ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ދަނީ ތަފާތުކުރުމެއް، އަނިޔާވެރިވުމެއްނެތި ޤާނޫނީ ވެރިކަން ނަގަހައްޓަމުން ކަމުގައި ރައީސުލްޖުމްހޫރިއްޔާގެ އޮފީހުގެ މިނިސްޓަރ އަހުމަދު ސަމީރު ވިދާޅުވެއްޖެއެވެ.

ސަމީރު މިހެން ވިދާޅުވީ ރައީސް އިބްރާހީމް މުހައްމަދު ސޯލިހް ބަދު އަހުލާގީ އަމަލު ހިންގާ މަންޒަރު ހުންނަ ފޮޓޯތަކެއް އުޅޭ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ތުހުމަތު ކުރައްވާ ދެއްކެވި ވާހަތަކާއި ގުޅިގެން ގިނަ ބަޔަކު މިކަމަށް އަމާޒުކޮށް ރައްދު ދެއްވަމުންދާ ދަނޑިވަޅެއްގައެވެ.

ސަމީރު ވިދާޅުވީ ރާއްޖޭގެ ވެރިކަމުގެ ތާރީހުގައިވެސް އެއްވެސް މީހަކަށް އަނިޔާވެރިނުވެ، އަދުލުވެރިކަމާއިއެކު ވެރިކަން ކުރައްވާ ރައީސަކީ ރައީސް ޞާލިހު ކަމަށެވެ. އަމާން ކަމާއި އޮމާންކަމާއިއެކު ރައީސް ޞާލިހު ވެރިކަން ކުރައްވާތަން ބެލުމަކީ ބައެއް ބޭފުޅުންނަށް އެހާ ފަސޭހަވާނެ ކަމެއްނޫންކަމަށް ސަމީރު ވިދާޅުވިއެވެ.

ރާއްޖޭގެ ވެރިކަމުގެ ތާރީޚުގައި ވެސް އެއްވެސް ކަމެއްގައި ތަފާތު ކުރުމެއް ނެތި އަނިޔާވެރި ނުވެ، މިހާ އަމާން އޮމާން އޯގާތެރި ވެރިކަމެއް ރައީސް ޞާލިޙު ކުރައްވާތަން ދުށުމަކީ ބައެއް ބޭފުޅުންގެ ހިތަށް ކުޅަދާނަ ކަމަކަށް ނުވާނެ. ޤާނޫނު ނަގަހައްޓާ ތަންފީޒުކުރުމަށް ފަސްނުޖެހޭނެ.

– ސަމީރު ވިދާޅުވިއެވެ.

އެމްޑީޕީގެ ގައުމީ މަޖިލީހުގެ ވަޓްސް އެޕް ގްރޫޕްއަށް ނަޝީދު ފޮނުއްވި މެސެޖެއްގައި ވިދާޅުވީ އެމަނިކުފާނުގެ އާއިލީ އަންހެން ކުއްޖަކާއެކު ރައީސް ސޯލިހް ބަދު އަހުލާގީ އަމަލު ހިންގަވާ މަންޒަރު ހިމެނޭ ހަތަރު ފޮޓޯއެއް ނަޝީދަށް ލިބިވަޑައިގެންފައިވާ ކަމަށެވެ. މިކަމާ ގުޅޭ ގޮތުން ރައީސްގެ ތަރުޖަމާނު މަބްރޫކް އަޒީޒް ވިދާޅުވީ އެފަދަ އެއްވެސް ކަމެއް ރައީސް ނުކުރައްވާ ކަމުގެ ޔަގީންކަން ދިވެހި ރައްޔިތުންނަށް ދެއްވަވާ ކަމަށެވެ.

ނަޝީދު މިފަދަ މެސެޖްތަަކެއް އެމްޑީޕީގެ ގައުމީ މަޖިލީހުގެ ވަޓްސް އެޕް ގްރޫޕަށް މި ފޮނުއްވާފައި މި ވަނީ، އެމަނިކުފާނުގެ ކޮއްކޯފުޅު އަދި ނާޒިމް އަބްދުލް ސައްތާރު އެއް ޖިންސުން ގުޅުން ހިންގި ކަމުގެ ތުހުމަތުގައި ހައްޔަރުކޮށްފައިވަނިކޮށެވެ.

އއ. އަތޮޅުގެ ރިސޯޓެއްގައި ހުންނަވަނިކޮށް ނާޒިމް ހައްޔަރު ކުރުމާއެކު، ނަޝީދު ޓްވީޓެއް ވެސް ކުރެއްވިއެވެ. އަދި ނާޒިމް ހައްޔަރުކުރީ ސިޔާސީ މަގުސަދެއްގައި ސަރުކާރު ކޯލިޝަންގައި ތިބި ހަރުކަށި ފިކުރުގެ ބަޔަކު ރުއްސަން ކަމަށް ވެސް ނަޝީދު އެ ޓްވީޓްގައި ލިޔުއްވާފައިވެއެވެ. ނާޒިމް ސައްތާރު މިއަދު ވަނީ އއ. ރަސްދޫ މެޖިސްޓްރޭޓް ކޯޓަށް ވެސް ހާޒިރުކޮށްފައެވެ. އަދި އެ ކޯޓުން ވަނީ ނާޒިމްގެ ބަންދަށް ހަތް ދުވަހުގެ މުއްދަތެއް ޖަހައިފައެވެ.