ސައުތުގެ އެންމެ މަގުބޫލު އެކްޓަރު ޕްރަބާސް ކަކުލުގެ ސާޖަރީއެއް ހެދުމަށް ފަހު އަނެއްކާ ވެސް ކަކުލުގައި ރިއްސާތީ ފިލްމީ މަސައްކަތުން ބްރޭކެއް ނަގައިފިއެވެ.
މީގެ ތިން މަސް ކުރިން ޕްރަބާސް ވަނީ ކަކުލުގެ ސާޖަރީއެއް ހަދައިފައެވެ. އެއަށް ފަހު އޭނާ މިހާރު މަސައްކަތް ކުރަމުން އަންނަ ފިލްމް "ޕްރޮޖެކްޓް ކޭ"ގެ ޝޫޓިންގައި އުޅެނިކޮށް އަނެއްކާ ކަކުލުގައި ރިއްސާތީ އޭނާ ވަނީ އިމްޖެންސީ ބްރޭކެއް ނަގައިފައެވެ.
ޕްރަބާސްގެ ކަކުލުގައި މައްސަލަ ޖެހުނީ އޭނާގެ އެންމެ ކާމިޔާބު އެއް ފިލްމު ކަމުގައިވާ "ބާހޫބަލީ"ގެ ޝޫޓިންގެ ތެރެއިންނެވެ. ނަމަވެސް އޭނާ ސާޖަރީ ހެދުން ފަސް ކޮށްލީ ނުނިމި ހުރި މަސައްކަތްތައް ކުރުމަށެވެ. ކޯވިޑްގެ ބަލިމަޑުކަމާއެކު ފިލްމު ތަކުގެ މަސައްކަތް ލަސްވުމުން އޭނާގެ ކަކޫ އޮޕަރޭޝަން ކުރުން އިތުރަށް ލަސްވީއެވެ.
އެތައް ދުވަހަކު މަޑުކުރުމަށް ފަހު ޕްރަބާސް ކަކުލުގެ އޮޕަރޭޝަން ކުރީ އޭނާގެ އެންމެ ފަހުގެ ފިލްމް "ރާދޭ ޝިޔަމް" ރިލީޒް ކުރިފަހުންނެވެ.
ނަމަވެސް އަނެއްކާ މާބޮޑަށް ކަކުލުގައި ރިއްސާތީ އޭނާގެ ފިލްމީ މަސައްކަތުން ބްރޭކް ނެގުމުން އޭނާގެ ފިލްމުތައް އަނެއްކާ ވެސް ލަސްވާނެއެވެ.
ޕްރަބާސް މިހާރު ކުރަމުން އަންނަ މަސައްކަތަކީ "ޕްރޮޖެކްޓް ކޭ" އާއި "ސަލާރު"ގެ މަސައްކަތެވެ.
