ޓޫރިޒަމަށް ދޫކޮށްފައިވާ ރަށްރަށުގެ ތެރެއިން ކުލި ނުދައްކާ ހިންގަމުން އަންނަ ރިސޯޓްތަކުގެ ލައިސަންސް ބާޠިލުކޮށް އެތަންތަން ބަންދުކުރުމުގެ ވިސްނުމެއް ނެތްކަމަށް ޓޫރިޒަމް މިނިސްޓަރ ޑރ.ޢަބްދުﷲ މައުސޫމް ވިދާޅުވެއްޖެއެވެ.
ރައްޔިތުންގެ މަޖިލީހުގައި މެންބަރުން ދެންނެވި ސުވާލުތަކަށް ޖަވާބުދެއްވަމުން މިނިސްޓަރ މައުސޫމް ވިދާޅުވީ، ރިސޯޓުތަކުން ނުލިބި ހުރި ފައިސާ ހޯދުމަށް ރިސޯޓުގެ ލައިސެންސް ބާޠިލްކޮށް، ރިސޯޓު ބަންދުކުރުން ފަދަ ހަރުކަށި ފިޔަވަޅުތައް އެޅުމުގެ ވިސްނުން އަދި ނެތްކަމަށެވެ. މައުސޫމް ވިދާޅުވީ އުސޫލުގެ ދަށުން ނޯޓިސްވެސް ދެމުންދާ ކަމަށެވެ. އެގޮތުން ދައުލަތަށް ބިމު ކުލި ނުދައްކާ 18 ރިސޯޓަކަށް މިޙާރު ނޯޓިސް ދީފައިވާ ކަމަށް މިނިސްޓަރ ވިދާޅުވިއެވެ.
ނޯޓިސް ދިނުމަށްފަހު ޓޫރިޒަމް މިނިސްޓްރީއަށް އެބަ އޮވޭ އިހްތިޔާރު އެތަނުގެ ލައިސެންސް ހިފެހެއްޓުމުގެ، އެތަން ބަންދު ކުރުމުގެ، އެކަމުގެ އެއީ ރާއްޖޭގެ މުޅި އިޤްތިސާދަށް ވިސްނާއިރު، އެއީ އެންމެ ރަނގަޅު ސޮލޯޝަން ކަމަށް ނުފެންނާތީ އެތަންތަނާއި މަޝްވަރާކޮށްގެން ފައިސާ ހޯދުމުގެ މަސައްކަތްކުރަމުންދަނީ..
– ޑރ.ޢަބްދުﷲ މައުސޫމް
މިނިސްޓަރވަނީ ދައުލަތަށް އެންމެ ބޮޑު ޢާމްދަނީއެއް ލިބެނީ ފަތުރުވެރިކަމުންކަން ފާހަގަކުރައްވާފައެވެ. އަދި ޓޫރިޒަމް ސިޔާސީ ހަތިޔާރެއްގެ ގޮތުގައި ބޭނުން ނުކުރާނެކަމަށްވެސް މިނިސްޓަރ ވިދާޅުވިއެވެ.
ދައުލަތަށް ލިބެން ޖެހޭ ފައިސާ ނުދައްކާ ފަރާތްތަކުގެ ނަންތައް ޢާއްމުކުރަން މީރާއިން އެކުލަވާލާފައިވާ "ނޭމް އެންޑް ޝޭމް" އުސޫލުގެ ދަށުން މީރާގެ ޓެކްސް ސެންޓަރުގެ ބޯޑުގައި 12 ރިސޯޓުގެ ނަން ވަނީ އާއްމުކޮށްފައެވެ.
