ބޮލީވުޑްގެ މަޝްހޫރު ބަތަލާ ޝްރައްދާ ކަޕޫރުގެ ބޭބެ ސިދާންތު ކަޕޫރު ޑްރަގުގެ މައްސަލައެއްގައި ހައްޔަރުކޮށް ކަފާލާތުގެ ދަށުން ދޫކޮށްލައިފިއެވެ.
ރިޕޯޓްތައް ބުނާ ގޮތުގައި ސިދާންތު ހައްޔަރުކުރީ ބެންގަލޫރުގެ ހޮޓަލެއްގައި ޕާޓީ ކުރަނިކޮށެވެ. އެކްޓަރ ޝަކްތީ ކަޕޫރުގެ ފިރިހެން ދަރިފުޅު ހައްޔަރުކުރީ ބެންގަލޫރްގެ ހޮޓަލެއްގައި މަސްތުވާތަކެއްޗާއެކު ޕާޓީކުރަނިކޮށް ލިބުނު ރިޕޯޓަކާ ގުޅިގެން ހިންގި އޮޕަރޭޝަނެއްގަ އެވެ. އަދި އޭނާ ހައްޔަރުކޮށް ޓެސްޓްކުރި އިރު މަސްތުވާތަކެއްޗަށް ޕޮޒިޓިވް ކަމަށް ވެސް ރިޕޯޓްތައް ބުނެއެވެ.
ރިޕޯޓްތައް ބުނާ ގޮތުގައި އެ މައްސަލައާ ގުޅިގެން ސިދާންތާއެކު އިތުރު ފަސް މީހަކު ހައްޔަރުކޮށްފައި ވެއެވެ. މި އެންމެންވެސް ދޫކޮށްލީ ފުލުހުންގެ އެދިއްޖެ ހާލަތެއްގައި ފުލުހުންގެ އިދާރާއަށް ހާޒިރުވާން އެއްބަސް ކުރުވުމަށް ފަހުއެވެ.
ޝަރުތު ތަކަކާއެކު ސިދާންތަށް ބޭލް ދީފައިވަނީ ހޯމަ ދުވަހުއެވެ.
ބޭބެ ހައްޔަރުކުރި އިރު ޝްރައްދާ މި ވަގުތު ހުރީ ރަންބީރް ކަޕޫރާއެކީ ކުޅޭ، ޑައިރެކްޓަރު ލަވް ރަންޖަންގެ ފިލްމުގެ ޝޫޓިންއަށް ސްޕެއިންގައެވެ.
2020ގެ ތެރޭގައި ނާކޮޓިކްސް ކޮންޓްރޯލް ބިއުރޯ (އެންސީބީ) އިން ތަހުގީގުކުރަމުންދިޔަ ސުޝާންތު ސިންގް ރާޖްޕުތުގެ މަރުގެ މައްސަލައާއެކު ފެންމަތިވި ޑްރަގް މައްސަލާގައި ވެސް ޝްރައްދާއާ ވެސް ސުވާލުކޮށްފައި ވެއެވެ.
ސިދާންތު ވަނީ ބައެއް ފިލްމު ތަކުންވެސް ފެނިގެން ގޮސްފައެވެ. ސިދާންތު އާއި ޝްރައްދާ އެއްކޮށްވެސް ވަނީ ފިލްމް އަކުން ފެނިގެން ގޮސްފައިއެވެ.
ކޮމެންޓު ފޮނުވާ