ފްރާންސްގެ ޗެމްޕިއަން ޕީއެސްޖީގެ ކޯޗުކަމަށް ޒިނެދިން ޒިދާން ހަމަޖައްސަން މަޝްވަރާތައް ކުރަމުން އަންނަ ކަމަށް މީޑިއާ ރިޕޯޓްތައް ބުނެފިއެވެ.
ނިމިދިޔަ ސީޒަނުގައި ޕީއެސްޖީ އަށް ޗެމްޕިއަންސް ލީގުގައި އެކަށީގެންވާ ނަތީޖާއެއް ނުނެރެވި، ދެ ވަނަ ބުރުން ކެޓި ހިސާބުން ޕީއެސްޖީގެ ކޯޗު މައުރީސީއޯ ޕޮޗެޓީނޯ އަށް ޕީއެސްޖީގެ ކޯޗުކަމުގައި ދެމިނުހުރެވޭނެ ކަމަށް މީޑިއާގައި ވަނީ އަޑުފެތުރެން ފަށައިފައެވެ.
ޕީއެސްޖީން އެ ކްލަބްގެ ތަރި، ކީލިއަން އެމްބާޕޭ އަށް ގިނަ ބާރުތަކެއް ލިބޭ ގޮތަށް އެ ކްލަބާ އެކު ހަދާފައިވާ ކޮންޓްރެކްޓް އާ ކުރިއިރު، އޭނާ އެދެނީ ޕީއެސްޖީގެ ކޯޗުކަމަށް ޒިދާން ގެންނަން ކަމަށް މީޑިއާ ރިޕޯޓްތައް ބުނެއެވެ.
ފްރާންސްގެ ލެކިއުޕޭ ނޫހަށް، ފްރާންސް ފުޓްބޯޅަ ފެޑެރޭޝަންގެ ރައީސް ނޮއެލް ލެ ގްރައެޓް ދެއްވި އިންޓަވިއުއެއްގައި ވިދާޅުވީ ޕީއެސްޖީގެ ކޯޗެއްގެ ގޮތުގައި ޒިދާން ފެނުމުގެ ފުރުސަތު އެބައޮތް ކަމަށެވެ. މީގެ އިތުރުން ޕީއެސްޖީގެ ކޯޗަކަށް ޒިދާން ހަމަޖައްސަން ބޭނުންވާކަމަށް ފްރާންސްގެ ރައީސް އެމަނުއެލް މެކްރޯން ވެސް ވަނީ ވިދާޅުވެފައެވެ.
މެކްރޯން ވިދާޅުވީ ކުޅުންތެރިއެއް އަދި ކޯޗެއްގެ ގޮތުގައިވެސް އޭނާ ޒިދާން އަށް ވަރަށް ބޮޑަށް ސަޕޯޓު ކުރައްވާ ކަމަށެވެ. އަދި ރެއާލާއެކު ޒިދާން ހޯދައިފައިވާ ކާމިޔާބީތައް ފާހަގަކުރައްވާ މެކްރޯން ވިދާޅުވީ ޕީއެސްޖީގެ ވެސް އެންމެ ބޮޑު އަމާޒަކީ ޔޫރަޕުގެ އެންމެ ބޮޑު ތަށި ކާމިޔާބުކުރުން ކަމަށެވެ. ކޯޗިންގް ކެރިއަރު ރެއާލުން ފެށި ޒިދާން ވަނީ އެ ކްލަބުގެ ހެޑް ކޯޗުގެ ގޮތުގައި ޖެހިޖެހިގެން ތިން ފަހަރު ޗެމްޕިއަންސް ލީގު ކާމިޔާބުކޮށްފައެވެ.
ޕީއެސްޖީގެ ކޯޗުކަމުގައި ހުރި ޕޮޗެޓީނޯގެ ކޮންޓްރެކްޓްގައި ބާކީ އެއް އަހަރު އޮތް ނަމަވެސް ރިޕޯޓްތައް ބުނާގޮތުން އޭނާ މަގާމުން ވަކިކުރަން ވަނީ ނިންމައިފައެވެ. ޕޮޗެޓީނޯގެ އަމިއްލަ އިންސްޓަގްރާމް މެދުވެރިކޮށް ޕީއެސްޖީ ކުޅުންތެރިއެއްގެ ގޮތުގައި މީގެ ކުރިން ކުޅުނު މެޗުތަކުގެ ފޮޓޯތައް ހިއްސާކުރަމުން އަންނައިރު، ރިޕޯޓްތައް ބުނާގޮތުން ޕޮޗެޓީނޯ އެ ޕޯސްޓްތައް ކުރަން ފެށީ ޕީއެސްޖީން އޭނާ ވަކިކުރާނެކަން ޔަގީންވެފައިވާތީއެވެ.
