"ކޮފީ ވިތު ކަރަން"އަށް ރަންބީރު ކަޕޫރު ނުދާ ސަބަބު ޝޯގެ ހޯސްޓް ކަރަން ޖޯހަރް ކިޔައިދީފިއެވެ.
މި ޝޯއަކީ ކަރަންއާ ގާތް ބޮލީވުޑްގެ ތަރިންނާއެކު ކުރިއަށް ގެންދާ ޝޯއެކެވެ. މިޝޯއާ މެދު ހިތްހަމަ ނުޖެހި ޝޯ ތެރެއިން ކިތަންމެ ތަރިންނެއް އޭނާއަށް ވައްބަހުންވެސް ޖަހައެވެ. އަދި ބައެއް ތަރިން ދެވަނަ ފަހަރަށް ޝޯގައި ބައިވެރި ވުމަށް އިންކާރުވެސް ކުރެއެވެ.
އެގޮތުން ރަންބީރު ކަޕޫރު ޝޯއަށް ނުދާ ސަބަބު ވަނީ ކަރަން ކިޔައިދީފައެވެ.
"ރަންބީރު ބުނީ އެ ޝޯ އަކީ ނުދާނެ ޝޯއެއް ކަމަށް. އެކަމަކު އަހަރެންގެ ގެއަށް ގޮސް ޗެޓް ކޮށް ކޮފީ ބޯން ތައްޔާރަށް ހުރިކަމަށް، ސަބަބަކީ އެ ޝޯވ ގައި ކުރާ ސުވާލުތަކަށް، މާޒީ އާއި ބެހޭ ގޮތުން ވާހަކަ ދައްކަން ބޭނުން ނުވަނީ"
– ރަންބީރު ބުނިކަމަށް ކަރަން ބުންޏެވެ.
ކަރަން ބުނެފައިވާ ގޮތުގައި މާޒީގެ ވާހަކަ ދައްކާލުމަކީ މައްސަލައެއް ނޫނެވެ. ކަރަންއާއި ރަންބީރާ ދެމެދުގައި މިހާރު ގުޅުން ވަނީ ވަރަށް ބޮޑަށް ވަރުގަދަވެސް ވެފައެވެ. ކަރަން މާކުރީއްސުރެ ބުނަމުން އަންނަނީ އާލިއާއަކީ އޭނާގެ ދަރިއެއް ކަމަށެވެ.
ރަންބީރާއި އާލިއާގެ ކައިވެނި މި އަހަރު ވަނީ ކުރެވިގެން ގޮސްފައެވެ. ކަރަން އެކައިވެންޏާއި ބެހޭގޮތުން ވާހަކަދައްކަމުން ބުނެފައިވަނީ ރަންބީރަކީ މިހާރު ދަނބިދަރި ކަމަށެވެ.
"ކޮފީ ވިތު ކަރަން" ގެ ސީޒަން 7 އަންނަ މަހުގެ 7 ގައި ޕްރިމިއާކުރާނެއެވެ.
