ޑްރަގް ނެޓްވޯކެއްގެ ދަށުގައި ރަހުނުކުރެވިގެން ރާއްޖެ އިން ބޭރުގައި ހުރުމަށްފަހު ރާއްޖެ އައިތަނުން ހައްޔަރުކުރި ހދ. ނޮޅިވަރަންފަރު، މޯނިންވިއު، މިސްބާހު މުހައްމަދު ޖަލުން ފިލައިގެން އުޅެނިކޮށް ހައްޔަރުކޮށްފިއެވެ.
މިސްބާހު ފިލާފައި ވަނީ ހިއްމަފުށީގައި ހުންނަ އައްސޭރި ޖަލުގައި ހައްޔަރުކޮށްފައި ހުއްޓައެވެ. ކަރެކްޝަންސް އިން ބުނީ އެ ޖަލުގައި ހުކުމް ތަންފީޒުކުރަމުންދިޔަ ގައިދީއެއް ފިލުމާއި ގުޅިގެން ފުލުހުންގެ އެހީތެރިކަމާއެކު އޭނާ ހޯދާ ކަރެކްޝަންސްގެ ބެލުމުގެ ދަށަށް ގެނެވިފައިވާ ކަމަށެވެ.
މިދިޔަ އަހަރުގެ ޖުލައި 23 ގައި މިސްބާހު މާލެ އައުމާ އެކު، ފުލުހުންގެ ބެލުމުގެ ދަށަށް ގެންގޮސް، އޭނާގެ މައްޗަށް ކޯޓުން ކޮށްފައިވާ ހުކުމް ތަންފީޒު ކުރުމަށް ކަރެކްޝަނަލް ސާވިސްއާ ހަވާލުކުރިއެވެ.
ފުލުހުން ކުރިން ބުނެފައިވާ ގޮތުގައި އުމުރުން 25 އަހަރުގެ މިސްބާހު ގޮވައިގެން ދިޔައީ ޑިސެމްބަރު 8، 2020 ގައި "މަސްޖަރީ-2″ ނަމަކަށް ކިޔާ ދޯނީގައި ކަނޑުމަގުން ރާއްޖެ އަށް 72 ކިލޯ އަށް ވުރެ ގިނަ މަސްތުވާތަކެތި އެތެރެކުރި ކަމުގެ ތުހުމަތުގައި ފުލުހުން ހައްޔަރުކުރި އިރުފާނެވެ. އިރުފާނު ހައްޔަރުކުރީ މިސްބާހު ދުބާއީ އަށް ގެންގޮސް އެނބުރި އައި ފަހުން މަސްތުވާތަކެއްޗާ އެކުގައެވެ.
އިރުފާނާއި މިސްބާހް ދުބާއީ އަށް ދާން ވެލާނާ އިންޓަނޭޝަނަލް އެއާޕޯޓަށް ދިޔައީ 72 ކިލޯގެ މަސްތުވާތަކެތި ފެނުނު، އިރުފާން ދުއްވާ ކާރުގައި ކަމަށް ވެސް ފުލުހުން ބުނެފައި ވެއެވެ.
މިސްބާހު ގޮވައިގެން ދުބާއީ އަށް ދިއުމަށް ފަހު އިރުފާން އަނބުރާ ރާއްޖެ އަށް އައި ނަމަވެސް މިސްބާހު ރާއްޖެ އައުމުގެ ބަދަލުގައި ނޮވެމްބަރު 23 ވަނަ ދުވަހު ފްލައި ދުބާއީގެ ފްލައިޓަކުން ދުބާއީން ޕާކިސްތާނަށް ފުރީ އެވެ. އަދި "ގެރެންޓާ" އެއްގެ ގޮތުގައި ޕާކިސްތާނަށް އޭނާ ދިޔަ ކަމަށް ފުލުހުން ބުންޏަސް މިސްބާހު ވަނީ އޭނާ އާންމުކުރި ވީޑިއޯއެއްގައި އެ ތުހުމަތުތައް ދޮގުކޮށްފައެވެ.
