އަބްދުލްރަހީމް އާދަމް (އިސޫ)، އަހްމަދު އިސްމާއިލް 39، އާއި ދަފްތަރު، އަހްމަދު މުއާޒް، 40 ގެ މައްޗަށެވެ.
މީގެ ތެރޭގައި އިސޫގެ މައްޗަށް އުފުލާފައިވާ ދައުވާއަކީ ޓެރަރިޒަމްގެ އަމަލެއް ހިންގުމަށް އެހީތެރިވެދިނުމުގެ ދެ ދައުވާއެވެ. ޕީޖީއިން ބުނެފައިވަނީ އޭނާ 2014 ވަނަ އަހަރު ރިޟުވާނަށް ފާރަލުމުގެ ރިޟުވާން ރަހީނުކޮށް އަދި މަރާލުމުގައި އެހީތެރިވެދީފައި ވާތީ އުފުލާފައިވާ ދައުވާތަކެއް ކަމުގައެވެ. އަދި އޭގެ އިތުރުން ޔާމިން ރަޝީދު ސޯޝަލް މީޑިއާގައި އިސްލާމް ދީނާއި ޚިލާފް ވާހަކަތައް ލިޔެ ޝާއިއު ކުރަމުންދާތީ އޭނާ މަރާލުމަށްޓަކާ 2017ވަނަ އަހަރު އޭނާއަށް ފާރަލާ އޭނާ މަރާލުމުގައިވެސް އެހީތެރި ވެދީފައިވާތީ މިމައްސަލާގައިވެސް އޭނގެ މައްޗަށް ވަނީ ދައުވާ އުފުލާފައެވެ.
އޭނާގެ މައްޗަށް މިދައުވާތައް އުފުލާފައިވަނީ ގާނޫނުލް އުގޫބާތުގެ 6 ވަނަ މާއްދާގެ (ހ) އަދި (ނ)ގެ ދަށުން، ޓެރަރިޒަމްގެ އަމަލެއް ކުރުމަށް އެހީތެރިވެދީފައިވާތީ އެވެ.
މީގެ އުތުރުން އަހުމަދު އިސްލާއިލްގެ މައްޗަށްވެސް ދެ ދައުވާއެއް އުފުލާފައިވެއެވެ. މިގޮތުން އޭނާގެ މައްޗަށް އުފުލާފައިވާ ދެ ދައުވާއަކީ ޓެރަރިޒަމްގެ އަމަލެއް ކުރުމަށް ރޭވުމުގެ ދައުވާއާއި ޓެރަރިޒަމްގެ އަމަލެއް ހިންގުމަށް އެހީތެރިވެދިނުމުގެ ދައުވާއެވެ. އޭނާގެ މައްޗަށް ތުހުމަތު ކޮށްފައިވަނީ 2014ވަނަ އަހަރު ރިޟުވާން މަރާލުމަށް ރާވާ، އިންތިޒާމް ކޮށްފައި ވާތީއާއި، އޭގެ އިތުރުން އޭނާގެ އެހެން މީހުންނާއި އެއްބައިވެ، އެހެން ބަޔަކު މެދުވެރިކޮށްގެން ރިޟުވާން ރަހީންކޮށް މަރާލުމުގެ ތުހުމަތުގެ އިތުރުން ޔާމިން ރަޝީދު މަރާލުމަށް އެހީތެރިވެދީ އަދި ރިޟުވާންއަށް ފާރަލުމަށްވެސް އެހީތެރިވެދީފައި ވާކަމުގެ ތުހުމަތު ތަކެވެ.
މިމައްސާލާގައި ދައުވާ ކޮށްފައިވާ އަހުމަތު މުޢާޒްގެ މައްޗަށް ކުރާ ތުހުމަތު ތަކަކީ ޓެރަރިޒަމްގެ އަމަލެއް ކުރުމަށް ރޭވުމުގެ ދައުވާއެވެ. ޕީޖީން ބުނެފައިވާ ގޮތުގައި އޭނާގެ މައްޗަށް ދައުވާކޮށް ޝަރީއަތަށް ފޮނުވާފައިވަނީ 2014 ވަނަ އަަހަރު ރިޟުވާން މަރާލުމުގައި ބައިވެރިވެ، ބަޔަކު މީހުން މެދުވެރިކޮށް އޭނާ މަރާލާފައިވާކަމުގެ ދައުވާއެވެ.
