އެމެރިކާގެ ރިޔާސީ އިންތިޚާބުގެ ނަތީއާއި ގުޅޭގޮތުން އެއްވެސް ކޮޅަކަށް ފަހިވާގޮތަށް ބަހެއްނުބުނެ އޮތުމަށްފަހު، އެންމެ ފަހުން ޗައިނާއިން އެމެރިކާގެ އިންތިޚާބީ ރައީސް ޖޯ ބައިޑްއަށް މަރުހަބާ ކިޔައިފިއެވެ.
"އެމެރިކާގެ ރައްޔިތުންގެ ނިންމުމަށް އިހުތިރާމް ކުރާނަން. އަދި އިންތިޚާބީ ރައީސް ޖޯ ބައިޑްއަށާއި އިންތިޚާބީ ނާއިބްރައީސާ ހެރިސްއަށް މަރުހަބާ ކިޔަން"، ޗައިނާގެ ފޮރިންގ މިނިސްޓްރީގެ ތަރުޖަމާން ހުކުރު ދުވަހު ވިދާޅުވިއެވެ.
ޗައިނާ-އެމެރިކާގެ ގުޅުމަކީ ދެގައުމަށާއި އަދި މުޅި ދުނިޔެއަށްވެސް މުހިންމު ގުޅުމެކެވެ. އެހެންނަމަވެސް، ޓަރަމްޕްގެ ވެރިކަން ނިމެމުންދާއިރު މިދެގައުމުގެ ގުޅުންވަނީ، ވިޔަފާރިއާއި، މިހާރު މުޅި ދުނިޔެއަށް ކުރިމަތިވެފައިވާ ކޯވިޑް19 ކާރިސާގެ އިތުރުން އެއްގައުމު އަނެއްގައުމުން ޖާސޫސްކުރުމުގެ ތުހުމަތުތަކާއިއެކު، ދުވަހަކުވެސް ގޯސްނުވާ މިންވަރަށް ގޯސްވެގެން ގޮސްފައެވެ.
ޗައިނާއިން ޖޯ ބައިޑްންއަށް މަރުހަބާ ކިޔާފައިވާއިރު، ރަޝިޔާއިން އަދި މިހާތަނަށް އެމެރިކާގެ ރިޔާސީ އިންތިޚާބާ ގުޅޭގޮތުން އެއްވެސް ވާހަކައެއް ދައްކާފައެއް ނުވެއެވެ.
މީގެ 4 އަހަރު ކުރިން ޓްރަމްޕް އެމެރިކާގެ ރައީސްކަމަށް އިންތުޚާބު ވެވަޑައިގަތުމާއެކު، ރަޝިޔާގެ ރައީސް ޕުޓިން ވެގެންދިޔައީ ދުނިޔޭގެ ލީޑަރުންގެ ތެރެއިން އެންމެފުރަތަމަ ޓަރަމްޕަށް މަރުހަބާ ވިދާޅުވި ލީޑަރުންގެ ތެރޭގައެވެ. އެހެންނަމަވެސް، ނޮވެމްބަރުމަހުގެ 3 ވަނަ ދުވަހު ބޭއްވުނު އިންތިޚާބަށްފަހު މިހާތަނަށް އައިއިރު ޓުވިޓަރ، ޓެލެގްރާމް އަދި ފޯންކޯލެއް މެދުވެރިކޮށް ނަމަވެސް، ރަޝިޔާގެ ރައީސް ބައިޑްންއަށް މަރުހަބާ ކިޔާފައެއް ނުވެއެވެ.
"އަހަރުމެން ދެކޭގޮތުގައި އެންމެ މަސްލަހަތު ހުރި ގޮތަކީ އިލެކްޝަންސް ކޮމިޝަންގެ ރަސްމީ ނަތީޖާ އިއުލާން ކުރެވެންދެން މަޑުކުރުން" ކްރެމްލިންގެ ތަރުޖަމާން ޑިމިޓްރީ ޕެސްކޯވް ރިޕޯޓަރުންނާއި ބައްދަލުކޮށް ދާދިފަހުން ވިދާޅުވެފައި ވެއެވެ.
އެހެންނަމަވެސް މިހާތަނަށް އައިއިރު، ދުނިޔޭގެ ވަރަށް ގިނަ ގައުމުތަކެއްގެ ލީޑަރުން ބައިޑްންއަށް ގުޅުއްވާ މަރުހަބާ ވިދާޅުވެފައިވާއިރު، އެމެރިކާގެ ރައީސް ޑޮނަލްޑް ޓްރަމްޕް އަދިވެސް ގެންދަވަނީ އިންތިޚާބުގެ ނަތީޖާ ގަބޫލުކުރުމަށް ދެކޮޅު ހައްދަވަމުންނެވެ. އެހެންނަމަވެސް، އިންތިޚާބުގައި އޮޅުވާލާ މަކަރުހަދާފައިވާކަމުގެ ސާބިތުހިފޭ އެއްވެސް ހެއްކެއް މިހާތަނަށް އައިރު ޓްރަމްޕްގެ ލޯޔަރުންނަށް ދެއްކިފައެއް ނުވެއެވެ.
އަދި ބުރާސަފަތު ދުވަހު އެމެރިކާގެ ފެޑެރަލް އިލެކްޝަންގެ އޮފިޝަލުން ވިދާޅުވެފައިވަނީ މިއަހަރުގެ ރިޔާސީ އިންތިޚާބަކީ މިހާތަނަށް އެމެރިކާގެ ތާރީޚުގައި ބޭއްވުނު އެންމެ އިންސާފުވެރި އިންތިޚާބުކަމުގަވެ.
ޗައިނާއިން ސީދާގޮތެއްގައި ބައިޑްންއަށް މަރުހަބާ ކިއުމަކީ، ޖޯބައިޑްން ޖެނުއަރީ 20 ވަނަ ދުވަހު އެމެރިކާގެ ރައީސްކަމުގެ ހުވާ ކުރައްވާނެކަމަށް އެގައުމުގެ ރައީސް، ޒީ ޝިންޕިންގ ގަބޫލު ކުރައްވާކަމުގެ ހެއްކެއްކަމުގައި މަސްރަހު ދިރާސާ ފަރާތްތަކުން ބުނަމުން ދެއެވެ.
