މި ސީޒަނުގައި ފްރާންސް ލީގުގައި ޕީއެސްޖީން ކުޅުނު ފަހު މެޗުގައި މެޓްޒްއާ ދެކޮޅަށް އެމްބާޕޭ ހެޓްރިކް ހަދައި، ވިދިވިދިގެން ހަތަރުވަނަ ފަހަރަށް ލީގުގެ އެންމެ ގިނަ ލަނޑު ޖެހި ކުޅުންތެރިޔާގެ އެވޯޑް ހޯދައިފިއެވެ.
އަދި އެމެޗު ފެށުމުގެ ކުރިން ޕީއެސްޖީއާއެކު އެމްބާޕޭ 2017 ގައި ހެދި އެއްބަސްވުން ހަމަވާން، ކުރިން ހަމަޖެހިފައި އޮތީ އަންނަ މަހުއެވެ. ހިލޭ ޓްރާންސްފާގައި ރެއާލް މެޑްރިޑަށް ބަދަލުވާން އޭނާ އެކްލަބާއެކު މަޝްވަރާތައް ވެސް ކުރިއެވެ. އެކަމަކު މިމަހު ޕީއެސްޖީން ވަނީ އެމްބާޕޭ އަށް އެކްލަބުން ހުށަހެޅި ޕެކޭޖް ބޮޑު ކޮށްފައެވެ.
ޕީއެސްޖީއާ އެކު އެމްބާޕޭ، 23، ސޮއިކުރީ ތިން އަހަރުގެ ކޮންޓްރެކްޓެއްގަ އެވެ. އެމްބާޕޭ، ޕީއެސްޖީގައި މަޑުކުރަން ނިންމިކަން އިއުލާނުކުރީ ރޭ ފްރެންޗް ލީގުގެ ފަހު މެޗުގައި މެޓްޒާ ދެކޮޅަށް ކުޅުނު މެޗު ފެށުމުގެ ކުރިންނެވެ. މި މެޗުން ޕީއެސްޖީ ވަނީ 5-0 އިން މެޓްޒް ބަލިކޮށްފައެވެ. އެމްބާޕޭ ހެޓްރިކެއް ހެދިއިރު، އަނެއް ދެ ގޯލު ޖެހީ ނޭމާ އާއި އެންހެލް ޑި މާރިއާއެވެ. މިއީ ޑި މާރިއާ ޕީއެސްޖީ ޖޯޒީގައި ކުޅުނު ފަހު މެެޗެވެ.
2018 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރި އުމުރުން 23 އަހަރުގެ ކުޅުންތެރިޔާ ސްޕެއިނަށް ބަދަލުވާން ގިނަ ބަޔަކު ދެކެމުން އައި ނަމަވެސް، އޭނާ ވަނީ އޭނާގެ މުސްތަގުބަލު ޕީއެސްޖީގައި ހޭދަކުރުމަށް ނިންމާފައެވެ. އެމްބާޕޭ ޕީއެސްޖީގައި މަޑުކުރަން އެއްބަސްވި ޚަބަރަށް ސްޕެނިޝް ލީގުން ވަނީ ރުޅިވެރިކަމާއެކު ރައްދުދީ، އެ ޑީލް ޔުއެފާގެ އިތުރުން ފްރާންސް އަދި އީޔޫގެ ކަމާބެހޭ ފަރާތްތަކަށް ޝަކުވާ ހުށަހަޅަން ރާވާފައިވާކަން އިއުލާން ކޮށްފައެވެ.
ސްޕެނިޝް ލީގުގެ ރައީސް ހާވިއޭ ޓެބާސް އަކީ ޕީއެސްޖީ އާއި މެންޗެސްޓާ ސިޓީ ފަދަ ބޮޑެތި ޚަރަދުތަކެއް ކުރާ ޔޫރަޕުގެ ކުލަބުތަކުގެ އިތުރުން ޔޫރަޕިއަން ސުޕަ ލީގަށް ހުށަހަޅާފައިވާ ކުލަބުތަކާވެސް ވަރުގަދަ ދެކޮޅުވެރިއެކެވެ. ސޯޝަލް މީޑިއާގައި ކުރި ޕޯސްޓެއްގައި އޭނާ ބުނީ ފާއިތުވި ސީޒަންތަކުގައި 700 މިލިޔަން ޔޫރޯގެ ގެއްލުމާއި، 600 މިލިޔަން ޔޫރޯއަށް ވުރެ ގިނަ އުޖޫރަ ލިބުމުން, ގިނަ އަދަދެއްގެ ފައިސާއިން އެމްބާޕޭގެ އެއްބަސްވުން އާކޮށްގެން ޕީއެސްޖީން ކުރަން އުޅޭ ކަމަކީ ފުޓްބޯޅައަށް ކުރާ ފުރައްސާރައެއް ކަމަށެވެ.
މިދިޔަ މަހު ސްޕެއިންގެ ފުޓްބޯޅަ ތަޖުރިބާކާރު ގުއިލެމް ބަލާގޭ ބުނި ގޮތުގައި ޕީއެސްޖީ އޮތީ އެމްބާޕޭ އިތުރު ދެ ސީޒަނަށް ބެހެއްޓުމަށް 150 މިލިޔަން ޔޫރޯގެ ފީއެއް ހުށަހަޅަން ތައްޔާރަށެވެ. އެއާއެކު ސްޕެއިނަށް ބަދަލުވުމަށް ރެއާލާއެކު މީގެ މަސްތަކެއް ކުރިން ފައިނޭންޝަލް ޕެކޭޖަކަށް އެމްބާޕޭ އެއްބަސްވި ނަމަވެސް، ކާލޯ އެންޗެލޮޓީގެ ޓީމާ ނުގުޅެން އޭނާ ވަނީ ނިންމާފައެވެ.
އެމްބާޕޭ އެންމެ ފުރަތަމަ ޕީއެސްޖީއާ ގުޅުނީ 2017 ވަނަ އަހަރު މޮނާކޯ ދޫކޮށް ލޯނު އެއްބަސްވުމެއްގެ ދަށުންނެވެ. އެކަމަކު 2018 ވަނަ އަހަރު ޕީއެސްޖީން ވަނީ 145 މިލިޔަން ޔޫރޯ ދެއްކުމަށްފަހު އެމްބާޕޭގެ އެއްބަސްވުން ދާއިމީކޮށްފައެވެ.
