މިއަދު ބޭއްވުނު އައްޑޫ ހިތަދޫ ޑަބްލިއުޑީސީގެ އިންތިޚާބުގައި ވޯޓު ލާފައިވަނީ މިއިންތިޚާބުގައި ވޯޓު ލުމުގެ ހައްގު ލިބަފައިވާ މީހުންގެ އެންމެ %8.34 މީހުން ކަމަށް، އިލެކްޝަންސް ކޮމިޝަނުން އާންމު ކޮށްފައިވާ މިއިންތިޚާބުގެ ވަގުތީ ނަތީޖާއިން ދައްކައިފިއެވެ.
މިއަދު ބޭއްވިގެންދިޔަ މި އިންތިޚާބުގައި ވާދަ ކޮށްފައިވަނީ އެމްޑީޕިއާއި ޕީޕިއެމްއިން އެކަންޏެވެ. އަދި 141 ވޯޓުގެ ބޮޑު ތަފާތަކުން ވެރިކަންކުރާ އެމްޑީޕީގެ ފަރާތުން އިންތިޚާބުގައި ވާދަކުރި އާމިނަތު ޝާހިދާ ބަލިކޮށް ގޮނޑި ކާމިޔާބު ކޮށްފައިވަނީ އިދިކޮޅު ޕީޕީއެމްއިން އިންތިޚާބުގައި ވާދަކުރި ފާތިމަތު ނަޒީހާ އަހުމަދެވެ.
އިލެކްޝަންސް ކޮމިޝަނުން އާންމު ކޮށްފައިވާ ވަގުތީ ނަތީޖާ ދައްކާ ގޮތުން، ވޯޓު ދިނުމުގެ ހައްގު ލިބިފައިވާ 12،099 މީހުން މިދާއިރާގައި ތިބިއިރު މިއިންތިޚާބުގައި ވޯޓު ދީފައިވަނީ އެންމެ 1،009 މީހުންނެވެ.
އައްޑު ހިތަދޫގެ އިތުރުން، އިލެކްޝަންސް ކޮމިޝަނުން މިއަދުވަނީ ތ. ވަންދޫ ޑަބްލިއުޑީސީގެ އިންތިޚާބުވެސް ބާއްވާފައެވެ. މިއިންތިޚާބުންވެސް ވެރިކަންކުރާ އެމްޑީޕީގެ ކެނޑިޑޭޓް ބަލިވެފައިވާއިރު، މި އިންތިޚާބު ކާމިޔާބު ކޮށްފައިވަނީ އެމްއެންޕީގެ ފަރާތުން އިންތިޚާބުގައި ވާދަކުރި ޚަދީޖާ މުހައްމަދެވެ. އޭނާ އިންތިޚާބު ކާމިޔާބު ކޮށްފައިވަނީ 29 ވޯޓުގެ ތަފާތުންނެވެ.
އިލެކްޝަންސް ކޮމިޝަންގެ ވަގުތީ ނަތީޖާ ދައްކާގޮތުން މި އިންތިޚާބުގައި ވޯޓު ލިބުމުގެ ހައްގު ލިބިފައިވާ %68.12 މީހުން ވޯޓު ލާފައި ވެއެވެ.
