ޓީވީ ތަރިން ކަމުގައިވާ ގުރްމީތު ޗޯދްރީ އާއި ދެބީނާ ބޮނެރްޖީއަށް އަންހެން ކުއްޖަކު ލިބުނުކަން އިއުލާން ކުރީ މިއަހަރުގެ އޭޕްރީލްމަހުއެވެ. މިއީ މި ދެމީހުންގެ ފުރަތަމަ ދަރިފުޅެވެ.
ދެބީނާ ވިހާފައިވަނީ އޭޕްރީލް މަހުގެ 3 ވަނަ ދުވަހުއެވެ. ނަމަވެސް އިއްޔެއާ ހަމައަށް ދަރިފުޅުގެ މޫނު ފެންނަ ފޮޓޯއެއް ނުވަތަ ވީޑިއޯއެއްވެސް އާންމުކޮށްފައެއް ނުވެއެވެ.
އެދެމީހުންގެ ލޯބިލޯބި އަންހެން ދަރިފުޅު ލިއަންނާ ޗޯދްރީގެ ފޮޓޯއެއް ފުރަތަމަ ފަހަރަށް އިއްޔެވަނީ އާންމުނަށް ދޫކޮށްލާފައެވެ. މި ޕޯސްޓާއެކު އެ ދެމަފިރިން ދަރިފުޅުގެ ނަމުގައި ހަދާފައިވާ އިންސްޓަގްރާމް އެކައުންޓްވެސް ވަނީ ތައާރަފް ކޮށްދީފައެވެ. އެ އެކައުންޓްގައި ދެމަފިރިން ދަރިފުޅާއެކު ނަގާފައިވާ ބައެއް ފޮޓޯއާއި ވީޑިއޯ ހިމަނާފައި ވެއެވެ. ނަމަވެސް ދަރިފުޅުގެ މޫނު ރީތިކޯށް ފެންނާނެހެން އާންމުކޮށްފައި ވަނީ އިއްޔެ ދޫކޮށްލި ފޮޓޯ އެކަންޏެވެ.
View this post on Instagram
ދެބީނާ އާއި ގުރްމީތު ކައިވެނި ކުރީ 2011 ވަނަ އަހަރުއެވެ. އަދި ދެބީނާ ބަނޑުބޮޑުކަން އިއުލާން ކޮށްފައިވަނީ މި އަހަރުގެ ފެބުރުވަރީ މަހުގެ ތެރޭގައެވެ.
މި ދަރިފުޅު ލިބުމުގެ ކުރިން އެ ދެމަފިރިން ވަނީ ދެ އަންހެންކުދިން އެޑޯޕްޓް ވެސް ކޮށްފައެވެ. އެއީ ޕޫޖާ އާއި ލަތާއެވެ.
