ރާއްޖޭގެ އިޖުތިމާއީ އެންމެ ބޮޑު މައްސަކަތަކުގެ ގޮތުގައި ފާހަގަވާ މަސްތުވާތަކެއްޗާއި، ގޭންގު ކުށްތަކަކީ އޭގެ ފަހަތުގައި ސިޔާސީ ނިޔަތާއި މާލީ ނަފާ ޝާމިލުވާ ކަންތައްތަކެއް ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ކައުންސިލްތަކާއިއެކު މިއަދު ފަށާފައިވާ "ވިޔަވަތި ރާއްޖެ" ކޮންފަރެންސު އިފްތިތާހު ކޮށްދެއްވައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ މިކޮންފަރެންސުގައި މިފަދަ މުހިންމު މައްސަލަތަކަށް ހައްލު ހޯދުމަށް ކުރެވިދާނެ ކަންކަމާއި ގުޅޭގޮތުން ފުޅާދާއިރާއެއްގައި މަޝްވަރާ ކުރެވިގެންދާނެކަމަށް ވިދާޅުވެފައެވެ.
އިޖުތިމާއީ ގޮތުން ޤައުމުގައި ހުރި މައްސަލަތަކުގެ ތެރެއިން އެންމެ ގޮންޖެހުންބޮޑު އަދި އަވަސް ހައްލުތަކެއް ބޭނުންވާ މައްސަލައަކީ މަސްތުވާތަކެއްޗާއި، ގޭންގު ކުށްތައް ކަމަށް ރައީސުލްޖުމްހޫރިއްޔާ ވިދާޅުވިއެވެ. މިދެމައްސަލައަކީވެސް ގުޅިފައިވާ އެއްބާވަތެއްގެ ދެމައްސަލަކަމުގައި އެމަނިކުފާނު ވިދާޅުވިއެވެ. މަސްތުވާ ތަކެެތީގެ މައްސަލައާއި ގޭން ކުށްތަކަކީވެސް އޭގައި މާލީ މަންފާއާއި، ސިޔާސީ ނިޔަތްވެސް އޮތް ދެމައްސަލަ ކަމުގައި ރައީސުލްޖުމްހޫރިއްޔާ ފާހަގަ ކުރެއްވިއެވެ.
ރާއްޖެއަށް މިވަގުތު ކުރިމަތިވެފައިވާ އެންމެ ބޮޑު އިޖުތިމާއީ އެއް މައްސަލައަކީ އެއްގަހެއްގެ ދެގޮފި. އެއީ މަސްތުވާ ތަކެއްޗާއި ގޭންގު ކުށް. މިކަމުގެ އެންމެ ފުންމުނުގައިވަނީ އިންތިޒާމުވެ ރޭވިގެން ހިންގާ ކުށްތައް. އޭގެ ފަހަތުގައި ސިޔާސީ ނިޔަތާއި، މާލީ ނަފާގެ ސަބަބުތައް ޝާމިލުވޭ. މިއީ ގޮންޖެހުންބޮޑު ހުރަސްތައް ގިނަ ބުރަ މަސައްކަތެއް. މި ކޮންފަރެންސުގައި މިކަމާއި ގުޅޭގޮތުން މަޝްވަރާތައް ފުޅާކުރުން މުހިންމު. އެއީ މީގެ ހައްލު ހޯދުމުގެ މަގު ކުރުވެ، އަވަސް ވާނެކަމެއް ކަމުގައި ދެކެން.
– ރައީސުލްޖުމްހޫރިއްޔާ ވިދާޅުވިއެވެ.
އިޖުރިމާއީ މައްސަލަތަކުގެ ތެރެއިން ދެން އެންމެ ބޮޑަށް ފާހަގަކޮށްލެވޭ މައްސަލައިގެ ގޮތުގައި ރައީސުލްޖުމްހޫރިއްޔާ ފާހަގަ ކުރެއްވީ މޫސުމީ މައްސަލައެވެ. މޫސުމަށް އަންނަމުންދާ ބަދަލުތަކާއިއެކު ރަށް ގިރުމާއި، ފެންބޮޑުވުމާއި، އުދައެރުމަކީ އޭގެ ސަބަބުން އާންމު ރައްޔިތުންގެ ދިރިއުޅުމަށް އެކަމުން ނޭދެވޭ ބޮޑެތި ގެއްލުން ލިބެމުންދާ މައްސަލަތަކެއް ކަމަށް ރައީސް ވިދާޅުވިއެވެ. މިމައްސަލަތައް ހައްލު ކުރުމަށް ކުރެވޭ މަސައްކަތްތަކަކީ ރައްޔިތުންގެ ޚިޔާލާއި މަޝްވަރާއިއެކު ކުރެވޭ މަސައްކަތްތަކަށް ވާންޖެހޭނެ ކަމަސްވެސް އެމަނިކުފާނު ވިދާޅުވިއެވެ.
ތިމާވެއްޓަށް ލިބޭ ގެއްލުމާ ކުރާ ނޭދެވޭ އަސަރަކީ ހިންގޭ ތަރައްގީގެ ކޮންމެ މަޝްރޫއަކާ ގުޅިފައިވާ ކަމެއް, ތަރައްގީގެ ބޭނުމުގާ ކުރާކަމަކީ ތަރައްގީއަށް އޮތް ހުރަހަކަށް ވިޔަދީގެން ނުވާނެ, ތިޔަބޭފުޅުންގެ ވިސްނުމާ މަޝްވަރާތައް އެމަގުން ގެންގޮސްދެއްވުން އަޅުގަނޑު އެދެން, މިކަމުގައިވެސް އެންމެ މުހިންމު ދައުރެއް އަދާކުރެވޭނީ ކައުންސިލްތަކަށް.
– ރައީސް ވިދާޅުވިއެވެ.
އެމަނިކުފާނު ވިދާޅުވީ ސަރުކާރުން ހިންގާ ހުރިހާ މަޝްރޫޢެއް ލާމަރުކަޒީ ނިޒާމާ ގުޅުވާލުމުގެ އެއް ބޭނުމަކީ ރާއްޖޭގެ ހުރިހާ ރަށެއް ކުރިއަރާ، ތަނަވަސްވާނެ ގޮތެއް ހޯދުން ކަމަށެވެ. ދެވަނަ ބޭނުމަކީ، މާލޭގައި އޮތް ތޮއްޖެހުމަށް ލުއިކަމެއް ގެނެސްދީ މާލެ ހިތްފަސޭހަ ތަނަކަށް ހެދުން ކަމުގައެވެ. އެގޮތުން ގުޅީފަޅަށް ރާއްޖޭގެ މައި ވިޔަފާރި ބަނދަރު ބަދަލުކުރުމާއި ދެންވެސް މާލެ ސަރަޙައްދަށް ސަރުކާރުން ގެންނަ ބަދަލުތަކަށް އިޝާރާތްކުރައްވައި ރައީސުލްޖުމްހޫރިއްޔާ ވިދާޅުވީ މުޅި ރާއްޖެ ލާމަރުކަޒު ވާއިރު، މާލެއަށް ގެންނަ ބަދަލަކީ ތޮއްޖެހުންކުޑަކުރުމާއި އަދި އިޖްތިމާޢީ ދުޅަހެޔޮ ކަމާއި އިޤްތިޞޯދީ ވެށި ތަނަވަސް ކުރުމުގެ ބަދަލެއް ކަމުގައި ވެގެންދާނެކަމަށެވެ.
ބުނެފާނެ! އެހެންވިއްޖިއްޔާ މާލޭގައި ތިޔަ އަޅަނީ ކޮން ފަދަ ބިޔަ ބްރިޖެއްތޯ. ކީއްކުރަން ހިއްކާ ގިރާވަރު ފަޅެއްތޯ. ޖަވާބަކީ އެއީ ބާރުވެ ތަށިވެފައިވާވުމަށް ގުޅީފަޅާއި ހަމައަށް ފެޔަށް ނުޖައްސައި، ދައުލަތުގެ ބަޖެޓަށް އާމްދަނީ ކައިރިކުރެވޭކަށް ނެތް. މާލޭ ރައްޔިތުންނަށް ހައްގުވާ ގޯތި ނުދީ ވާކަށްވެސް ނެތް. މުޅި ރާއްޖެ ލާމަރުކަޒު ވާއިރު މާލެއަށް މިގެނެވެނީ އޭގެ އިޖުތިމާއީ ދުޅަހެޔޮކަމާއި އިޤްތިޞާދީ ވެށި ތަނަވަސް ކުރުމުގެ ބަދަލު.
– ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ކައުންސިލްތަކާއެކު މިއީ އެއްއަހަރުގެ ތެރޭގައި ބޭއްވުނު 77 ބައްދަލުވުންތަކުގެ ޒަރީއާއިން ކައުންސިލުތަކަށް އެންމެ ދަތިވާ ކަންކަން ދެނެގަނެވިފައި ވާކަމުގައެވެ. އެގޮތުން ހުރިހާ ކައުންސިލުތަކަށް ވެސް ކުރިމަތިވަނީ ދާދީ އެއްކަހަލަ ގޮންޖެހުންތަކެއްކަން ބައެއް މިސާލާއެކު ރައީސުލްޖުމްހޫރިއްޔާ ފާހަގަކުރެއްވިއެވެ. އެ ގޮންޖެހުންތަކަށް ޙައްލުހޯއްދެވުމަށް މަސައްކަތްކުރައްވާއިރު އޭގެ ތެރޭގައި ސަރުކާރުން އިޞްލާހު ކުރަންޖެހޭ ކަންކަމާއި ކައުންސިލުތަކުން އިޞްލާޙުކުރަންޖެހޭ ކަންކަން ހިމެނޭނެކަން ފާހަގަކުރެއްވިއެވެ. އަދި ވިއަވަތި ކޮންފަރެންސް ބޭއްވުމުގެ އެންމެ ބޮޑު ބޭނުމަކީވެސް ސަރުކާރާ ކައުންސިލުތައް އެއްމޭޒުވެ މިކަންކަމަށް ޙައްލު ހޯދޭނެގޮތެއް ހޯއްދެވުންކަން ރައީސުލްޖުމްހޫރިއްޔާ ފާހަގަ ކުރެއްވިއެވެ.
ރައީސުލްޖުމްހޫރިއްޔާގެ އިސްނެގެވުމުގެ މަތިން އިންތިޒާމުކޮށް ބާއްވަވާ ވިއަވަތި ރާއްޖެ ކޮންފަރެންސް ކުރިޔަށްގެންދިއުމަށް ހަމަޖެހިފައި ވަނީ 3 ސަރަޙައްދަކަށް ބަހާލައިގެން ކޮންމެ ސިޓީ ކައުންސިލަކާއި އަތޮޅު ކައުންސިލަކާއި ރަށު ކައުންސިލަކާއި އަންހެނުންގެ ތަރައްޤީއަށް މަސައްކަތް ކުރާ ކޮމެޓީ ބައިވެރިވާގޮތަށެވެ. މިގޮތުން މި އަހަރު ބާއްވާ ފުރަތަމަ ކޮންފަރެންސް އަކީ މެދުރާއްޖެތެރޭގެ އަތޮޅު ތަކަށް އަމާޒުކޮށް އ.އ އުކުޅަހުގައި ފެށި ކޮންފަރެންސެވެ.
