ގިނަ އަދަދެއްގެ ޒުވާނުން މިރޭ ޕީޕީއެމްއާއި ގުޅިއްޖެއެވެ.

މަވެސް ޕީޕީއެމް ނަމުގައި މިރޭ ޕީޕީއެމް އޮފީހުގައި ބޭއްވި ޖަލްސާގައި ޕީޕީއެމްއާއި އަލަށް ގުޅިވަޑައިގެންނެވި ފޯމުތަކާއި ހަވާލުވެ ވަޑައިގެންނެވީ ޕީޕީއެމްގެ ރައީސް އަދި އިދިކޮޅު ލީޑަރު ރައީސް ޔާމީނެވެ. ޕީޕީއެމްއާއި އަލަށް ގުޅުނު މީހުންގެ ތެރޭގައި ގިނަ އަދަދެއްގެ ޒުވާނުން ހިމެނެއެވެ.

އޭގެ ތެރޭގައި 18 އަހަރު ފުރުނު ޒުވާނުންނަށް، މުޅިން އަލަށް ސިޔާސީ ޕާޓީއަކާއި ގުޅުމަށްޓަކައި ޕީޕީއެމްއަށް ސޮއިކުރި ޒުވާނުންވެސް ހިމެނެއެވެ. މީގެ އިތުރުން އެމްއެންޕީއާއި، އެހެން ސިޔާސީ ޕާޓީތަކަށް ނިސްބަތްވާ ޒުވާނުންތަކެއްވެސް ވަނީ މިރޭ ޕީޕީއެމްއާއި ގުޅިފައެވެ.

ޒުވާނުންގެ އިތުރުން އާންމު ގިނަ މެމްބަރުންތަކެއްގެ ފޯމުތަކެއްވެސް މިރޭ ވަނީ ރައީސް ޔަމީނާއި ހަވާލުކޮށްފައެވެ. މިފަހަކަށް އައިސް ޕީޕީއެމްއިން ބާއްވާ ގިނަ ޖަލްސާތަކުގައި އެޕާޓީއާއި ގިނަ އަދަދެއްގެ ޒުވާނުން ދަނީ ގުޅެމުންނެވެ.

ރައީސް ޔާމީން ވަނީ މިރޭގެ ޖަލްސާގައި ދިވެހި ޒުވާނުންނަށް އެމަނިކުފާނު ގެންގުޅުއްވާ ތަސައްވަރާއި، އަދި މިހާތަނަށް ޒުވާނުންނަށް ހޯއްދަވައި ދެއްވި ކުރިއެރުމުގެ ވާހަކަ ދައްކަވާފައެވެ. ނަމަވެސް މިއަދު މިސަރުކާރުން ދިވެހި ޒުވާނުން އެކަހެރިކޮށް، ޒުވާނުންނަށް ވެފައިވާ ވައުދުތައް ބޮލާލާ ޖަހާފައިވާކަމީ ދިވެހި ޒުވާނުން އެކަމުގެ ޖަވާބު ދޭނެކަމަށް ރައީސް ޔާމީން ވަނީ ވިދާޅުވެފައެވެ.