ބޮލީވުޑުން ވަރަށް މަދުން މިހާރު ފެންނަ ކުރީގެ މަޝްހޫރު ބަތަލާ ރޭކާ، ސަންޖޭ ލީލާ ބަންސާލީގެ "ހީރާމަންޑީ"ގެ ރޯލަކަށް ސޮއިކޮށްފި ކަމަށް ޚަބަރުތައް ބުނެފިއެވެ.
ބޮޑު ކާސްޓެއް ހިމެނޭ "ހީރާމަންޑީ" އަކީ ސަންޖޭ ނެޓްފްލިކްސްއަށް ހަދައިދޭ ވެބް ސީރީޒެކެވެ. މި ވެބް ސީރީޒްގައި ސޮނާކްޝީ ސިންހާ އާއި ހުމާ ގުރައިޝީ އާއި މަނީޝާ ކޮއިރާލާ އަދި މާދުރީ ޑިކްސިޓްގެ އިތުރުންވެސް ގިނަ ތަރިންތަކެއް ހިމެނެއެވެ.
ސޮނާކްޝީ މީގެ ލީޑުން ފެނިގެންދާނެކަމަށް ރިޕޯޓްތައް ބުނާއިރު އޭނާ ވަނީ މީގެކުރިން ވެސް ބަންސާލީގެ ޕްރޮޖެކްޓެއްގައި މަސައްކަތްކޮށްފައެވެ. އެއީ އޭނާ ޕްރޮޑިއުސްކޮށް، ޕްރަބޫދޭވާ ޑައިރެކްޓްކޮށް، އަކްޝޭ ކުމާރާ އެކު 2012 ގައި ގެނެސްދިން "ރައުޑީ ރާތޯޅް" އެވެ.
ބަންސާލީގެ ފިލްމު ކުންފުންޏާއި ނެޓްފްލިކްސް ގުޅިގެން ހަދަން ނިންމާފައިވާ "ހީރާ މަންޑީ" އަކީ ބަންސާލީ ޕްރޮޑިއުސްކޮށް 2015 ގައި ގެނެސްދިން "ހަވާއީޒާދާ" ގެ ޑައިރެކްޓަރު ވިބޫ ޕޫރީ ޑައިރެކްޓްކުރާ ވެބް ސީރީޒެކެވެ.
