ކާމިޔާބު ޑްރާމާ ސިލްސިލާ "ޖައްސީ ޖޭސީ ކޮއި ނެހީ" އިން މަޝްހޫރު ކަން ހޯދި ބަތަލާ މޯނާ ސިން 6 އަހަރު ފަހުން ޑްރާމާ ސީރީޒް އަކުން އެނބުރި ޓީވީ ސްކްރީނަށް އައުމަށް ތައްޔާރު ވެއްޖެއެވެ.
ޓީވީ ޑްރާމާގެ އިތުރުން މޯނާ ވަނީ "3 އިޑިއަޓް" ފަދަ ބައެއް ކާމިޔާބު ފިލްމު ތަކުން ވެސް ފެނިގެން ގޮސްފައެވެ. ފިލްމު ތަކުން އޭނާ ފެނިގެން ގޮސްފައިވަނި ސަޕޯޓިން ރޯލު ތަކުންނެވެ.
6 އަހަރުގެ މެދުކެނޑުމަކަށް ފަހު ޓީވީ ސްކްރީނަށް މޯނާ އަންނަ "ޕުޝްޕާ އިމްޕޮސިބަލް" ޑްރާމާގެ ޝޫޓިން މިހާރު ވަނީ ފަށާފައެވެ. ނަމަވެސް ޑްރާމާ ދައްކަން ފަށާނެ އިރެއް އަދި ހާމަ ކޮށްފައިއެއް ނުވެއެވެ.
މި ޑްރާމާގައި މޯނާ ފެނިގެން ދާނީ ގާނޫނީ ވަކީލެއްގެ ރޯލުންނެވެ. އަދި އޭނާއަށް މިހާރު ވަގުތު ދެވެން ހުރިގޮތުން އޭނާ ފެނިގެންދާނީ ކެމިއޯ ރޯލަކުން ކަމަށް ވެސް ޚަބަރުތައް ބުނެއެވެ.
އެކްޓު ކުރުމުގެ އިތުރުން މޯނާ އަކީ ސްޓޭންޑަޕް ކޮމޭޑިއަނެއް އަދި ތަފާތު އެކި ޝޯތައް ވެސް ހޮސްޓު ކޮށްްދޭ ތަރިއެކެވެ.
