ބޮލީވުޑްގެ މަޝްހޫރު އެކްޓަރު އާމިރު ހާން ލީޑުރޯލުން ފެނިގެންދާ ފިލްމް "ލާލްސިންގް ޗައްޑާގެ" ޓްރެއިލާ ދައްކައިލައިފިއެވެ.
މިއަހަރުގެ އެންމެ އުންމީދީ ފިލްމް ގެ ގޮތުގައި ގިނަ ބަޔަކުު އިންތިޒާރު ކުރަމުންދާ ފިލްމްގެ ޓްރެއިލާގެ ކުރިން ވަނީ ލަވައެއް ވެސް ނެރެފައިއެވެ. ފިލްމުގެ ޓްރެއިލާ އާންމުކުރީ ރޭ ނިންމައިލި މި އަހަރުގެ އިންޑިއަން ޕްރީމިއާ ލީގް (އައިޕީއެލް) ގެ ފައިނަލް މެޗްގެ ތެރޭގައެވެ. އާމިރު އި އިވެންޓްގައި ބައިވެރި ވެސް ވިއެވެ.
އަދްވައިތު ޗަންދަން ޑައިރެކްޓްކުރި މި ފިލްމްގައި އާމިރު އެކި ގޮތްގޮތަށް ވަނީ ފެނިގެން ގޮސްފައިއެވެ. ފިލްމްގެ ޓްރެއިލާ ވަރަށް ބޮޑަށް ޝައުގުވެރިއެވެ. ފިލްމަކީ ހޮލީވުޑްގެ ތަރި ޓޮމް ހޭންކްސްގެ 1994 ގެ ފިލްމު "ފޮރެސްޓް ގަމްޕް" އަސްލަކަށް ބަލައިގެން ހަދާފައިވާ ކޮމެޑީ ޑްރާމާއެކެވެ.
އޮގަސްޓް މަހުގެ 11 ގައި ސިނަމާތަކަށް ގެންނަން ހަމަޖެހިފައިވާފިލްމްގެ ލީޑުން، އާމިރު ހާން އާއި އެކުގައި ފިލްމް އިން ފެނިގެންދާނީ ކަރީނާ ކަޕޫރެއެވެ.
