އިންޑިއާގެ މަޝްހޫރު ކޮމޭޑިއަން ބާރްތީ ސިންގް އާއި އޭނާގެ ފިރިމީހާ ހަރްޝް ލިމްބާޗިޔާގެ އަލަތު ދަރިފުޅުގެ ނަން ހާމަކޮށްފިއެވެ.
ބާރްތީ އާއި ހަރްޝް، އެމީހުންގެ ދަރިފުޅުގެ ނަން ހާމަކޮށްފައިވަނީ ގޯއާއަށް އެމީހުން ކުރި ދަތުރުގެ ވީޑިއޯއާ އެކުގައެވެ.
ވީޑިއޯގައި ބާރްތީ ބުނެފައި ވަނީ އޭނާގެ ދަރިފުޅުގެ ނަން އެނގެން ގިނަ ފޭނުން ބޭނުންވާ ކަމަށެވެ. އެހެންކަމުން ދަރިފުޅުގެ ނަން ހާމަކުރަމުން އޭނާ ބުނީ ދަރިފުޅަށް ކިޔަނީ ލަކްޝް ކަމަށެވެ.
އިންޑިއާގެ އެންމެ ކާމިޔާބު ކޮމޭޑިއަނުންގެ ތެރޭގައި ހިމެނޭ ބާރްތީއަށް ފިރިހެން ކުއްޖެއް ލިބުނުކަން އިއުލަން ކުރީ އޭޕްރިލް މަހުގެ 5 ވަނަދުވަހުއެވެ. އެމީހުން ދަރިފުޅަށް ލޯބިން ކިޔަމުން ދިޔައީ ގޯލާއެވެ.
View this post on Instagram
ބާރްތީ ވިހެއުމުގެ ކުރިން ދިއައީ ރިއަލިޓީ ޓީވީ ޝޯ "ހުނަރުބާޒް"ގެ ހޯސްޓްގެ ގޮތުގައި ހަރަކާތްތެރިވަމުންނެވެ. ދަރިފުޅު ވިހެއުމަށްފަހު 11 ދުވަހުގެ ތެރޭގައި ބާރްތީ އަލުން މަސައްކަތައް ވަނީ ނުކުމެފައެވެ. މިކަމުގެ ސަބަބުން އޭނާއަށް ގިނަބައެއްގެ ފާޑުކިއުންވެސް އަމާޒުވިއެވެ.
ބާރްތީ ބުނެފައިވަނީ އޭނާގެ ދަރިފުޅު ވަރަށް އަވަހަށް މީޑިއާއަށް ދައްކާލާނެ ކަމަށެވެ.
ހަރްޝް އާއި ބާރްތީ ކައިވެނި ކުރީ 2017 ވަނަ އަހަރު ޑިސެމްބަރު މަހު ގޯއާގައެވެ. ބާރްތީ އަކީ އިންޑިއާގެ މަޝްހޫރު ކޮމެޑީ ޝޯ "ދަ ކަޕިލް ޝަރުމާ ޝޯ" އިން ވެސް ފެނިގެންދާ ފަންނާނެކެވެ.
