ރެއާލް މެޑްރިޑަށް ނޫނެކޭ ބުނެ، ފްރާންސްގެ ފޯވާޑް ކީލިއަން އެމްބާޕޭ ޕީއެސްޖީގައި މަޑު ކުރަން ނިންމައިފި ކަމަށް ރިޕޯޓްތައް ބުނެފިއެވެ.
ޕީއެސްޖީއާއެކު 2017 ގައި އެމްބާޕޭ ހެދި އެއްބަސްވުން، އަންނަ މަހު ހަމަވާނެއެވެ. ރެއާލް އިން މަސައްކަތް ކުރީ ފުރީ ޓްރާންސްފާގައި އެމްބާޕޭ އެޓީމަށް ގެންދިއުމަށެވެ. އެމްބާޕޭ ވަނީ ރެއާލް އާއެކު ވެސް ގިނަ މަޝވަރާތަކެއް ކޮށްފަ އެވެ. ޕީއެސްޖީން ވަނީ ކުރިން ފެށިގެން އޭނާ އަށް ހުށަހަޅައިފައިވާ ޕެކޭޖް މިމަހު އިތުރަށް ބޮޑުކޮށްފައެވެ.
އެމްބާޕޭގެ މަންމަ، ފޭޒާ، ފްރާންސްގެ މީޑިއާތަކަށް ބުނެފައި ވަނީ ދެ ކްލަބުން ހުށަހަޅައިފައިވާ ޕެކޭޖަކީ ވެސް އޭނާގެ ދަރިފުޅަށް ބަލައިގަނެވޭނެވަރުގެ ދެ ހުށަހެޅުން ކަމަށެވެ. އެމްބާޕޭ ހޯދުމަށް ރެއާލްގެ އިތުރުން ނަން މަޝްހޫރު ގިނަ ކްލަބްތައް މަސައްކަތް ކުރަމުން އަންނަތާ ދުވަސްތަކެއް ވެއްޖެއެވެ. ނަމަވެސް އެކަން މިހާތަނަށް އެއްވެސް ކްލަބަކަށް ކާމިޔާބު ކުރަން ޕީއެސްޖީން ފުރުސަތު ދީފައެއް ނުވެއެވެ.
ފްރާންސްގެ މޮނާކޯ އިން ފުޓުބޯޅަ ކެރިޔަރު ފެށި އުމުރުން 23 އަހަރުގެ އެމްބާޕޭ ޕީއެސްޖީއަށް ބަދަލުވީ 2017 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް އެ ކްލަބަށް ކުޅުނު ފަސް ސީޒަނުގައި 216 މެޗު ކުޅެ، 168 ލަނޑު ކާމިޔާބުކޮށްފައެވެ.
ފްރާޏްސް ގައުމީ ޓީމާއެކު ފީފާ ވޯލްޑް ކަޕް އަދި ޔުއެފާ ނޭޝަންސް ލީގު ކާމިޔާބުކޮށްފައިވާ އެމްބާޕޭ ވަނީ ޕީއެސްޖީއާއެކު ހަތަރު ލީގު ތަށިވެސް ކާމިޔާބުކޮށްފައެވެ.
