މަޝްހޫރު ސައުތު އިންޑިއަން ތަރި ވިޖޭ ދެރަވަކޮންޑާ ބޮލީވުޑަށް ތަޢަރަފްވާ ފިލްމު، "ލައިގާ"ގެ ފުރަތަމަ ލަވައަށް ބެލުންތެރިންގެ ބޮޑު ތަރުހީބެއް ލިބިއްޖެއެވެ.
ފިލްމު "ކަބީރް ސިންގް"ގެ އޮރިޖިނަލް "އަރްޖުން ރެއްޑީ" އިން ބެލުންތެރިންގެ ލޯބި ހޯދި، ވިޖޭ ބޮލީވުޑަށް ނިކުންނާނީ ފިލްމު "ލައިގާ" އިން ޒުވާން ތަރި އަނައްނިޔާ ޕާންޑޭއާ އެކުއެވެ. ޕޫރީ ޖަގަންނަދު ޑައިރެކްޓްކޮށްފައިވާ މި ފިލްމު ރިލީޒްކުރާނީ އަންނަ މަހުގެ 25 ވަނަ ދުބަހުއެވެ.
ފިލްމުގެ ފުރަތަމަ ލަވަ، "އަކްޑި ޕަކްޑި" ހޯމަ ދުވަހު ބެލުންތެރިންނަށް ސޫކޮށްލުމާއެކު ދެ ދުވަސްތެރޭ 20 މިލިއަނަށް ވުރެ ގިނަ ވިއުސް ލިބިފައިވެއެވެ. ސައުތު އިންޑިއަން ފިލްމުތަކުން ފަހަކަށް އައިސް މަގުބޫލުކަން ހޯދާ ކަހަލަ ފޯރިގަދަ އެ ލަވަ ކިޔާފައި ވަނީ ދޭވް ނެގީ އާއި ޕަވްނީ ޕާންޑޭ އަދި ލިޖޯ ޖޯޖެވެ.
ކަރަން ޖޯހަރު ކޯ ޕްރޮޑިއުސްކުރާ މި ފިލްމުގައި ވިޖޭ ފެންނާނީ ބޮކްސިން ތަޅާ މީހެއްގެ ރޯލުންނެވެ.
މި ފިލްމު ހިންދީ ބަހުގެ އިތުރުން ޓެލެގޫ، ތަމަޅަ، މަލަޔާލަމްގެ އިތުރުން ކަންނަޑާ ބަހުން ނެރުމަށް ވަނީ ހަމަޖެހިފައެވެ.
ވިޖޭ ކުރިން ބުނެފައިވާ ގޮތުގައި އެ ފިލްމުގައި އޭނާ ކުޅެފައިވާ ރޯލަކީ އޭނާގެ ހަޔާތުގައި އެންމެ ޗެލެންޖިން ރޯލެވެ. މީގެ އިތުރުނަ މި ފިލްމަށް އޭނާ ވަރަށް ބުރަ މަސައްކަތްކޮށްފައިވާ ކަމަށްވެސް ވިޖޭ ވަނީ ބުނެފައެވެ.
