ބޮލީވުޑްގެ މަގުބޫލު ދެ ތަރިން ކަމުގައިވާ ރަންބީރު ކަޕުރާއި އާލިއާ ބަޓްގެ އަލަތު ފިލްމް "ބްރަމަސްތުރާ" ސެޕްޓެމްބަރު މަހުގެ 9 ވަނަ ދުވަހުގައި ރިލީޒް ކުރާނެއެވެ.
ނިންމުމަށް ފަސް އަހަރު ހޭދަވި މި ފިލްމް ގެ ޕްރޮމޯޝަން ތަކުގައި މިހާރު އާލިއާ އާއި ރަންބީރު އުޅެނީ ވަރަށް ބިޒީ ކޮންނެވެ.
އެގޮތުން ފިލްމްގައި ހިމެނޭ ލޯބީގެ ލަވައެއް ކަމުގައިވާ ކޭސަރިއާ ވަނީ އިއްޔެ ބެލުންތެރިންނަށް ދައްކައިލައިފައިއެވެ. މި ލޯބީގެ ލަވައިގައި ފެނިގެން ދަނީ އާލިއާ އާއި ރަންބީރުގެ ލޯބިއެވެ.
މި ލަވަ ޕްރޮމޯޓްކުރުމަށް ވާހަކަ ދައްކަމުން ރަންބީރު ބުނެފައިވަނީ 'ކޭސަރިއާ' އަކީ އެމީހުން ގެ ލަވަ ކަމަށެވެ. އެއީ އެމީހުންނަށް ހާއްސަ އެމީހުންގެ ލަވައެއް ކަމަށެވެ.
މި ރޮމޭންޓިކް ލަވަ ކިޔައިދީފައި ވަނީ އަރިޖީތް ސިންގް އެވެ. މި ލަވަ ޝޫޓް ކޮށްފައިވަނީ ވަރަނާސީ ގައިއެވެ.
ބޮޑު ކާސްޓެއް ހިމެނޭ މި ފިލްމްގައި އަމީތަބް ބަޗަން، ނާގަ އަރުޖުނާ އަކިނޭނީ، މޯނީ ރޯއީ ފަދަ ތަރިން ފެނިގެން ދާނެއެވެ.
މި ސުޕަ ހިރޯ ފިލްމް އަކީ އިންޑިއާގައި އުފައްދާ މީގެ ފުރަތަމަ ފިލްމްއެވެ. މި ފިލްމް އަކީ ރަންބީރު އަދި އާލިއާ އެކުގައިވެސް ފެނިެގންދާ ފުރަތަމަ ފިލްމްއެވެ.
އިންޑިއާގެ ފަސް ބަހަކުން ފިލްމް ނެރޭނެއެވެ. އެއީ ހިންދީ، ތަމިލް، މަލަޔާޅަމް، ތެލުގޫ، އަދި ކަންނާޑާއެވެ.
