މޯލްޑިވްސް ޕޯޓްސް ލިމިޓެޑް، އެމްޕީއެލްއިން، 17 ޓަނުގެ ބޮލާޑް ޕުލް ޓަގު ބޯޓެއް ގަތުމަށް ސެންޓަރ އެންޓަރ ޕްރައިސެސް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާއެކު 2008 ވަނަ އަހަރުގެ ނޮވެމްބަރުމަހުގެ 18ވަނަ ދުވަހު ހެދި އެއްބަސްވުމާއި އެއްގޮތަށް ސެންޓަރ އެންޓަރ ޕްރައިސެސް ޕްރައިވެޓް ލިމިޓެޑްއިން މި ޓަގުބޯޓު ޑެލިވަރ ކޮށްދީފައި ނުވާތީ، ލިބުނު ގެއްލުމުގެ ބަދަލު ހޯދުމަށް ކުރި ދައުވާގެ ޝަރީއަތަށް ކުންފުނީގެ ގާނޫނީ ވަކީލުން ހާޒިރު ނުވުމުގެ ސަބަބުން، އެމްޕީއެލްއިން މިމައްސަލާގައި ހޯދުމަށް ދައުވާކުރި 55 މިލިއަން ރުފިޔާގެ މައްސަލައިގެ ޝަރީއަތުގެ އެންމެ ފަހު މަރުހަލާގައި، މައްސަލަ ބާތިލްކޮށް، މައްސަލަ އިތުރަށް ކުރިޔަށް ގެންދާނެ ތަނެއް ނެތްކަމަށް ސިވިލް ކޯޓުން ހުކުމް ކޮށްފިއެވެ.

މި މައްސަލާގައި ސެންޓަރ އެންޓަރ ޕްރައިސެސް ޕްރައިވެޓް ލިމިޓެޑްއިން ކުރި ދައުވާގައި ބުނެފައިވަނީ، 17 ޓަނުގެ ބޮލާޑް ޕުލް ޓަގު ބޯޓެއް ގަތުމަށް ސެންޓަރ އެންޓަރ ޕްރައިސެސް ޕްރައިވެޓް ލިމިޓެޑާއެކު ކުރެވުނު އެއްބަސް ވުމާއި އެއްގޮތަށް 300 ދުވަހުގެ ތެރޭގައި މަސައްކަތް ނިންމާ ހަވާލުކުރުމަށް އެއްބަސްވި ނަމަވެސް އެކުންފުނިން އެގޮތަށް އަމަލު ކޮށްފައި ނުވާ ކަމަށެވެ.

އަދި މަސައްކަތުގެ މުއްދަތު އިތުރު ކުރުމަށްޓަކާ ހަތަރު ފަހަރުމަތިން އެއްބަސްވުމަށް ބަދަލު ގެނެވި، ފުރުސަތު ދިނުމުންވެސް ސެންޓަރ އެންޓަރ ޕްރައިސެސް ޕްރައިވެޓް ލިމިޓެޑްއިން ޓަގު ބޯޓު ނިންމާ ހަވާލުކޮށްފައި ނުވާ ކަމަށެވެ. އޭގެ ނަތީޖާއެއްގެ ގޮތުން އެއްބަސްވުން އުވާލާ، އެމްޕީއެމްއަށް ލިބުނު ގެއްލުން އަންދާޒާ ކުރުމަށްޓަކާ ކްރޮވޭ މޯލްޑިވްސް ނަމަކަށް ކިޔާ ކުންފުނިން ތައްޔާރު ކުރި ލޮސް އެސެސްމަންޓް ރިޕޯޓުގައި ވާގޮތުން، އެއްބަސްވުން އުވާލުމާއި ހަމައަށް އެކުންފުނިން ޓަގްބޯޑު ގަތުމަށް ޚަރަދު ކޮށްފައިވާ 24 މިލިއަން ރުފިޔާގެ ސީދާ ގެއްލުމުގެ ބަދަލު ނެގުމަށް އެމްޕީއެލްއިން ޝަރީއަތަށް ހުށަހެޅި މައްސަލާގައި ސެންޓަރ އެންޓަރ ޕްރައިސެސް ޕްރައިވެޓް ލިމިޓެޑްގެ މައްޗަށް ދައުވާ ކޮށްފައި ވެއެވެ.

އަދި މީގެ އިތުރުން، ސީދާ ގެއްލުމުގެ ގޮތުގައި ލިބުނު 24 މިލިއަން ރުފިޔާ އިންވެސްޓު ކުރުމުގެ ފުރުސަތު ގެއްލުމުގެ ސަބަބުން ލިބުނު 13.6 މިލިއަން ރުފިޔާގެ ނުސީދާ ގެއްލުމާއި، ޓަގު ބޯޓުން ލިބެންޖެހޭ އާމްދަނި ނުލިބި ދިއުމުގެ ސަބަބުން ލިބިފައިވާ 12 މިލިއަން ރުފިޔާގެ ނުސީދާ ގެއްލުމާއި، މި މައްސަލަ ކުރިޔަށް ގެންދިއުމުގައި ކުރަންޖެހުނު ލީގަލް ޚަރަދަށްވާ 6.1 މިލިއަން ރުފިޔާވެސް ހިމަނައިގެން ޖުމްލަ 55.7 މިލިއަން ރުފިޔާ ސެންޓަރ އެންޓަރ ޕްރައިސެސް ޕްރައިވެޓް ލިމިޓެޑްގެ ފަރާތުން ގެއްލުމުގެ ބަދަލުގެ ގޮތުގައި ހޯދުމަށް އެމްޕީއެލްއިން ސިވިލް ކޯޓުގައި ދައުވާ ކޮށްފައި ވެއެވެ.

މިމައްސަލާގައި ސިވިލް ކޯޓުން ކުރި ހުކުމްގައި ފާހަގަ ކޮށްފައިވަނީ، ސެންޓަރ އެންޓަރ ޕްރައިސެސް ޕްރައިވެޓް ލިމިޓެޑްގެ މައްޗަށް އެމްޕީއެލްއިން ހުށަހަޅާފައިވާ، އިހުމާލުވުމުގެ ސަބަބުން ލިބޭ ގެއްލުމުގެ ބަދަލާއި، މަދަނީ މަސްއޫލިއްޔަތުގެ ދަށުން ބަދަލު ނަގައިދިނުމަށް ހުށަހަޅާފައިވާ މިމައްސަލަ ހިންގުމަށްޓަކާ، 10 އެޕްރިލް 2022 ވަނަ ދުވަހުގެ 10:50އަށް އެމްޕީއެލްގެ ގާނޫނީ ވަކީލުން ހާޒިރުވުމަށް ފޮނުވުނު، "ކޯޓަށް ހާޒިރުވުމުގެ އަމުރު"އާއި ހަވާލުވެ، އެހެންނަމަވެސް މަގުބޫލު އުޒުރެއް ނެތި ކޯޓަށް ހާޒިރު ވެފައި ނުވާ ކަމުގައެވެ.

އަގުބޮޑު ޓަގް ބޯޓެއް ގަތުމަށް ސެންޓަރ އެންޓަރ ޕްރައިސެސް ޕްރައިވެޓް ލިމިޓެޑްއާއެކު އެމްޕީއެލްއިން ވީ އެއްބަސްވުމާއި ސެންޓަރ އެންޓަރ ޕްރައިސެސް ޕްރައިވެޓް ލިމިޓެޑްއިން ޚިލާފް ވުމާއި ގުޅިގެން އެ ކޮމްޕެނީން ނެގުމަށް އެމްޕީއެލްއިން ކުރި 55 މިލިއަން ރުފިޔާގެ ބޮޑު ބަދަލުގެ ދައުވާގައި ސިވިލް ކޯޓުން ކުރި ހުކުމްގައި ބުނެފައިވަނީ ފައިނޭންސް ލީސިންގެ މިމައްސަލަ ހިންގުމަށްޓަކާ 10 އެޕްރިލް 2022 ވަނަ ދުވަހު 10:50 އަށް އެމްޕީއެލްގެ ގާނޫނީ ވަކީލުން، ޝަރީއަތަށް ހާޒިރުވުމަށް ފޮނުވުނު "ކޯޓަށް ހާޒިރުވުމުގެ އަމުރު"އާއި ޙަވާލުވެ، މަގުބޫލު އުޒުރެއް ނެތި ކޯޓަށް ހާޒިރުވެފައި ނުވާތީ، "ކޯޓަށް މީހުން ހާޒިރު ކުރުމުގައި އަމަލު ކުރާނެ ގޮތުގެ ގަވާއިދު"ގެ 19 ވަނަ މާއްދާގެ (ހ)ގެ 01ވަނަ ނަމްބަރުގެ ދަށުން މައްސަލައިގެ ފޯމު ބާތިލް ކުރުމުން، މައްސަލަ އިތުރަށް ކުރިޔަށް ގެންދާނެ ތަނެއް ނެތްކަމަށް ކަޑައަޅާ ހުކުމް ކުރީ ކަމުގައެވެ.

އެމްޕީއެލްގެ ގާނޫނީ ވަކީލުން ކޯޓަށް ހާޒިރު ނުވުމުގެ ސަަބުބަން އެ ކުންފުންޏަށް 55 މިލިއަން ރުފިޔާގެ ބޮޑު ގެއްލުމެއް ލިބިގެން ގޮސްފައިވާ އިރު، މިފަދަ އެހެން މައްސަލައެއްގައި، ސިލިންކޯ އިންޝޫރަންސްގެ ފަރާތުން 55 ހާސް ޑޮލަރު ހޯދުމަށް އެކުންފުނިން ކުރި ދައުވާއެއްގެ ޝަރީއަތަށްވެސް އެންމެ ފަހުވަގުތު ކުންފުނީގެ ގާނޫނީ ވަކީލުން މިމަހުގެ 12 ވަނަ ދުވަހު ހާޒިރު ނުވުމުގެ ސަބަބުން އެ މައްސަލަވެސް، ސިލިންކޯ އިންޝޫރަންސްއިން އެދުނު ގޮތަށް، މައްސަލަ ބާތިލްކޮށް ކޯޓުން މައްސަލަ ނިންމާފައި ވެއެވެ.

އެމްޕީއެލްއަށް ބޮޑެތި އަދަދުތަކުން ބަދަލު ލިބެންޖެހޭ މައްސަލަތަކުގައި އެ ކުންފުނީގެ ގާނޫނީ ވަކީލުން ކޯޓަށް ހާޒިރު ނުވާ ސަބަބުން އަދި މިހާތަނަށް ސާފުވެފައެއް ނުވެއެވެ.