އެޓާރނީ ޖެނެރަލް އިބްރާހީމް ރިފްއަތާއި ޖުޑީޝަލް ސަރވިސް ކޮމިޝަން(ޖޭއެސްސީ)ގެ ރައީސް ހިސާން ހުސައިނާއި ޤާޟީ އަޙުމަދު ޝަކީލު ކުރީގެ ރައީސް ޔާމީންގެ މައްސަލަ ބައްލަވާ، ކްރިމިނަލް ކޯޓުގެ އިސްގާޒީ އަހުމަދު ޝަކީލްއާ ބައްދަލުކުރެއްވިކަމަށް ބުނެ ދައްކަމުންދާ ވާހަކަ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ދޮގުކުރައްވައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުން، އިސްގާޒީ ޝަކީލްއާ ހަވާލާ ދެއްވައި ނަޝީދު ވިދާޅުވީ، ދަންވަރު ގަޑީގައި ބައްދަލު ކުރެއްވުމުގެ ފުރުސަތެއް އެއްވެސް ބޭފުޅަކަށް ދީފައި ނުވާ ކަމަށެވެ. އަދި ހިސާނާއި ޝަކީލް ބައްދަލުކުރެއްވި ކަމަށް ބުނާ ވާހަކައަކީ ކަނޑައެޅިގެން ދޮގެއް ކަމަށް ކަމަށް ވެސް ނަޝީދު ވިދާޅުވިއެވެ.

އަޅުގަނޑު ވެސް ދެކޭގޮތުގައި މި ބާވަތުގެ ހަގީގަތެއް ނެތް ވާހަކަ ފެތުރުމަކީ އެއްވެސް ފަރާތަކަށް ފައިދާ ހުރި މަސްލަހަތެއް ނޫން.

– ރައީސް ނަޝީދު ވިދާޅުވިއެވެ.

އިސްގާޒީ ޝަކީލާއި ހިސާންގެ އިތުރުން އެ ކޮމިޝަންގެ މެމްބަރެއް ކަމަށްވާ އެޓާނީ ޖެނެރަލް އިބްރާހިމް ރިފްއަތު ދަންވަރުގެ ވަގުތެއްގައި ޖޭއެސްސީގައި ބައްދަލު ކުރެއްވި ކަމަށް ބުނެ މީޑިއާއަކުން ވަނީ ޓްވީޓު ކޮށްފައެވެ. ޝަކީލަކީ ކްރިމިނަލް ކޯޓުގައި ޔާމީންގެ މައްޗަށް އުފުލާފައިވާ ހުރިހާ މައްސަލަތަކެއް ވެސް ބައްލަވާ ފަނޑިޔާރެވެ.

މިވާހަކަތައް ދޮގުކުރައްވައި ޖޭއެސްސީން ކުރެއްވި ޓުވީޓެއްގައި ވިދާޅުވީ ކްރިމިނަލް ކޯޓުގައި މިހާރު ކުރިޔަށްދާ، ކުރީގެ ރައީސް ޔާމީނުގެ މައްސަލަ ބައްލަވާ އިސް ޤާޒީއާއި އެކޮމިޝަނުގެ ރައީސް ޙިސާން ހުސައިނާއި އެޓާރނީ ޖެނެރަލް އިބްރާހީމް ރިފްއަތު ބައްދަލުކުރެއްވިކަމަށްބުނެ ބައެއް މީޑިއާއަކުން ފަތުރަމުންދާ ވާހަކަތަކަކީ ހަގީގަތާ ޚިލާފު ދޮގެއްކަމަށެވެ. އަދި މިފަދަ ހަގީގަތެއް ނެތް ވާހަކައެއް ފެތުރި މައްސަލަ ކަމާބެހޭ ފަރާތްތަކަށް ހުށައަޅާނެކަމަށްވެސް ޖޭއެސްސީން ވިދާޅުވެއެވެ.