ރާއްޖޭގައި އިންސާނީ ވަޞީލަތް ތަރައްޤީކުރުންފަދަ ތަރައްޤީގެ ރޮނގުން ރާއްޖެއަށް މުހިންމު ދާއިރާތަކުން އެހީތެރިކަން ފޯރުކޮށްދިނުމުގައި އިނގިރޭސިވިލާތުން ވަރަށް ބޮޑު އަހަންމިއްޔަތުކަމެއް ދެއްވާކަމަށް ރައީސުލްޖުމްހޫރިއްޔާގެ ނައިބު ފައިޞަލް ނަސީމު ވިދާޅުވެއްޖެއެވެ.
އިނގިރޭސިވިލާތުގެ ރާނީގެ "ޕްލެޓިނަމް ޖުބިލީ"ގެ މުނާޞަބާ ފާހަގަކުރުމަށް އިއްޔެ މީރުމާ ކޮންފަރެންސް ހޯލްގައި ބޭއްވި ޚާއްޞަ ޙަފްލާ ޝަރަފުވެރިކޮށްދެއްވައި ވާހަކަފުޅު ދައްކަވަމުން ނައިބު ރައީސް ފައިޞަލް ވިދާޅުވީ އިނގިރޭސި ވިލާތުން ރާއްޖެއަށް ގިނަ ދާއިރާތަކުން އެއްބާރުލުންދެމުން ގެންދާކަމަށެވެ. އެގޮތުން ރާއްޖޭގެ ހިންގުން ހަރުދަނާ ކުރުމާއި، ޝަރުޢީ ދާއިރާ އިޞްލާޙު ކުރުމާއި، ތިމާވެށި ރައްކާތެރި ކުރުމާއި، ދެމެހެއްޓެނިވި ތަރައްޤީއާއި، ދިފާޢީ ދާއިރާ އަދި ވަކިން ޚާއްޞަކޮށް ތަޖުރިބާ ބަދަލުކުރުމާއި، ތަމްރީނު ޕްރޮގްރާމްތައް އިތުރުކޮށް ސަލާމަތީ އިދާރާތަކުގެ މެދުގައި ގުޅުން ބަދަހިވަމުން އަންނަކަމުގައި ނައިބު ރައީސް ވިދާޅުވިއެވެ.
މީގެ އިތުރުން ޗެވްނިންގ ސްކޮލަރޝިޕާއި، ކޮމަންވެލްތު ސްކޮލަރޝިޕް ސްކީމް ފަދަ ޕްރޮގްރާމްތަކަކީ، ރާއްޖޭގެ އިޤްތިޞާދުގެ ގާތްގަނޑަކަށް ހުރިހާ ދާއިރާއެއްގައިވެސް، އެ ދާއިރާތަކުގައި އެންމެ ކުރީ ސަފުގައި ޙަރަކާތްތެރިވާ ހުނަރުވެރި، ޤާބިލު މަސައްކަތްތެރި ބަޔަކު ބިނާކުރުމަށް ވަރަށް ބޮޑު އެހީތެރިކަމެއް ފޯރުކޮށްދިން ޕްރޮގްރާމްތަކެއްކަން އެމަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި ކަނޑުގެ ދިރުންތައް ހިމާޔަތްކުރުންފަދަ ދާއިރާތަކުގައި ރާއްޖެއާއި އިނގިރޭސިވިލާތަކީ ގިނަ އެއްގޮތް ކަންތައްތަކެއް ޙިއްޞާކުރާ ދެ ޤައުމުކަން ފާހަގަކުރެއްވިއެވެ. އަދި، އިނގިރޭސިވިލާތަކީ ރާއްޖޭގެ މަސްވެރިކަމުގެ އުފެއްދުންތައް އެންމެ ގިނައިން އެކްސްޕޯޓް ކުރާ އެއް ޤައުމުކަންވެސް އެމަނިކުފާނު ފާހަގަ ކުރެއްވި އެވެ.
އިނގިރޭސި ރާނީގެ "ޕްލެޓިނަމް ޖުބިލީ"ގެ މުނާޞަބާގައި ނައިބު ރައީސް ވަނީ އިނގިރޭސި ވިލާތުގެ ރާނީއަށް ތަހުނިޔާ ވިދާޅުވެ އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ފަރާތްޕުޅުން ވެސް ރާނީގެ އުފަންދުވަހުގެ ހެޔޮއެދުންތައް ފޮނުއްވާފައެވެ. މީގެ އިތުރުން، މީގެ 50 އަހަރު ކުރިން 13 މާރިޗު 1972 ގައި އިނގިރޭސި ވިލާތުގެ ރާނީ އެލިޒަބަތު 2 ރާއްޖެއަށް ކުރެއްވި ދަތުރުފުޅުގެ މައްޗަށް ނައިބު ރައީސް ވަނީ އަލިއަޅުއްވާލައްވާފައެވެ.
