ކޯވިޑް ނުރައްކަލާހެދި ޖަޕާންގެ ބޯޑަރުތައް މީގެ ދެއަހަރު ކުރިން ބަންދު ކުރިފަހުން، ފުރަތަމަ ފަހަރަށް 98 ގައުމެއްގެ ފަތުރުވެރިންނަށް ޖަޕާންގެ ބޯޑަރުތައް ހުޅުވާލުމަށް އެގައުމުން ތައްޔާރު ވެއްޖެއެވެ.
މިއީ، ދުނިޔޭގެ އެހެން ގައުމުތަކާއި ޚިލާފަށް، ކޯވިޑާއި ދެކޮޅަށް އަޅާފައިވާ ހަރުކަށި ފިޔަވަޅުތަކަށް ލުއި ދިނުމުގައި އެންމެ ލަސް އެއްގައުމުގެ ގޮތުގައި ފާހަގަ ވެފައިވާ ޖަޕާނުން، ފިޔަވަޅުތަކަށް ލުއި ދިނުމުގެ ގޮތުން މިހާތަނަށް ގެންނަ އެންމެ ބޮޑު ބަދަލެވެ.
އެހެންނަމަވެސް ފަތުރުވެރިންނަށް ބޯޑަރު ހުޅުވާލާއިރު، އަދިވެސް ޓުއަރ ގުރޫޕުތަކަށް ބޯޑަރު ހުޅުވާލުމަށް ހަމަޖެހިފައި ނުވާކަމުގައިވެސް ޖަޕާން ސަރުކާރުން ވަނީ ހާމަކޮށްފައެވެ.
ޖަޕާނަކީ، ކޯވިޑާއި ދެކޮޅަށް އެންމެ ހަރުކަށި ފިޔަވަޅުތައް އެޅި އެއްގައުމެވެ. އަދި އެގައުމުންވަނީ ކޯވިޑާއި ހެދި، ބާއްވަން ހަމަޖެހުނު އޮލިމްޕިކްސް 2020، 2021ވަނަ އަހަރު ބޭއްވިގެން ދިޔައިރުވެސް، މި ކުޅިވަރު މުބާރާތަށްވެސް ގައުމުން ބޭރުން މީހުން ޖަޕާނަށް އެތެރެވުން މަނާކޮށްފައެވެ. މިގޮތުން މި މުބާރާތް ބާއްވާފައިވަނީ ބެލުންތެރިންނާ ނުލައެވެ.
ޖަޕާނުންވަނީ މީގެ ކުރިން، އެގައުމަށް އެތެރެވާ ގައުމުގެ ރައްޔިތުންނަށާއި، ވިޔަފާރަވެރިންނަށް ބޯޑަރު ހުޅުވާލާފައެވެ. އަދި ޖޫން 1 އިން ފެށިނެގެން ދުވާލަކަށް އެގައުމަށް މީހުންނަށް އެތެރޭވެވޭ ނިސްބަތް ދުވާލަކަށް 20،000 އަށް މަތި ކުރުމަށްވެސް ވަނީ ނިންމާފައެވެ. މިއަހަރުގެ މާރޗްމަހުގެ އެއްވަނަ ދުވަހުން ފެށިގެން ކިޔަވާ ކުދިންނަށް ޖަޕާން ސަރުކާރުންވަނީ ބޯޑަރު ހުޅުވާލާފައެވެ.
ބޯޑަރުތައް ފަތުރުވެރިންނަށް ހުޅުވާލާއިރު އެގައުމުން ވަނީ ގައުމުތައް 3 ގިންތިއަކަށް ބަހާލާފައެވެ. އެއީ ރަތް ކެޓަގަރީއާއި، ރީނދީ ކެޓަގަރީއާއި އަދި ނޫ ކެޓަގަރީއެވެ.
މީގެ ތެރެއިން އޭޝިއާ ސަރަހައްދު ރަތް ކެޓަގަރީގައި ހިމަނާފައިވަނީ ޕާކިސްތާން އެކަންޏެވެ. މި ކެޓަގަރީގައި ހިމެނޭ ގައުމުތަކުގެ މީހުން ސަރުކާރުން ކަނޑައަޅާ ތަނެއްގައި 3 ދުވަހު ކަރަންޓީން ވާން ޖެހޭއިރު، ރީނދޫ ކެޓަގަރީގައި ހިމަނާފައިވާ ގައުމުތަކުން ޖަޕާނަށް އެތެރެވާ މީހުން 3 ދުވަހު ގޭގައި ކަރަންޓީން ވާން ޖެހެއެވެ. ރާއްޖެ ހިމަނާފައިވަނީ ރީނދޫ ކެޓަގަރީގައެވެ. ނޫ ކެޓަގަރީގައި ހިމަނާފައިވާ ގައުމުތަކުން ޖަޕާނަށް އެތެރެވާ މީހުން ކަރަންޓީން ވާން ނުޖެހޭ ގޮތަށް ވަނީ ހަމަޖައްސާފައެވެ.
