އިދިކޮޅު ކޯލިޝަނުން ހިންގަމުންދާ "އިންޑިއާ އައުޓް" ހަރަކާތް ހުއްޓުވުމަށް ބާރުގެ ބޭނުން ނަހަމަ ގޮތުގައި ބޭނުން ކުރަމުންދަނީ އިންޑިއާ އައުޓަށް އޮތް ތާއީދު ބޮޑުވުމުން ކަމުގައި އިދިކޮޅު ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.
އަދުރޭ މިހެން ވިދާޅުވީ އިދިކޮޅު ކޯލިޝަނުން ކުރިއަށް ގެންދާ "އިންޑިއާ އައުޓް" ހަރަކާތާއި ދެކޮޅަށް ވެރިކަން ކުރާ މައި ޕާޓީ އެމްޑީޕީން "ބާކީ ނުވޭ" ކެމްޕެއިނެއް ކުރިއަށް ގެންދިއުމަށް ކުރަމުންދާ މަސައްކަތާއި ގުޅިގެންނެވެ.
މިކެމްޕެއިނަށް މިހާތަނަށް މާބޮޑު ތަރުހީބެއް ލިބިފައި ނުވެއެވެ. އަދުރޭ ވިދާޅުވީ އަމިއްލަ ބާރުވެރިކަން ދެމެހެއްޓުމަށް ރާއްޖެ އަޅުވެތި ކަމަށް ދޫކޮށްލަންވެސް ތައްޔާރަށް ތިބި ބަޔަކާއި ދެކޮޅަށް ދިވެހި ތައްޔިތުން ބަސް ބުނާނެކަމަށެވެ. އެކަން ހުއްޓުވުމަށްޓަކައި ކުރާ މަަސއްކަތަކީ ކާމިޔާބު ވާނެ ކަމެއް ނޫންކަމަށާއި، އިންޑިއާ އައުޓަށް ތާއީދު އޮތްވަރު ސަރުކާރުން ކުރަމުންދާ ޤާނޫނާއި ޚިލާފް ކަންތައްތަކުން ހާމަވާކަމަށް އޭނާ ވިދާޅުވިއެވެ.
އެގޮތުން މުޒާހަރާތަކާއި އެއްވުންތައް ނަހަމަ ބާރުގެ ބޭނުންކޮށް ހުއްޓުވުމާއި، ޤާނޫނާއި ޚިލާފަށް އެތައް އަމުރެއް ނެރެގެން ހިންގަމުންދާ އަމަލުތަކަކީ އިންޑިއާ އައުޓަށް އޮތް ތާއީދު ބޮޑުކަން ހާމަވާ ކަމެއްކަމަށް އަދުރޭ ވިދާޅުވިއެވެ.
ސިޔާސީ ބާރުވެރިކަން ދެމެހެއްޓުމަށްޓަކައި ދިވެހިން އަޅުވެތި ކުރަން މަސައްކަތް ކުރާ ބަޔަކާއި ދެކޮޅަށް ދިވެހިން ތެދުވާނެކަން ދަންނަންޖެހޭ. އިންޑިއާ އައުޓް ކެމްޕެއިނަށް ތާއީދު އޮތްކަން އެނގެނީ ސަރުކާރުން ބާރުގެ ބޭނުން ނަހަމަ ގޮތުގައި ހިފައިގެން އެކެމްޕެއިން އިން ހުއްޓުވަން އުޅޭތީ.
އަބްދުއްރަހީމް ވިދާޅުވިއެވެ.
ސަރުކާރަށް ތާއިދު ކުރާ ފަރާތްތަކުގެ "Baakeenuvey#" ކެމްޕޭނާއި ވާދަކުރަން އިއްޔެ އިދިކޮޅު ފަރާތްތަކުން ބޭނުންކުރަން ފެށި ހޭޝްޓެގަކީ "DhashuNuvey#" އެވެ. އެއާއިއެކު ސަރުކާރުގެ ބާކީނުވޭ ކެމްޕޭނަށްވުރެ މާގިނަ މީހުން ވަނީ ދަށުނުވާށޭ ބުނެ ޓްވީޓް ކޮށްފައެވެ.
ތަފާސް ހިސާބުތަކަށް ބަލާއިރު ބާކީނުވާށޭ ބުނެ ކުރި ޓްވީޓްތަކުގެ އަދަދު އަރަނީ 3685 އަށެވެ. ނަމަވެސް ދަށުނުވާށޭ ބުނެ ކޮށްފައިވާ ޓްވީޓްތަކުގެ އަދަދު އިއްޔެ އެކަނިވެސް ވަނީ 4940 އަށް އަރާފައެވެ. އަދި އިދިކޮޅު ފަރާތްތަކުން އެންމެ އާއްމުކޮށް ބޭނުން ކުރާ އިންޑިއާ އައުޓް ހޭޝްޓެގް ބޭނުން ކޮށްގެން ކުރި ޓްވީޓްތަކުގެ އަދަދު 9728 އަށް އަރައެވެ.
އިންޑިއާ ސިފައިން ރާއްޖެ އިން ބޭލުމަށް ގޮވާލައި ކެމްޕޭން ކުރަމުންދާ ފަރާތްތަކުން ކޮށްފައިވާ ޓްވީޓްތަކުގައި ބުނެފައި ވަނީ "ބާކީވިނަމަވެސް" އެމީހުންނަށް މައްސަލައެއް ނެތް ކަމަށެވެ. އެމީހުން ބޭނުން ވަނީ "އަޅުވެތިނުވާން" ކަމަށް އެމީހުން ބުނެފައި ވެއެވެ.
