ޕީޕީއެމްގެ ވެރިކަމެއްގައި ޙަރާމް ޙުކުމެއް ކޮށްފައި އޮތިއްޔާ އެމައްސަލައެއް ބަލާނެ ކަމުގައި ޕީއެންސީގެ ނައިބް ތައީސް އަބްދުއްރަހީމް ވިދާޅުވެއްޖެެެއެވެ.

އޭނާ މިހެން ވިދާޅުވީ ސިޔާސީ ކެމްޕެއިން އިވެންޓެއްގައި ކުރީގެ ރައީސް ޔާމީން ފަނޑިޔާރަކަށް އިންޒާރު ދިންކަމަށް ބުނާ މައްސަލައެއް ބަލައި ދިނުމަށް ޖުޑިޝަލް ސާވިސް ކޮމިޝަނުން ފުލުހުންނަށް ހުށަހެޅުމާއި ގުޅިގެންނެވެ.

އަދުރޭ ވިދާޅުވީ ރައީސް ޔާމީންގެ މައްސަލަ ބަލަން ކޮންމެ ތަނަކަށް ފޮނުވި ނަމަވެސް މިސަރުކާރުން އިސްވެ ހުންނަވައިގެން ކުރަމުންދާ ޤާނޫނާއި ޚިލާފް ހުރިހާ ކަމެއް ޕީޕީއެމްއިން ވެރިކަމާއި ހަވާލުވުމަށްފަހު ބަލާނެކަމަށެވެ. އޭގެ ތެރޭގައި ގާނޫނާއި ޚިލާފް ހުކުމްތަކާއި، ވައްކަންތަކާއި، ހަމަޔާއި އިންސާފުން ބޭރުން ކުރާ އެންމެހައި ކަންކަން ޕީޕީއެމްގެ ވެރިކަމެއްގައި ބަލާނެކަމަށް އަދުރޭ ވިދާޅުވިއެވެ.

ޖޭ.އެސް.ސީ އިން ފޮނުވާނެ ތަނަކަށް މަސްއަލަ ފޮނުވަންވީ. ޙަރާމް ޙުކުމެއް ކޮށްފައި އޮތިއްޔާ އެ މަސްއަލައެއް ޕީ.ޕ.ީއެމްގެ ވެރިކަމުގައި ބަލާނެ. ހަމަ އެކަނި އެކަމެއްނޫން. ގާނޫނާ ޚިލާފަށްކޮށްފައި ހުރި ހުރިހައިކަމެއް ވެސް ބަލާނެ. ތިޔަކުރާ ވައްކަންވެސް ބަލާނެ.

– އަދުރޭ ވިދާޅުވިއެވެ.

މިމައްސަލާގައި ޖުޑިޝަލް ސާވިސް ކޮމިޝަނުން އެދިފައިވަނީ ސުޕްރީމް ކޯޓަށް ފަނޑިޔާރު އަލީ ރަޝީދާއި ގުޅޭގޮތުން ރައީސް ޔާމީން ދެއްކެވި ވާހަތައް ތަހުގީގް ކޮށްދެއްވުމަށެވެ. މިމައްސަލާގައި ފަނޑިޔާރު އަލީ ރަޝީދުގެ ސެކިއުރިޓީގެ ކަންކަމަށް ސަމާލުވެ އަދި އަދި ރައީސް ޔާމީން ދެއްކެވި ވާހަތަކުގައި ޖިނާއީ މައްސަލައެއް ހިމެނޭނަމަ ތަހުގީގް ކޮށް ދެއްވުމަށްވެސް ޖޭއެސްސީން ވަނީ އެދިފައެވެ.

މިމައްސަލަ ފުލުހުންނަށް ހުށަހެޅުމާއި ގުޅިގެން ބަލަންޖެހޭ ކަންކަން ބަލަމުންދާކަމަށް ފުުލުހުން ވަނީ ބުނެފައެވެ. ރައީސް ޔާމީން ފަނޑިޔާރު އަލީ ރަޝީދަށް އާމަޒުކޮށް މިފަދަ ވާހަކަތަކެއް ދައްކަވާފައިވަނީ ނިމިދިޔަ ވިލިމާލެ ދާއިރާގެ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ ބައި އިލެކްޝަންގައި ޕީޕީއެމްގެ ފަރާތުން ވާދަކުރެއްވި ކެނޑިޑޭޓުގެ ކެމްޕެއިން ޖަލްސާއެއްގައި ވާހަކަފުޅު ދައްކަވަމުންނެވެ.

އެޖަލްސާގައި ރައީސް ޔާމީން ވަނީ، ފަނޑިޔާރު އަލީ ރަޝީދު ސްޕްރީމް ކޯޓަށް އައް އައްޔަން ކުރެވުނު ގޮތާއި، އެމަނިކުފާނުގެ ގާބިލް ކަމާއި ގުޅޭގޮތުންވެސް ސުވާލު އުފައްދަވާފައެވެ. އަދި މިފަދަ ކަކަން ރަނގަޅަށް ބެލުމަށްޓަކައި ކުރިއަށް އޮތް ތަނުގައި ޖަލުގެ ޖާގަ އިތުރަށް ބޮޑު ކުރަންޖެހޭ ކަމަށްވެސް ރައީސް ޔާމީން ވަނީ ވިދާޅުވެފައެވެ. މިޖަލްސާގައި ރައީސް ޔާމީން ވަނީ ދައުލަތުގެ ސަލާމަތީ ބާރުތަކުގައި ތިއްބެވި އިސް ބައެއް ބޭފުޅުންވެސް ޖަލުތަކަށް ދާންޖެހިދާނެ ކަމުގެ އިންޒާރުވެސް ދެއްވާފައެވެ.