ޓިއުނީޝިއާގެ ރައީސް ކައިސް ސައިދު އެގައުމުގެ ގާނޫނުހަދާ މަޖިލިސް ފާއިތުވެދިޔަ އަަހަރު ސަސްޕެންޑް ކުރުމަށްފަހު، ވެރިކަމުގެ ބާރުތައް މުށުތެރެއަށް ލައްވާ، އަދި ފަޑިޔާރު ގެއަށް އަތް ބާނަމުންދާ ކަމަށްބުނެ، ޓިއުނީޝިއާގެ ފަނޑިޔާރުން ކުރަމުންދާ މުޒާހިރާތައް 3ވަނަ ހަފްތާއަށް ދިގު ދެމިގެން ގޮސްފައިވާއިރު މިމުޒާހިރާތައް ހުއްޓުމަކަށް ނުގެނެސް ކުރިޔަށް ގެންދިއުމަށް މުޒާހިރާ ކުރަމުންދާ ފަނޑިޔާރުން ނިންމައިފިއެވެ.
ޓިއުނީޝިއާގެ ރައީސް ސައިދުވަނީ މި ޖޫންމަހުގެ 1 ވަނަ ދުވަހު އެގައުމުގެ 57 ފަނޑިޔާރަކު މަގާމުން ދުރު ކޮށްފައެވެ. މި ފަނޑިޔާރުން ވަޒިފާއިން ވަކި ކޮށްފައިވަނީ ކޮޕްޝަނާއި އަދި ޓެރަރިސްޓުންނަށް ހިމާޔަތް ދެމުންދާ ކަމުގެ ތުހަމަތުގައެވެ. އެހެންނަމަވެސް ޓިއުނީޝިއާގެ ފަނޑިޔާރުންގެ ޖަމިއްޔާއިން ބުނެފައިވަނީ މިއީ ސިޔާސީ ތުހުމަތުތަކެއް ކަމުގައެވެ.
ފަނޑިޔާރުން ވަޒީފާއިން ވަކި ކުރުމާއި ގުޅިގެން، އިތުރު ފަނޑިޔާރުންވަނީ ޖޫންމަހުގެ 4 ވަނަ ދުވަހުން ފެށިގެން މަސައްކަތް ކުރުން ވަގުތީގޮތުން ހުއްޓާލާފައެވެ. އަދި އެ ފަޑިޔާރުން ތުހުމަތު ކުރާ ގޮތުގައި، ރައީސް ސައިދު ފަނޑިޔާރުން ވަޒީފާއިން ވަކި ކޮށްފައިވަނީ، ފަނޑިޔާރުގެއަށް އަތް ބާނާ، އަދި ފަނޑިޔާރުގޭގެ ބޭނުން އޭނާގެ ސިޔާސީ ވާދަވެރިންނާއި ދެކޮޅަށް ބޭނުން ކުރުމަށްޓަކައެވެ.
"ފަނޑިޔާރުން ނިންމާފައިވަނީ މިހާރު ކުރިޔަށްދާ މިޒާހިރާތައް 3 ވަނަ ހަފްތާގައިވެސް ކުރިޔަށް ގެންދިއުމަށް.. ފަނޑިޔާރުންގެ ހިންހަމަ ނުޖެހުން ފާޅުކުރުމުގެ ގޮތުން އެމީހުން މުޒާހިރާ ކުރަމުން ދާނީ އެމީހުންގެ ރަސްމީ ހެދުމުގައި މަގުމަތީގައި،" ޒުވާން ފަނޑިޔާރުންގެ ޖަމިއްޔާގެ އިސްފަރާތް ކަމުގައިވާ މުރާދު މަސްއޫދީ ރޮއިޓާސް ނިއުސް އޭޖެންސީއާއި ވާހަކަ ދައްކަވަމުން ވިދާޅުވެފައި ވެއެވެ.
އަދި އޭނާ އިތުރަށް ވިދާޅުވެފައި ވާގޮތުގައި، ވަޒީފާއިން ވަކިކޮށްފައިވާ ފަނޑިޔާރުންވަނީ، އެމީހުން ވަޒީފާއިން ވަކިކުރުމަށް ނިންމާފައިވާ ނިންމުމާއި ދެކޮޅަށް އިހުތިޖާޖު ކުރުމުގެ ގޮތުން ބަނޑުހައި ހޫނުކަމުގެ ހަޅުތާލެއް ކުރުމަށްވެސް ނިންމާފައެވެ.
ޓިއުނީޝިއާގެ ރައީސް ސައިދު ޖޫންމަހުގެ 1 ވަނަ ދުވަހު ގިނަ އަދަދެއްގެ ފަނޑިޔާރުން ވަޒީފާއިން ވަކިކުރުމަށް ނިންމުމާއި ގުޅިގެން އެގައުމުގެ ފަނޑިޔާރުންގެ 4 ޖަމިއްޔާއަކުން ވަނީ ހަޅުތާލު ކުރުމަށް ގޮވާލާފައެވެ.
ފާއިތުވެދިޔަ އަހަރުގެ ޖުލައިމަހު، ކައިސް ސައިދު އެގައުމުގެ ގާނޫނުހަދާ މަޖިލިސް ސަސްޕެންޑު ކުރުމާއެކު، އިދިކޮޅު ފަރާތްތަކުން ބުނެފައިވަނީ އޭނާ ގެނެސްފައިވަނީ ބަޢާވާތެއް ކަމުގައެވެ.
އެއަށްފަހު، މިއަހަރުގެ މާރޗްމަހު އޭނާވަނީ އެންމެފަހުން ޓިއުނީޝިއާގެ ގާނޫނުހަދާ މަޖިލިސް އުވާލައްވާފައެވެ. އެއް އަހަރަށްވުރެ ދިގު މުއްދަތަކަށް ސަސްޕެންޑްކޮށްފައިވާ ޓިއުނީޝިއާގެ ގާނޫނުހަދާ މަޖިލިސް ސައިދު އުވާލައްވާފަވަނީ، ގާނޫނުހަދާ މަޖިލިސް އުވާލުމަށް އޭނާ ނެރުއްވާފައިވާ ގަރާރު ބާތިލްކުރުމަށް މެމްބަރުން ވޯޓުލުމަށް މަސައްކަތް ކުރައްވަމުން ގެންދަވަނިކޮށެވެ.
ރައީސް ސައީދުއަކީ، 2019ގެ ޓިއުނީޝިއާގެ ރިޔާސީ އިންތިޚާބުގައި ވާދަކުރުމުގެ ޝައުގުވެރިކަން އެންމެ ފުރަތަމަ ފާޅުކުރެއްވި ކެނޑިޑޭޓޭވެ. އޭނާ އެ އިންތިޚާބުގައި ވާދަކޮށްފައިވަނީ އެއްވެސް ސިޔާސީ ޕާޓީއަކާއި ގުޅިވަޑައިގެނެއް ނޫނެެވެ. ނަތީޖާއެއްގެ ގޮތުން، ސިޔާސީ ފަރާތްތަކުގެ ޗަރުކޭސްތަކުގެ މަތިން ފޫހިވެފައިވާ އެތަކެއް ރައްޔިތުންނެއްގެ ތާއީދު އޭނާއަށް ލިބިގެން ދިޔައެވެ.
އަދި ވަކީން ޚާއްސަކޮށް، ޓިއުނީޝިއާގެ ޒުވާން އާބާދީގެ ބޮޑު އިންސައްތައެއްގެ ތާޢީދުވެސް އޭނާއަށް އެ އިންތިޚާބުގައި ލިބިގެން ގޮސްފައި ވާކަން ފާހަގަ ކޮށްލެވެއެވެ.
