ބޮލީވުޑްއަށް އެތަށް ކާމިޔާބު ފިލްމް ތަކެއް ދޫކޮށްފައިވާ އަޖޭ ދޭވްގަންއަށް 3 ވަނަ ފަހަރަށް ނޭޝަނަލް އެވޯޑް ލިބިއްޖެއެވެ.
"ތާނާޖީ: ދި އަންސަންގް ވޮރިއާ" އިން އެންމެ މޮޅު އެކްޓަރުގެ އެވޯޑް އަޖޭ ހާސިލް ކުރި އިރު، އަޖޭ އަށް ކުރިން ނޭޝަނަލް އެވޯޑް ލިބުނީ 1998 ގެ "ޒަހަމް" އާއި 2002 ގެ "ދަ ލެޖެންޑް އޮފް ބަގަތު ސިންގް" އިންނެވެ.
53 އަހަރުގެ އަޖޭއަށް ނޭޝެނަލް އެވޯޑް ލިބުނު އިރު އިތުރު ތަރިންތަކެއް ވެސް ވަނީ އެ އެވޯޑް ހޯދާފައެވެ. އޭގެތެރޭގައި އަޖޭއަށް ލިބުނު އެންމެ މޮޅު އެކްޓަރގެ އެވޯޑް ސައުތު އިންޑިއަން ތަރިި ސޫރިޔާ ވެސް ވަނީ ހޯދާފައެވެ. އެއީ އޭނާގެ ތަމަޅަ ފިލްމު "ސޫރަރާއި ޕޮތުރޫ" އިންނެވެ.
އިންޑިއާ ސަރުކާރުންދޭ ނޭޝަނަލް އެވޯޑް ހުކުރު ދުވަހު ދީފައި ވާއިރު އެންމެ މޮޅު އަންހެން އެކްޓަރުގެ އެވޯޑް ހޯދީ "ސޫރަރާއި ޕޮތުރޫ"ގެ އަންހެން ތަރި އަޕަރްނާ ބާލަމުރާލީއެވެ.
68 ވަނަ ނޭޝަނަލް އެވޯޑްސްގައި އެންމެ މޮޅު ފީޗަރ ފިލްމަކަށްވެސް ހޮވުނީ 2020 ވަނަ އަހަރުގެ ތަމަޅަ ހިޓް "ސޫރަރާއި ޕޮތުރޫ" އެވެ.
