އޭޝިއާސް ބެސްޓް ސޯޝަލް ސަރވިސް އޯރގަނައިޒޭޝަން އެވާރޑް އަދި އޭޝިއާސް އައުޓްސްޓޭންޑިންގ އެންޖީއޯ އެވާރޑް ހުވަދޫ އެއިޑް އަށް ލިބިއްޖެ އެވެ.
މި ދެ އެވާރޑް ހުވަދޫ އެއިޑްއާއި ހަވާލުކޮށްފައިވަނީ 19 ޖޫން 2022 ގައި އިންޑީއާ ގެ ޓަމިލްނާޑޫ ގެ ޓްރިޗީ، ހޮޓެލް ބްރީޒް ރެސިޑްންސް ގައި ބޭއްވުނު އޭޝިއާ އެވާރޑް ހަފްލާގައެވެ.
މިއެވާރޑް ހަވާލުކުރުމުގެ ރަސްމިއްޔާތުގައި ހުވަދޫ އެއިޑްގެ ގަވަރނިންގ ކައުންސިލް އަދި މެނޭޖްމަންޓްގެ އިސްފަރާތްތައް ބައިވެރި ވެފައި ވެއެވެ. ހުވަދޫ އެއިޑްގެ ފަރާތުން މި ދެ އެވާރޑް އާއި ހަވާލުވީ ހުވަދޫ އެއިޑްގެ އެގްޒެކްޓިވް ޑިރެކްޓަރ އަޙްމަދު އަމީޒު އެވެ. ރައީސުލް ޖުމްހޫރިޔާ ދެއްވާ ގައުމީ ހިއްވަރު ދިއްވުމުގެ އިނާމް 2007 ވަނަ އަހަރު ލިބިފައިވާ، ހުވަދޫ އެއިޑަކީ ސަރަހައްދީ އަދި ބައިނަލް އަގުވާމީ ފެންވަރުގެ އެކިއެކި ހަރަކާތްތަކުގައި ބައިވެރިވަމުން އަންނަ ޖަމްއިއްޔާއެކެވެ.
މި ދެ އެވާރޑްގެ އިތުރުން ހުވަދޫ އެއިޑްގެ ޗީފް އެޑްވައިޒަރ އިމާދު މުޙައްމަދު އަށްވެސް މިހަފްލާގައި ވަނީ ތިން އެވާރޑް އެއް ލިބިފައެވެ. އެއީ އޭޝިއާސް އައުޓްސްޓޭންޑިންގ ސޯޝަލް އެކްޓިވިސްޓް އެވާރޑް، އޭޝިއާސް ސޯޝަލް އިނޮވޭޝަން ލީޑަރޝިޕް އެވާރޑް އަދި އޭޝިއާސް އައުޓްސްޓޭންޑިންގ ސައިވިސް އެވާރޑް އެވެ.
އިމާދު މުހައްމަދަކީ 2005 އިން 2020 އަހަރުގެ ނިޔަލަށް ހުވަދޫ އެއިޑް ގެ އެގްޒެކްޓިވް ޑިރެކްޓަރަވެ. 2008 ވަނަ އަހަރު ޒުވާނުންގެ ގައުމީ އިނާމްވެސް ލިބިފައިވާ އިމާދު މުޙައްމަދު އަކީ ހުވަދޫ އެއިޑްގެ ބައިނަލްއަގްވާމީ ގުޅުންތަކާއިބެހޭ މަސައްކަތާއި، ބޭރުގެ އެހީގައި ހިންގާ މަޝްރޫއުތައް މެނޭޖުކުރުމުގެ މަސައްކަތް މިހާރުވެސް ކުރައްވަމުން އަންނަ ބޭފުޅެކެވެ.
