ސިޔާސީ ޕާޓީތަކަށް ނިސްބަތްވާ މެމްބަރުންނަށް ނޭގި ޕާޓީ ބަދަލުކޮށް، އޮޅުވާލައިގެން މީހުން ވައްދާ މައްސަލާގައި އިލެކްޝަން ކޮމިޝަނުން ހާމަކޮށްފައިވާ މައުލޫމާތު ތަކާއި ގުޅިގެން އިދިކޮޅު ޕީޕީއެމްގެ ގިނަ ސުވާލުތަކެއް އިލެކްޝަނަށް ކުރިމަތި ކޮށްފިއެވެ.
ސިޔާސީ ޕާޓީތަކަށް ނިސްބަތްވާ މެމްބަރުންނަށް ނޭގި ޕާޓީ ބަދަލުކޮށް، އޮޅުވާލައިގެން އެންމެ ގިނަ ޢަދަދަށް މެންބަރުން ވައްދާފައިވަނީ އިދިކޮޅު މައި ޕާޓީ ޕީޕީއެމްއަށް ކަމަށް އިލެކްޝަންސް ކޮމިޝަނުން އާންމުކުރި ފަތާސް ހިސާބުތަކުން ދައްކައެވެ. މިކަމާއިގުޅިގެން ޕީޕީއެމްއުން ބުނެފައިވަނީ މިއީ ސަރުކާރުން ސިދާ ނުފޫޒު ފޯރުވައިގެން ޕީ.ޕީ.އެމް ބަދުނާމުކުރުމަށް އިލެކްޝަންސް ކޮމިޝަނުން ދައްކަމުން ގެންދާ ވާހަކަތަކެއް ކަމަށެވެ.
2021 އޮކްޓޯބަރ 1 އިން ފެށިގެން ޕީ.ޕީ.އެމް ގެ 5000 އަށް ވުރެ ގިނަ މެންބަރުން ވަގަށް ނަގާ އެހެން ޕާޓީތަކަށް ބަދަލުކޮށްފައިވާ މައްސަލަ އިލެކްޝަންސް ކޮމިޝަނާއި ރައްޔިތުންގެ ސަމާލުކަމަށް މި ކޯލިޝަންގެ ފަރާތުން ގެނެސް އެކަމުގައި އިންސާފު ހޯދުމަށް މި ކޯލިޝަނުން ކުރަމުން ގެންދާ މަސައްކަތަށް ހުރަސް އަޅާ، އެވާހަކައިގެ މިސްރާބު އެހެން ދިމާއަކަށް އަނބުރާލުމަށް ސަރުކާރުން އަންގައިގެން އިލެކްޝަންސް ކޮމިޝަނުން މަސައްކަތް ކުރުމަކީ އެކޯލިޝަނުން އިންތިހާއަށް ކަންބޮޑުވާ ކަމެއްކަމަށް ވަނީ ބުނެފައެވެ.
2018 އިން 2022 އާއި ދެމެދު 391 ވަގު ފޯމު ޕީ.ޕީ.އެމް ގެ ފަރާތުން އިލެކްޝަންސް ކޮމިޝަނަށް ވައްދާފައިވާ ކަމަށް އިލެކްޝަންސް ކޮމިޝަނުން ބުނަމުން ގެންދަނީ ކިހާވަރަކަށް ބައްލަވާފަތޯ؟ އެއީ ކޮން އަސާސެއްގެ މައްޗަށް ބުރަވެ ދައްކާ ވާހަކައެއްތޯ؟ އަދި އެއީ 2018 އިން 2022 އަށް ހުށަހަޅާފައިވާ ފޯމުތަކުން ނަގާފައިވާ ޢަދަދުތަކެއްތޯ؟ މި ޢަދަދު ހާމަކޮށްފައި އެވަނީ އެކަމުގެ ޖިނާޢީ ތަޙުޤީޤެއް ހިންގުމަށް ފަހުތޯ؟ ނުވަތަ އެފަރާތްތަކުގެ ފިނގަރޕްރިންޓް ވެރިފައި ކުރުމަށްފަހުތޯ؟
– ޕީޕީއެމްއިން ކުރި ސުވާލުތަކުގައި ވެއެވެ.
ޕީޕީއެމްއިން ވަނީ މި މަޢުލޫމާތުތައް ދިވެހި ރައްޔިތުންނަށް ހާމަކޮށްދިނުމަށް އިލެކްޝަންސް ކޮމިޝަނަށް ގޮވާލާފައެވެ. ހަމަ އެއާއެކު 2018 އިން 2022 އަށް ޕީ.ޕީ.އެމް އިން 391 ވަގު ފޯމު ހުށަހަޅާފައިވާކަމަށް އިލެކްޝަންސް އިން ބުނާއިރު، އެމީހުންގެ މަޢުލޫމާތާއި އެމީހުން ހުށަހަޅާފައިވާ ޝަކުވާތައް ޕީ.ޕީއެމް އަށް ފޮނުވާދިނުމަށްވެސް ވަނީ ގޮވާލާފައެވެ.
ޕާޓީތަކުގެ މެންބަރުން ވަގަށް އެހެން ޕާޓީތަކަށް ވައްދާކަން އިލެކްޝަންސް ކޮމިޝަންގެ ސަމާލުކަމަށް ގެނެސް އެކަން ޙައްލު ކުރުމަށް އިލެކްޝަންސް ކޮމިޝަނަށް އެއްބާރުލުން ދީ އެންމެ ބޮޑު މަސައްކަތެއް ކުރާ ޕާޓީއާއި މެދު ޒާތީވެ ބަދުނާމު ކުރަން ފަށާފައި މިވަނީ މިކަމުގެ ޙަޤީޤަތް ރައްޔިތުންނަށް އޮޅުވާލުމަށް ސަރުކާރުން އަންގައިގެން ކަމަށް ވަނީ ބުނެފައެވެ.
އަދި އެއީ 2023 ގައި ބާއްވާ ރިޔާސީ އިންތިޚާބު ވަގަށް ނެގުމަށް ސަރުކާރާއި ސަރުކާރާ ވާގިވެރިވާ ފަރާތްތައް ރުއްސުމުގެ ޢަމަލެއް ކަމުގައިވެސް ބެލެވޭކަމަށް އެޕާޓީން ވަނީ ބުނެފައެވެ. ޕީ.ޕީ.އެމް ގެ މެންބަރުން ވަގަށް ނަގާފައިވާ މައްސަލައިގެ ޖިނާޢީ ތަޙުޤީޤެއް ހިންގައި، ވަގަށް ނަގާފައިވާ ޕީ.ޕީ.އެމް ގެ މެންބަރުން އިތުރު ފޯމެއް ފުރުމެއް ނެތި، އަނބުރާ ޕީ.ޕީ.އެމްގެ ދަފްތަރުގައި ހިމަނައިދިނުމަށް އިލެކްޝަނސް ކޮމިޝަންގައި އެކޯލިޝަނުން ވަނީ އެދިފައެވެ.
