މޯލްޑިވްސް މީޑިއާ ކައުންސިލް (އެމްއެމްސީ)ގެ ރައީސް ޝަހުބާން ފަހުމީ މަގާމުން އިސްތިއުފާ ދެއްވުމަށް ގޮވާލައި އެ ކައުންސިލްގެ ނުވަ މެންބަރުންގެ ސޮޔާއެކު މިއަދު ގަރާރެއް ނެރެފިއެވެ.
އެ ގަރާރުގައި ވަނީ ޝަހުބާންގެ ހިއްސާ އޮންނަ ކުންފުންޏެއްގެ މައްޗަށް ކުރެވޭ މަނީ ލޯންޑަރިންގެ ތުހުމަތުތަކަކީ ރާއްޖޭގެ ބޮޑެތި މީޑިއާތަކާއި ނޫސްވެރިންގެ އިތުރުން މީޑިއާ ކައުންސިލްގެ ގިނަ މެމްބަރުންގެ ކަންބޮޑުވުން އޮތް މައްސަލައެއް ކަމަށެވެ.
ދިވެހި މީޑިއާގެ އަހުލާގީ ހަމަަތައް ކަނޑައަޅައި މީޑިއާގެ ބެލެނިވެރި މުއައްސަސާއެއްގެ އެންމެ އިސްމަގާމުގައި ހުންނެވި ބޭފުޅަކަށް އެ ފަދަ ތުހުމަތުތަކެއް ކުރެވުމުން މުއައްސަސާގެ އަގު ހިފެހެއްޓުމަށް ވެސް ޝަހުބާން އިސްތިއުފާ ދެއްވަން ޖެހޭ ކަމަށް ކައުންސިލްގެ އަޣުލަބިއްޔަތުން ގަބޫލުކުރާ ކަމަށް ގަރާރުގައިވެއެވެ.
ފަނަރަ މެންބަރުން ތިބޭ އެ ކައުންސިލްގެ އަޣުލަބިއްޔަތު މެންބަރުން ޝަހުބާން މަގާމުން އިސްތިއުފާ ދޭން ގޮވާލި ނަމަވެސް, ކައުންސިލްގެ ގާނޫނުގައި އޮންނަ ގޮތުން މެންބަރަކު ވަކި ކުރެވެނީ މަދުވެގެން 10 މެންބަރުންގެ ތާއިދު އޮވެގެންނެވެ.
ބައެއް ގާނޫނީ ބޭފުޅުންގެ ނަޒަރުގައި ޝަހުބާންގެ މަގާމު މިހާރު ވެސް ވަނީ ހުސްވެފަ އެވެ. އެއީ ގާނޫނުގައި ބަޔާން ކުރާ މެންބަރުންގެ ޝަރުތުތަކުގެ ތެރޭގައި މުޖުތަމައުގެ އަހްލާގީ އާންމު މިންގަނޑުގައި އުޅުން ހިމެނޭތީ, އެ ޝަރުތު އޭނާގެ ކިބައިން އުނިވެފައިވާތީއެވެ. ނަމަވެސް މެންބަރު ކަމުގެ ޝަރުތެއް ގެއްލިއްޖެނަމަ ދެން އަމަލު ކުރާނެ ގޮތެއް އެ ގާނޫނުގައި ނެތެވެ. އަދި ކައުންސިލްގެ ރައީސްގެ އިތުބާރު ނެތް މައްސަލަ ގެންދެވޭނެ އުސޫލުތަކެއް ވެސް ގާނޫނުގައި ލިޔެފައެއް ނެތެވެ.
އެމްއެމްސީގެ މެމްބަރުންތަކެއްގެ ގަރާރެއް ނެރުނުއިރު، އެ މެމްބަރުން ވަނީ މިދިޔަ މަހުގެ ފަހުކޮޅު އެ ކައުންސިލުން ބޭއްވި ޖަލްސާއެއްގައި ޝަހުބާން ބައިވެރިވެވަޑައިގަންނަވާތީ އެ ޖަލްސާ ދޫކުރައްވައި ނުކުމެވަޑައިގެންފައެވެ.
ކިންގްސް ފޮރެކްސް ޓްރޭޑިން ކުންފުނިން ގާނޫނާ ހިލާފަށް އިންވެސްޓްމަންޓް ސްކީމެއް ހަދައި އޮޅުވާލައިގެން ގިނަ އަދަދެއްގެ ފައިސާ ހޯދައި އެ ފައިސާ ލޯންޑާކުރާ ކަމުގެ ތުހުމަތުކުރާއިރު އެ ކުންފުނީގެ ހިއްސާދާރުންގެ ތެރޭގައި ހިމެނޭ ޝަހުބާނާއި އޭނާގެ ބޭބެ ފޭދޫ ދާއިރާގެ ކުރީގެ މެމްބަރު އަލްހާން ފަހުމީ ހިމެނެއެވެ. ޝަހުބާންގެ މައްޗަށް މަނީ ލޯންޑްރިންގެ ތުހުމަތުކުރެވު ނަމަވެސް އޭނާ އެ ތުހުމަތުތައް ދޮގުކުރައްވައެވެ.
