ދިވެހިރާއްޖޭގެ ކުޅިވަރާބެހޭ ޤާނޫނަށް ހެންވޭރު ހުޅަނގު ދާއިރާގެ މެމްބަރު އެމްޑީޕީގެ ޗެއާޕާސަން ހަސަން ލަތީފް ހުށަހަޅުއްވާފައިވާ އިސްލާހުގައި ލާމަރުކަޒީ ޤާނޫނާއި ފުށުއަރާ ގިނަ އިސްލާހުތަކެއް ވަނީ ހުށަހަޅާފައެވެ.
ލާމަރުކަޒީ އުސޫލުން ރާއްޖޭގެ އިދާރީ ދާއިރާތައް ހިންގުމަށްޓަކައި ކައުންސިލްތަކަށް ބޮޑެތި ބާރުތަކެއް ލިބިދޭގޮތަށް ރައްޔިތުންގެ މަޖިލީހުން ލާމަރުކަޒީ ޤާނޫނަށް ގެނައި އިސްލާހުތަކާއިއެކު ފާސްކުރި ގާނޫނު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ތަސްދީޤު ކުރައްވާފައިވަނީ 2019 ވަނަ އަހަރުގެ ޑިސެމްބަރު މަހުގެ 15 ވަނަ ދުވަހުގައެވެ.
ޤާނޫނަށް ގެނައި އިސްލާހުތަކާއިއެކު ކައުންސިލްތަކަށް ބޮޑެތި ބާރުތަކާއި އިޅްތިޔާރުތަކެއް ލިބިގެންވެއެވެ. އެގޮތުން ރަށުގެ އިޙްތިޞާސްގެ ތެރޭގައި ހިމެނޭ ވަސީލަތްތަކުން ލިބޭ އާމްދަނީގެ 40 އިންސައްތަ ކައުންސިލްތަކަށް ލިބުމާއި، މުނިސިޕަލް ޚިދުމަތްތަކުން ލިބޭ އާމްދަނީ އެއްްކޮށް ކައުންސިލްތަކަށް ދިނުން ހިމެނެއެވެ. އަދި ދައުލަތުގެ ބަޖެޓުގައި ހިމެނޭ ޑޮމެސްޓިކް ބަޖެޓުގެ 5 އިންސައްތަ ކައުންސިލްތަކަށް ދިނުމަށްވެސް މަޖިލީހުން ވަނީ ފާސްކޮށްފައެވެ. އަދި ކައުންސިލްތަކަށް ރަށްރަށުގެ ބިންތަކާއި، ފަޅާއި، ރަށްރަށުގެ އިޚްތިޞާސްގެ ތެރޭގައި ކަނޑައަޅާފައިވާ ތަންތަން ބެލެހެއްޓުމުގެ ޒިންމާވަނީ ޤާނޫނުން ކައުންސިލްތަކާއި މަތިކޮށްފައެވެ.
ނަމަވެސް ދާދިފަހުން އެމްޑީޕީގެ ޗެއާޕާސަން މަޖިލީހަށް ހުށަހެޅުއްވި ކުޅިވަރުގެ ޤާނޫނުގައި ރަށްރަށުގައި ހުންނަ ކުޅިވަރު ބިންތަކާއި، ކުޅިވަރު ވަސީލަތްތަކުގެ ބާރުވެރިކަން ކައުންސުލްތަކުން ނެގޭ ގޮތަށް ވަނީ ޤާނޫނަށް އިސްލާހު ހުށަހަޅާފައެވެ. ލާމަރުކަޒީ ޤާނޫނުން ބާރުދީފައިވާ ކަންތައްތަކެއް އެހެން ޤާނޫނަކުން ނެގުމަށް މަސައްކަތް ކުރުމަކީ ވަރަށް ޒިންމާދާރުކަން ކުޑަ ގޮތެއްކަމަށް އިދިކޮޅު ޕީޕީއެމްގެ މެމްބަރުން ވަނީ ވިދާޅުވެފައެވެ. މިހާރުވެސް ރަށްރަށުގައި ޔޫތު މިނިސްޓްރީގެ ބެލުމުގެ ދަށުގައު ހުންނަ ކުޅިވަރު ބިންތަކާއި ވަސީލަތްތައް އެންމެ އެކަށީގެންވާ ގޮތަށް ނުބެލެއްޓި ވީރާނާވުމުގެ ޝަކުވާއަކީ ބޮޑު ޝަކުއެކެވެ. ދަނޑެއްގެ ލައިޓެއް އެދިޔަސް، ބޯޅައެއް ނެތިގެން ރިކުއެސްޓު ކުރިއަސް އޮންނަ އުސޫލުގެ ތެރެއިން އެތަކެތި ލިބުމުގައި ހުރި ދަތިކަމަކީ ލާމަރުކަޒީ އުސޫލުން ކައުންސިލްތަކަށް އެބާރުތައް ދިން އެންމެބޮޑު ސަބަބެވެ.
ކުޅިވަރު ޤާނޫނަށް ހުށަހަޅާފައިވާ އިސްލާހު ތަކުގެ ތެރޭގައި ރަށްރަށުގެ ކުޅިވަރު ބިންތަކާއި ކުޅިވަރު ވަސީލަތްތައް ބެލެހެއްޓުމުގެ ޒިންމާ އަނެއްކާވެސް މަތިކުރަނީ މައި ސަރުކާރު އޮތް ފުރަމާލޭގައި އެކުލަވާލެވިފައިވާ "ސްޕޯޓްސް ކޯޕަރޭޝަން" އަށެވެ. ކުޅިވަރު ގާނޫނަށް ހަސަން ލަތީފް ހުށައެޅުއްވި އިސްލާޙުތަކުގެ ތެރޭގައި ސްޕޯޓްސް ކޯޕަރޭޝަންގެ ދައުުރު ބޮޑުކޮށް، ކުޅިވަރު ބިންތަށް އެކޯޕަރޭޝަން ދަށަށް ބަދަލުކޮށް، ވިޔަފާރި އުސޫލުން އެބިންތައް ހިންގުން ހިމެނެއެވެ.
ހަސަން ލަތީފް ވިދާޅުވީ ކުޅިވަރު ބިންތަކުން ފައިސާ ހޯދައިގެން ހިންގަން ޖެހޭކަމަށާއި، އަދި ސަރުކާރަށް ބުރަނުވާގޮތަށް އެސޯސިއޭޝަންތައް ހިންގަން ފެށުމުން، ކުޅިވަރުވެސް އިތުރަށް ތަރައްގީވެ، އެސޯސިއޭޝަންތަކުގެ ހިންގުންވެސް ހަރުދަނާވެގެންދާނެކަމަށް ހަސަން ލަޠީފް ވިދާޅުވިއެއްވެ. ޤާނޫނަށް ހުށަހެޅުއްވާފައިވާ އިސްލާހުތަކާއިމެދު ރާއްޖޭގެ ކުޅިވަރު ހުރިހާ އެސޯސިއޭޝަނަކުން ކަންބޮޑުވުން ފާޅުކޮށްފައިވާއިރު މިއިން އެއްވެސް އެސޯސިއޭޝަނަކާއި މަޝްވަރާކޮށް ބައްދަލުކޮށްފައި ނުވާއިރު، ހަަން ވަނީ ދާދިފަހުން ސްޕޕޯޓްސް ކޯޕަރޭޝަނާއި ބައްދަލުކޮށް މި އިސްލާހުތަކުގެ މަޝްވަރާ ކުރައްވާފައެވެ.
Sports Act ah MP, @HassanLatheef husha halhuvafaivaa islaahu thakaa gulhey gothunnai, kunfuneege farathun Sports Act ah hushahelhumah mashvara kurevey amendments thakaai gulhey gothun mashvara kurun. pic.twitter.com/Pc46dCWjQn
— SportsCo MV (@sportscomv) November 10, 2020
ކުޅިވަރުގައި ގިނަ ދުވަހު ހަރަކާތްތެރިވި އަދި މިހާރުވެސް ޚިދުމަތުގައި ތިއްބެވި ބޭފުޅުން ވިދާޅުވީ ޤާނޫނަށް މިހާރު ހުށަހަޅާފައިވާ އިސްލާހުތަކަކީ ރާއްޖޭގެ ކުޅިވަރަށް ބޮޑެތި އަސަރުކަތަކެއް ކުރާނެ ވަރަށް ދެރަވަރު އިސްލާހުތަކެއް ކަމަށެވެ. އަދި މިއިސްލާހުތަކުގެ ސަސަބަބުން ޤާނޫނީ ގޮތުން އެއް ޤާނޫނު އަނެއްޤާނޫނު ތަޢާރަޒުވާ އެތައްކަމެއް ހުރިއިރު، މިއީ ޤާނޫނީ ގޮތުންނާއި، ޤާއުމީ ނަޒަރަކުންވެސް ވިސްނާލަން ބުއްދިވެރި އިސްލާހުތަކެއްކަމަށް ކުޅިވަރުގެ ދުވަސްވީ ތަޖުރިބާކާރުން ވިދާޅުވެއެވެ.
