ޖުޑިޝަލް ސާވިސް ކޮމިޝަން (ޖޭއެސްސީ) ގެ އެކުލެވުން ބަދަލުވާ ގޮތަށް ގާނޫނު އަސާސީއަށް އިސްލާހު ގެނައުމުގެ ބިލު އަނެއްކާވެސް މަޖިލީހަށް ހުށައަޅައިފިއެވެ.
މި ބިލު މަޖިލީހަށް ހުށައެޅުއްވީ މަހިބަދޫ ދާއިރާގެ މެންބަރު އަޙްމަދު ޠާރިޤް (ޓޮމް)އެވެ. މީގެ ކުރިންވެސް މި ބިލު މަޖިލީހަށް ހުށައެޅިއެވެ. ނަމަވެސް އެ ބިލު ވަނީ މަޖިލީހުން ބަލައި ނުގަނެ ބޭރުކޮށްލާފައެވެ. ޓޮމް ވިދާލުވީ ޖޭއެސްސީ އެކުލެވިގެންވާގޮތް ބަދަލުކުރުމަކީ ރައީސް ޞާލިޙްގެ ވައުދުފުޅެއްކަމަށާއި، އެ ވަޢުދުފުޅު ފުއްދަންވާނެކަމަށެވެ. އެހެންކަމުން ޖޭއެސްސީ އެކުލެވިގެންވާގޮތް ބަދަލުކުރުމުގެ ބިލު އަނެއްކާވެސް މަޖިލީހަށް ހުށައަޅާފައިވާކަމަށެވެ.
ޖޭއެސްސީ އެކުލަވާލުމަށް ރައީސް ސޯލިހު ވިދާޅުވި ވައުދުތައް ހިމެނޭ ބިލް، އަނެއްކާވެސް މަޖިލީހަށް ހުށަހަޅައިފިން. ރައްޔިތުންނަށްވެފައިވާ ވައުދުތައް ފުއްދަވަންވާނެ. @ibusolih @MohamedNasheed @prz_ymn pic.twitter.com/SQc2XW80GB
— Ahmed Thariq (@AhmedThaariq) June 4, 2022
ޓޮމް ހުށަހެޅުއްވި ބިލުގައި އޮތް ގޮތުން، ޖޭއެސްސީގައި ސިޔާސީ ހަތަރު ބޭފުޅުންނެއް ނުތިއްބަވާނެއެވެ. އޭގައިވާ ގޮތުން، ޖޭއެސްސީގައި ތިއްބަވަނީ އުއްތަމަ ފަނޑިޔާރާއި، މިހާރު ވެސް އޮންނަ ގޮތަށް ހައި ކޯޓުން އިންތިޚާބު ކުރާ ފަނޑިޔާރަކާއި، ދަށު ކޯޓުން އިންތިޚާބު ކުރާ ފަނޑިޔާރަކާއި، ވަކީލުން އިންތިޚާބު ކުރާ ވަކީލެކެވެ.
މިބަލަށް މީގެ ކުރިން މަޖިލީހުގައި މެމްބަރުން ދެއްކެވިވާހަތަކަށް ބަލައި ރައީސް ނަޝީދު ވިދާޅުވީ މަޖިލީހުގެ ރައީސް އަކީ ދައުލަތުގެ އެއްބާރު ކަމަށްވެފައި މަޖިލީހުގެ ރައީސް ޖޭއެސްސީގައި އިންނެވުމަކީ ނިޒާމުގެ އުނި ކަމެއް ކަމަށެވެ. އެހެންނަމަވެސް މަޖިލީހުގެ މެމްބަރަކު ޖޭއެސްސީގައި އިންނެވުމަކީ އެތަނަށް ސިޔާސީ ބާރުވެރިކަން ފޯރުވަންޖެހޭ މިންވަރަށް ފޯރުމަށް ބޭނުންތެރިކަމެއް ކަމަށް ދެކެވަޑައިގަންނަވާ ކަމަށެވެ.
ޖޭއެސްސީގެ މައިގަނޑު މަސައްކަތަކީ ފަނޑިޔާރުންގެ މައްސަލަތައް ބެލުން ކަމުގައިވާއިރު އެ ކޮމިޝަންގައި ގިނަ އަދަދެއްގެ ފަނޑިޔާރުން ތަމްސީލްވާން ތިބުމަކީ މަސްލަހަތު ފުށު އަރާނެ ކަމެއްގެ ގޮތުގައި ނަޝީދު ސިފަ ކުރެއްވިއެވެ. ބަންޑާރަ ނައިބާއި އެކު ރައީސްގެ މެންބަރަކު ވެސް އިންނަވާނަމަ، އެ ކޮމިޝަންގައި ރައީސްގެ ދެ މެންބަރަކު ތިއްބަވާ ކަމަށް ބެލެވެން އެބަ އޮތް ކަމަށް ނަޝީދު ވިދާޅުވިއެވެ. އެހެންވެ އިތުރު މެންބަރަކު އިންނަވަން ޖެހޭ ސަބަބެއް ވިސްނިވަޑައިނުގަންނަވާ ކަމަށް އެމަނިކުފާނު ވިދާޅުވިއެވެ.
ސިޔާސީ ބޭފުޅުންނަކީ ސީދާ ރައްޔިތުން އިންތިހާބު ކުރާ ބައެއް ކަމަށް ފާހަގަކުރައްވަމުން ނަޝީދު ވިދާޅުވި އެއިރެއްގައި ރައްޔިތުންގެ ވިންދު ހުރި ގޮތް ތަމްސީލުކުރުމަށް މަޖިލީހުގެ މެމްބަރުން ނޫން ބައެއް ނެތް ކަމަށެވެ.
އޭގެ އިތުރުން މިހާރު ނެތް ދެ މެންބަރަކު ހިމަނަން ބިލުގައި އޮތެވެ. އެއީ ސިޔާސީ ބޭފުޅުންގެ ބަދަލުގައި، ގައުމީ ފަންނު ފިޔަވައި އެހެން ފަންނުތަކުގެ ތަޖުރިބާކާރުންގެ ތެރެއިން މަޖިލީހުން ރުހުންދޭ ތަޖުރިބާކާރަކާއި، ޝަރީއާ މުދައްރިސުންގެ ތެރެއިން މުދައްރިސެކެވެ.
ޖޭއެސްސީ އިޞްލާހުކުރުމަށް ސަރުކާރުގެ ފަރާތުންވެސް ބިލެއް ހުށައަޅަން ނިންމާފައިވާއިރު، އޭޖީ އޮފީހުން ވަނީ އެ ބިލު ރައީސް އޮފީހަށް ހުށައަޅުއްވާފައެވެ.
