ބާގްޔަޝްރީގެ ފުރަތަމަ ފިލްމު "މެއިނޭ ޕިޔާރް ކިޔާ" އަކީ ސުޕަ ހިޓެކެވެ. މި ފިލްމުގައި އޭނާ އާއެކުގައި ފެނިގެން ދިޔައީ ސަލްމާން ޚާނެވެ.
ސޫރަޖް ބާރްތިއާ ޑައިރެކްޓް ކުރި 1989ގެ މި ފިލްމަކީ މި ދެތަރިން ބޮޑެތި ސްޓާރުންނަށް ހެދި ވަރަށް ކާމިޔާބު ފިލްމެކެވެ.
ނަމަވެސް މި ފިލްމާއި މި ކާމީޔާބަށް ފަހު ބާގްޔަޝްރީ ވަނީ ފިލްްމީ ދާއިރާ އާއި ދުރަށް ގޮސްފައެވެ. އަލަތު ފިލްމަށް ފަހު ދާދި ފަހަކާ ޖެހެންދެން އެހެން ފިލްމެއް އޭނާ ނުކުޅެއެވެ.
"ފާއިތުވި 33 އަހަރެން މި އަންނަނީ އެ ސުވާލަށް ޖަވާބު ދެމުން. ކީއްވެ ކަން ފިލްމު ނުކުޅުނީ، ފުރަތަމަ ފިލްމަށް ފަހު. އަހަރެން ބޭނުން ވީ އާއިލާއެއް ބިނާކުރަން. އަހަރެންގެ ދަރިންވެސް ބުނޭ އެމީހުންނާވެސް އެސުވާލު ކުރާކަމަށް"
– ބާގްޔަޝްރީ
ބާގްޔަޝްރީގެ ދަރިން ކަމުގައިވާ އަބިމަންޔޫ ދަސާނީ އާއި އަވަންތިކާ ދަސާނީ އަންނީ ބޮލީވުޑްގައި ފައިތިލަ ސާބިތު ކުރެވޭތޯ މަސައްކަތް ކުރަމުންނެވެ.
ބާގްޔަޝްރީ ބޮލިވުޑަށް އެނބުރި އައިސްފައިވަނީ 2021 ވަނަ އަހަރުއެވެ. އޭނާ ވަނީ އެ އަހަރު ތަލައިވީގެ ރޯލަކުން ފެނިގެން ގޮސްފައެވެ. އަދި މިދިއަ އަހަރު އޭނާ ވަނީ ޕްރަބާސް އާއި ޕޫޖާ ހޭގްޅޭ ގެ ފިލްމް "ރާދޭ ޝްޔަމް" އިންވެސް ފެނިގެން ގޮސްފައެވެ.
