އެމްޑީޕީގެ އެއް ބާނީ މުހައްމަދު ލަތީފް (ގޯގޯ ލަތީފް) އަވަހާރަވުމާ ގުޅިގެން ތައުޒިޔާގެ ދަފްތަރެއް ރައްޔިތުންގެ މަޖިލީހުގައި ހުޅުވާލައިފިއެވެ.
މިދަފްތަރު ހުޅުވުމަށްފަހު މަޖިލީހުގެ ރައީސް މުހައްމަދު ނަޝީދުވަނީ މިފޮތުގައި ސޮއި ކުރައްވާފައެވެ. ރައީސް ނަޝީދުގެ ލިޔުން ކޮޅުގައި ވިދާޅުވީ، ލަތީފަކީ ރާއްޖޭގެ ޑީމޮކްރަސީ ގެނައުމަށް ބޮޑެތި ގުރުބާނީވެ ވަޑައިގެންނެވި ބޭފުޅެއްކަމަށެވެ. ލަތީފަކީ ހިތްތިރިކަމާއި، އޯގާތެރިކަމާއި، ހިތްހެޔޮ ކަމުގެ ލާމަސލު މިސާލެއްކަމަށް ރައީސް ނަޝީދު ވަނީ ވިދާޅުވެފައެވެ.
އަދި ލަތީފަކީ ރާއްޖެ މިއަދު ނުދެކޭ ޑިމޮކްރަސީ ގެނައުމުގެ އެންމެ ބޮޑު ގުރުބާނީއެއް ވެވަޑައިގެންނެވި ބޭފުޅާކަމަށްވެސް ރައީސް ނަޝީދު ވިދާޅުވިއެވެ. ލަތީފްގެ ދަފްތަރެއް މަޖިލީހުގައި ހުޅުވީ ފެބްރުއަރީ 24، 1990 އިން މާޗް 27، 1991 އަށް ގދ. އަތޮޅުގެ މަޖިލިސް މެންބަރުކަން ލަތީފް ކުރައްވާފައިވާތީއެވެ.
ރައްޔިތުންގެ މަޖިލީހުގެ ގދ. އަތޮޅުގެ މެންބަރުކަން ކުރެއްވި، އަލްމަރުޙޫމް މުޙައްމަދު ލަޠީފުގެ ހަނދާނުގައި ހުޅުވާފައިވާ ތަޢުޒިޔާގެ ދަފުތަރުގައި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ސޮއިކުރެއްވުން pic.twitter.com/fmCYvDOQGj
— People's Majlis (@mvpeoplesmajlis) July 6, 2022
ލަތީފް އަވަހާރަވީ އާލަސްކަންފުޅާ އުލުއްވާތާ ގިނަ ދުވަސްތަކަށްފަހުއެވެ. ލަތީފަކީ ރާއްޖޭގައި މަލްޓިޕާޓީ ސިސްޓަމް ގާއިމްކޮށް ޒަމާނީ ޑިމޮކްރަސީ ގެނައުމަށް އެންމެބޮޑަށް ވަކާލާތުކުރެއްވި އެއްބޭފުޅާއެވެ. އަދި މިހާރު ވެރިކަން ކުރާ މައި ޕާޓީ އެމްޑީޕީ އުފެއްދުމުގައި މުހިންމު ދައުރެއް އަދާކުރެއްވި އެޕާޓީގެ ފައުޑަރަކީވެސް ލަތީފެވެ.
ސިޔާސީ ކަންކަމުގައި ލަތީފް މިފަހުން ނުފެނުނު ނަމަވެސް ލަތީފަކީ 1990 އިން 1991 ވަނަ އަހަރު ރައްޔިތުުންގެ މަޖިލިސް މެމްބަރުކަންވެސް ކުރައްވާފައިވާ ބޭފުޅެކެވެ. އަދި އެންމެ ފުރަތަމަ އުފުދުނު އެމްޑީޕީގެ ވެރިކަމުގައި ހިއުމަން ރައިޓްސް އެމްބެސެޑަރުގެ މަގާމުވެސް ފުރުއްވާފައިވާ ބޭފުޅެކެވެ.
