ސިޔާސީ ޕާޓިތަކުން ހުށައަޅަ ފޯމުތަކުގެ ޞައްޙަކަން ކަށަވަރުކުރުމަށްޓަކައި ސޮއިކުރާ މީހާގެ ނަން އާންމުކުރަން އިލެކްޝަންސް ކޮމިޝަން (އީސީ)އިން ފަށައިފިއެވެ.
ސިޔާސީ ޕާޓީތަކުގެ ދަފްތަރުގައި ތިބޭ މީހުން އެއް ޕާޓީއަށް ނޭނގި އަނެއް ޕާޓީއަށް ބަދަލުކުރުމާއި، ސިޔާސީ ޕާޓިއަކަށް ސޮއި ނުކުރަ މީހުން ސިޔާސީ ޕާޓީތަކުގެ ދަފްތަރުގައި އޮންނަ މައްސަލަ ފަހަކަށް އައިސްވަނީ ބޮޑުވެފައެވެ. މިކަން ހައްލުކުރުމަށް އިލެކްޝަންސް ކޮމިޝަނުން ވަނީ ސިޔާސީ ޕާޓީތަކުގެ ދަފްތަރު އެ ކޮމިޝަންގެ ވެބްސައިޓްގައި އާންމު ކުރުމަށްވެސް ނިންމާފައެވެ.
އީސީން ބުނީ، މެމްބަރުންގެ ގޮތުގައި ދަފްތަރު ކުރުމަށް ސިޔާސީ ޕާޓީތަކުން ހުށަހަޅާފައިވާ ފޯމްތަކުގެ ސައްހަކަން ކަށަވަރު ކުރުމަށް އެ ފަރާތްތަކުގެ ނަމާއި އައިޑީ ކާޑުގެ ފަހު ތިން ނަމްބަރު އެ ކޮމިޝަންގެ ވެބްސައިޓްގައި ފެންނާނެހެން އާންމުކޮށްފައިވާކަމަށެވެ.
އެކޮމިޝަނުން ބުނީ ސިޔާސީ ޕާޓީތަކުގެ ދަފްތަރުގައި ހިމަނަން ހުށައަޅާފައިވާ މީހުންގެ ފޯނަށް މެސެޖުވެސް ފޮނުވާފައިވާކަަމަށެވެ. އަދި އާންމުކުރި ލިސްޓްގައި އެއްވެސް ޝަކުވާއެއް ވާނަމަ އާދީއްތަ ދުވަހުގެ ކުރިން އެ ކޮމިޝަނަށް އެންގުމަށް ވަނީ އެދިފައެވެ.
އެގޮތުން ޖުމްހޫރީ ޕާޓީގެ 23 ފޯމާއި އެމްޑީޕީގެ 105 ފޯމާއި އެމްއެންޕީގެ 245 ފޯމުގައިވާ ނަންތައް ވަނީ އާްންމުކޮށްފައެވެ.
