ކުރީގެ ރައީސް މުހައްމަދު ނަޝީދަށް ދިން ނުރައްކާތެރި ހަމަލާއަށްފަހު އެމަނިކުފާނަށާއި، އެމަނިކުފާނު ގެކޮޅަށް ސަރުކާރުން ހަމަޖައްސާފައިވާ އެންމެ މަތީ ސެކިއުރިޓީއާއިމެދު އެމްޑީޕީގެ އިސްބޭފުޅުންތަކެއް ސުވާލު އުފައްދައިފިއެވެ.

ރައީސް ނަޝީދަށް ދީފައިވާ ސެކިއުރިޓީއާއި މެދު ސުވާލު އުފައްދާފައިވަނީ އެމަނިކުފާނު ކޮންމެ ދުވަހަކުހެން ވަޑައިގަންނަވާ އަމިއްލަ ގެކޮޅު ގ.ކެނެރީގޭގެ ފާރުގައި "އިންޑިއާ އައުޓް" ލިޔެފައިވާތީ އެކަމުގެ ކަންބޮޑުވުން ފާޅުކޮށް ކުރެއްވި ޓުވީޓުތަކުގައެވެ. މިކަމާއި ގުޅިގެން ކަންބޮޑުވުން ފާޅުކޮށް، އެމްޑީޕީގެ ޕާލިމަންޓްރީ ގްރޫޕްގެ މެމްބަރު މުހައްމަދު ވަހީދު ވިދާޅުވީ، ރައީސް ނަޝީދަށް ހަމަލާދިނީ ކެނެރީގޭ ގޯޅީގައި ސައިކަލެއް ބަހައްޓަކައިގެން ކަމަށެވެ.

ރައީސް ނަޝީދަށް ހަމަލާ ދިންފަހުން ކެނެރީ ގޯޅިއަކީ ސެކިއުޓީ ވަރުގަދަ ކޮށްފައިވާ ގޯޅިއަކަށް ވީނަމަވެސް ރޭގައިވަނީ ކެނެރީގޭގެ ފާރުގައި "އިންޑިއާ އައުޓް" ލިޔެފައެވެ. ވައްޑެ ވިދާޅުވީ މިއީ އެންމެ މަތީ ސެކިއުރިޓީ ދީން ބަލަހައްޓާ ތަންތަނަށްވާއިރު މިކަންކަމާމެދު ސުވާލު އުފެދޭ ކަމަށެވެ.

ކުރިން ގޯޅިގަނޑު ކޮޅުގައި ބެހެއްޓީ ބޮން ހަރުކޮށްފައި ހުރި ސައިކަލެއް. މިއަދު ގޭ ފާރުގައި ބަޔަކު ގޮސް އެލިޔުނީ. މިއީ އެކަމު އެންމެ މަތީ ސެކިޔުރިޓީ ދީގެން އެންމެ ރަގަޅަށް ބަލަހައްޓާ އެއް ތަން ދެއްތޯ.

– ވައްޑެ ވިދާޅުވިއެވެ.

ކުރިން ގޯޅިގަނޑު ކޮޅުގައި ބެހެއްޓީ ބޮން ހަރުކޮށްފައި ހުރި ސައިކަލެއް. މިއަދު ގޭ ފާރުގައި ބަޔަކު ގޮސް އެލިޔުނީ.
މިއީ އެކަމު އެންމެ މަތީ ސެކިޔުރިޓީ ދީގެން އެންމެ ރަގަޅަށް ބަލަހައްޓާ އެއް ތަން ދެއްތޯ؟ @MNDF_Official @PoliceMv https://t.co/EAFTiwvSTx

— Waddey (@waddey_) May 31, 2022

ނަޝީދުގެ ސެކިއުރިޓީއާއިމެދު ސުވާލު އުފައްދައި ޤައުމީ އެއާލައިން މޯލްޑިވިއަންގެ ޑެޕިއުޓީ މެނޭޖިން ޑިރެކްޓަރު އައިޝަތު ޖެނިފާ ވިދާޅުވީ މިހާރު އެލަޓް ލެވެލް ހުރީ ކޮން ހިސާބަކު ކަމާއުމެދު ސުވާލު އުފެދޭކަމަށެވެ. އަދި ރައީސް ނަޝީދުގެ ގެކޮޅުގެ ފާރުގައި ބޭނުން އެއްޗެއް ލިޔެ ހެދޭނީ ކިހާ ވަރަކަށް ސެކިއުރިޓީ ވަރުގަދަ ކުރެވިގެން ކަމާއިމެދު އޭނާ ވަނީ ސުވާލު އުފައްދާފައެވެ.

ހާދަ ސެކިއުރިޓީ ވަރުގަދަ ވީމައޭ ތިވަރު ކުރެވޭނީ. އެލާޓް ލެވެލް މިހާރު ހުރީ ކިތަކެއްތައި؟

– ޖެނިފާ ކުރި ޓުވީޓުގައި ބުނެފައިވެއެވެ.

Haadha security varugadha vee ma ey thi varu kurevay neee . https://t.co/dFdDD5qn9h

— Aishath Jennifer ⚖️ (@JenniferAishath) May 31, 2022

ކެނެރީގެއަކީ ނަޝީދު އުޅުއްވާ ވަގުތުތަކުގައި ސެކިއުރިޓީ ވަރަށް ވަރުގަދަ ސަރަހައްދެކެވެ. އެމަނިކުފާނު އަވަހާރަކޮށްލަން ދިން ހަމަލާއަށް ފަހު އެ މަގުގައި ޕާކް ނުކުރެވޭ ގޮތަށް ވެސް ވަނީ ހަދާފައެވެ. އަދި އެމަނިކުފާނު ކެނެރީގެއަށް ވަޑައިގަންނަވާއިރު ނިލޯފަރުމަގު މިހާރު ބަންދު ވެސް ކުރެއެވެ. އާންމު ގޮތެއްގައި ސެކިއުރިޓީ ވަރުގަދަ ސަރަހައްދެއްގައި ހުރި ގެޔެއްގެ ފާރަށް "އިންޑިއާ އައުޓް" ސްޕްރޭ ކުރުމާއި ގުޅިގެން ސޯޝަލް މީޑިއާގައި ބައެއް މީހުން ދަނީ ސެކިއުރިޓީއާ މެދު ސުވާލު އުފައްދަމުންނެވެ.