މިހާރު އަމަލު ކުރެވެމުންދާ ސިޔާސީ ޕާޓީތަކުގެ ގާނޫނުން 10،000 މެމްބަރުން ހަމަވާ ޕާޓީތަކަށް ދައުލަތުގެ ބަޖެޓުން ފައިސާ ދިނުމަށް ކަނޑައަޅާފައިވާ ކަނޑައެޅުމަކީ އެންމެ އިންސާފުވެރިކަމެއް ކަމަށް ނުވާތީ، ސިޔާސީ ޕާޓީތަކަށް ބަޖެޓުން ފައިސާދިނުން ހުއްޓުވުމަށް، މޯލްޑިވްސް ނޭޝަނަލް ޕާޓީން ސިޔާސީ ޕާޓިތަކުގެ ގާނޫނަށް އިސްލާހު ހުށަހަޅައިފިއެވެ.
އެމްއެންޕީން ނެރުނު ބަޔާނުގައި އެޕާޓީން ބުނެފައިވަނީ، މިގާނޫނަށް އެޕާޓީންގެ ޕާލަމެންޓްރީ ގުރޫޕުގެ ފަރާތުން ވިލިމާލޭ ދާއިރާގެ މެމްބަރު އަހުމަދު އުޝާމް ހުށަހެޅުއްވި އިސްލާހުގައި، ދައުލަތުގެ މާލިއްޔަތުން ސިޔާސީ ޕާޓީތަކަށް ޚަރަދު ކުރުން ހުއްޓުމަކަށް ގެނައުމުގެ އިތުރުން، ސިޔާސީ ޕާޓީތަކުގެ މެމްބަރުންގެ ދަފްތަރެއް އިލެކްޝަންސް ކޮމިޝަނުން ބެލެހެއްޓުމުގެ ބަދަލުގައި މިކަމަކީ ޑިމޮކްރަޓިކް އެހެނިހެން ގައުމުތަކުގައިވެސް ސިޔާސީ ޕާޓީތަކުން ކުރަމުންދާ ކަމަކަށް ވާތީ، މިކަމަކަށްމަގުފަހި ކުރުވުމަކީވެސް މިއިސްލާހު އެޕާޓީން ހުށަހެޅި އެއް ސަބަބެވެ.
އެމްއެމްޕީން ހާމަކޮށްފައިވާ ގޮތުގައި، މިގާނޫނުނަށް އެޕާޓީން ހުށަހެޅި މިއިސްލާހުގެ ސަބަބުން ސިޔާސީ ޕާޓީތަކުގެ ދަފްތަރު ދުނިޔޭގެ ބެސްޓް ޕްރެކްޓިސްއާއި އެއް ގޮތަށް ބެލެހެއްޓި، ދައުލަތުގެ ބަޖެޓަށް ލުއިފަސޭހަތަކެއް ލިބިގެން ދާނެކަމަށްވެސް އެޕާޓީން ދެކެއެވެ.
