ހޮލީވުޑްގެ ތަރި ޓޮމް ހިޑެލްސްޓަނާ އެކީ ބީބީސީން ވަން އިން ގެނެސްދިން ކާމިޔާބު ސިލްސިލާ "ދަ ނައިޓް މެނޭޖާ"ގެ ހިންދީ ވާޝަންގެ ނަމަކަށް "ކެޕްޓަން" ހަމަޖައްސައިފި އެވެ.
މި ވެބް ސީރީޒްގެ ލީޑުން ފެނިގެންދާނީ އަދިއްތިޔާ ރޯއީ ކަޕުރެއެވެ. އަދި ސީރީޒްގެ މުހިންމު ރޯލަކުން އަނިލް ކަޕޫރު ވެސް ފެނިގެން ދާނެއެވެ. މި ސީރީޒުން ބަތަލާގެ ރޯލުން ފެނިގެން ދާނީ ސޮބީތާ ދުލިޕާލާއެވެ.
ސީރީޒްގެ ބައެއް މަންޒަރުތަށް ދާދިފަހުން ވަނީ ޝްރީ ލަންކާގައި ނަގާފައެވެ. މި ވެބް ސީރީޒް އަދިއްތިޔާއަށް ލިބުނީ ރިތިކް ދޫކޮށްލުމުންނެވެ.
ޑިޒްނީ ޕްލަސް ހޮޓްސްޓާއިން ގެނެސް ދިނުމަށް ތައްޔާރު ކުރާ މި ވެބްސީރީޒްގެ އެއް ޕްރޮޑިއުސަރަކީ ކުރީގެ ބަތަލާ ޕްރިތީ ޒިންތާއެވެ. ސީރީޒް ބެލުންތެރިންނާ ހަމައަށް ގެނެސް ދިނުމަށް މިހާރު ނިންމާފައިވަނީ އަންނަ އަހަރުއެވެ. ނަމަވެސް އަދި ވަކި ތާރީހެއް މިހަތަނަށް އިއުލާނު ކޮށްފައި ނުވާ މި ސީރީޒްގެ ޑައިރެކްޓަރަކީ ސަންދީޕް މޯދީއެވެ.
