ފިލްމު އިންޑަސްޓްރީގައި ނެޕޮޓިޒަމް އަބަދުވެސް އޮންނާނެ ކަމަށް އަމިއްލަ މަސައްކަތުން މިހާރު ބޮލީވުޑްގައި ފައިތިލަ ސާބިތުކޮށްފައިވާ އެކްޓަރ ރާޖްކުމާރު ރާއޯ ބުނެފިއެވެ.
ފިލްމީ އާއިލާއަކަށް ނިސްބަތްނުވާ މީހަކަށް ބޮލީވުޑްގައި ފުރުސަތު ހޯދުން ދަތިކަމަށް ދެކެވޭ ވާހަކަ ތަކަކީ އަބަދުވެސް އާންމު ވާހަކަތަކެކެވެ. އަދި ދާއިރާގެ ވަރުގަދަ މީހެއްގެ ސަޕޯޓާއި ނުލައި ކުރިއަރަން މަސައްކަތް ކުރާ މީހަކަށް ކުރިމަތިވާ އެކިއެކި ގޮންޖެހުން ތަކުގެ ވާހަކައަކީވެސް އާންމު ވާހަކައެކެވެ.
ރާޖްކުމާރަކީ ފިލްމީ އާއިލާއަކަށް ނިސްބަތް ނުވެ ބޮލީވުޑްގައި ކުރިއަރާދިޔަ އެއް ތަރިއެވެ. އޭނާގެ ފުރަތަމަ ބޮލީވުޑް މަސައްކަތަކީ 2010ގެ "ލަވް ސެކްސް އޮރް ދޯކާ" އެވެ. އޭގެ ފަހުން ކާމިޔާބު ގިނަ ފިލްމުތަކެއް އޭނާ ވަނީ ބެލުންތެރިންނާހަމައަށް ދޫކޮށްލާފައެވެ.
ދާދިފަހުން އިންޓަވިއުއެއްގައި ވާހަކަ ދައްކަމުން ރާޖްކުމާރު ބުނީ ފިލްމު އިންޑަސްޓްރީން ނެޕޮޓިޒަމް ނައްތައި ނުލެވުނަސް ވަރަށް ގިނަ ފުރުސަތުތައް އެބައޮތް ކަމަށެވެ. އެގޮތުން އޭނާއާއެކު ކިޔެވި 2 ރަހުމަތްތެރިން ކަމުގައިވާ ޖައިދީޕް އަހްލަވަތު އާއި ޕްރަތީކް ގާންދީ އޮންލައިން ޕްލެޓްފޯލް ތަކުގައި ހޯދަމުންދާ ކާމިޔާބީ އޭނާ ވަނީ ފާހަގަކޮށްފައެވެ. އެގޮތުން ނެޕޮޓިޒަމް އަބަދުވެސް އޯންނާނެ ކަމަށާއި ނަމަވެސް މީހާގެ ހިތްވަރާއި ކުޅަދާނަކަމުން ކުރިއަށްދެވޭނެ ކަމަށް އިންޑިއާ ޓުޑޭއަށް ދިން އިންޓަވިއުގައި ރާޖްކުމާރު ވަނީ ބުނެފައެވެ.
ރާޖްކުމާރު ދެން އެންމެ އަވަހަށް ފެނިގެންދާނީ މިމަހުގެ 15 ވަނަ ދުވަހު ރިލީޒްކުރުމަށް ތައްޔާރުވެފައިވާ ފިލްމު "ހިޓް: ދަ ފަސްޓް ކޭސް" އިންނެވެ.
