ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮއްކޮ އަދި މަޝްހޫރު ގާނޫނީ ވަކީލް ނާޒިމް އަބްދުއްސައްތާރު ކަމަށް ބެލެވޭ މީހަކު އެއްޖިންސުން ގުޅުން ހިންގާ ވީޑިއޯއެއް އާންމުވެފައިވާތީ އޭނާގެ ޕާސްޕޯޓް ހިފަހައްޓައި، އެ މައްސަލަ ތަހުގީގުކޮށް އެކަމުގެ ހަގީގަތް ހާމަކުރުމަށް އިދިކޮކޮޅު ޕީޕީއެމުން ގޮވާލައިފިއެވެ.
ޕީޕީއެމްއިން ނެރުނު ބަޔާނުގައި ބުނެފައިވަނީ ސޯޝަލް މީޑިއާގައި މީހުންނާއި ދިމާކޮށް ފުރައްސާރަކުރަމުން ގެންދާ ލޯޔަރު ނާޒިމް ސައްތާރު ކަމަށް ވަރަށް ބޮޑަށް ޔަޤީން ކުރެވޭ މީހަކު ކުޑަ ފިރިހެން ކުއްޖަކާއެކު އެއްޖިންސުން ގުޅުން ހިންގާ ވީޑިއޯއެއް ދައުރުވަމުން ދާތީ އެ ވީޑިއޯގެ ޙަޤީޤަތް ދެނެގަތުމަށްޓަކައި އެކަމުގެ ފުރިހަމަ ތަޙުޤީޤެއް ހިންގުމަށާއި، ވީޑިއޯ އިން ފެންނަ ފަރާތް ހޯދާ، ހިފާ ހައްޔަރުކޮށް ދައުވާ އުފުލުމަށް ކަމާ ބެހޭ މުއައްސަސާތަކަށް ގޮވާލާކަމަށެވެ.
އަދި މިފަދަ ޣައިރުޤާނޫނީ އަދި ލާދީނީ ކަންކަން ކޮށްފަވާ ފަރާރްތައް މީގެ ކުރިންވެސް މިސަރުކާރުން ޤައުމުން ބޭރަށް ފުރުވާލާފައިވާތީ، މިވީޑިއޯއިން ފެންނަ ފަރާތްވެސް ފިލުވަން މިސަރުކާރުން މަސައްކަތް ކުރާނެ ކަމަށް ވަރަށް ބޮޑަށް ބެލެވޭތީ، އެފަރާތުގެ ޕާސްޕޯޓް ހިފަހައްޓާ ޤައުމުން ބޭރަށް ފުރުން ހުއްޓުވުމުގެ އަވަސް ފިވަޅުތައް އެޅުމަށްވެސް ވަނީ ގޮވާލާފައެވެ.
ސިޔާސީ ގޮތުން ބާރުގަދަ ޢާއިލާއަކަށް ނިސްބަތް ވުމަކީ ފާޚިޝް މުޑުދާރު ޢަމަލުތައް ހިންގާ، ޤާނޫނާ ޚިލާފު ވުމަށް ދެވޭ ހުއްދައަކަށް ވެގެން ނުވާނެ. ވަކި ޢާއިލާއަކަށް ނުވަތަ ވަކި ނަސްލަކަށް ނިސްބަތް ވީ ނަމަވެސް ޤާނޫނަކީ އެންމެންގެ މައްޗަށް ހަމަހަމަކަމާއެކު ހިނގަން ޖެހޭނެ އެއްޗެއް. މީގެ ކުރިންވެސް މިފަދަ އެތައް ޢަމަލެއް ހިންގާފައިވާ ފަރާތްތަކުގެ މައްސަލަތައް އޮއްބާލާ، ތުހުމަތު ކުރެވޭ ފަރާތްތަށް ޤައުމުން ބޭރަށް ފުރުވާލުން ފަދަ އެތައް ކަމެއް މިސަރުކާރުން ވަނީ ކޮށްފަ. އޭގެ ތެރޭގައި ރޯޔަލް ރޭޕް ހާދިސާއާއި ކުޑަކުދިންނަށް ޖިންސީ ގޯނާ ކުރުމާއި، އަންހެނުންގެ ޢިއްފަތްތެރިކަން ގަދަކަމުން ފޭރިގަތްފައިވާ ފަރާތްތަކުގެ ކަންކަން ފޮރުވާ މިސަރުކާރުން ވަނީ އެކަންކަން އޮއްބާލާފަ.
– އިދިކޮޅު ބަޔާނުގައިވެއެވެ.
ދީނީ ޢިލްމުވެރިންނާއި ހޯމް މިނިސްޓަރު ފަދަ ޝޭޚުން ގިނަ އަދަދަކަށް ހިމެނޭ ސަރުކާރަކުން އެފަދަ ލާދީނީ ކަންކަމަށް ހިތްވަރުދީ، ލާދީނީއްޔަތު ޕްރޮމޯޓް ކުރާ ފަރާތްތައް ފުރުވާލާ، އެފަދަ މުޑުދާރު ޢަމަލުތައް ފޮރުވަން މަސައްކަތް ކުރުމަކީ ހިތާމަހުރި ލަދުވެތި ކަމެއްކަމަށްވެސް މިބަޔާނުގައި ބުނެފައިވެއެވެ.
