ނިމިދިޔަ ރިޔާއީ އިންތިޚާބު އޮޅުވާލުމުގެ ހިތި ނަތީޖާ އެމްޑީޕީގެ އެތެރޭގައި ބޭއްވޭ އިންތިޚާބުތަކުން މިއަދު ދަނީ ތަހައްމަލު ކުރަމުން ކަމުގައި މާލޭ އަތޮޅު ކައުންސިލްގެ ރައީސް މުހައްމަދު ނިމާލް ވިދާޅުވެއްޖެއެވެ.
ނިމާލް މިހެން ވިދާޅުވީ ނިމިދިޔަ އެމްޑީޕީގެ ޗެއާޕާސަން އިންތިޚާބުގައި ވާދަކުރެއްވި ދެ ކެނޑިޑޭޓުންގެ ތެރެއިން އިންތިޚާބުން ބަލިވި އިންތި ދައްކަވަމުންދާ ވާހަތަކަށް އިޝާރާތް ކުރައްވައެވެ. އިންތި ވަނީ މިއިންތިޚާބަކީ ހުސް އަތާ ނިކުމެ މުޅި ދައުލަތާއި، ދައުލަތުގެ ބާރުތަކާއި ދެކޮޅަށް ނިކުމެ ވާދަކުރަން ޖެހުނު އިންތިޚާބެއްކަމަށެވެ. އިންތިވަނީ ކެމްޕެއިންގެ ތެރޭގައި މިއިންތިޚާބަށް ސަރުކާރުން ނުފޫޒާއި، ބާރާއި، ބިރު ދެއްކުންވެސް އިންތިހާއަށް ކުރިމަތިކުރާކަމަށް ތުހުމަތު ކޮށްފައެވެ.
އިންތިގެ ވާހަތަކާއި ގުޅިގެން ނިމާލް ވިދާޅުވީ އެމްޑީޕީގެ އިންތިޚާބު ދިޔަ ގޮތުން އިންތިއަށް ހެޔޮ ވިސްނުނީތީ އުފާ ކުރައްވާކަމަށެވެ. މިއަދު ހަނދާނަށް ގެންނަންވީ 2018 ވަނަ އަހަރުގެ ރިޔާސީ އިންތިޚާބުގައި އޮޅުވާލި އޮޅުންތަކުގެ މަތީންކަމަށް ނިމާލް ވިދާޅުވިއެވެ.
އެކުވެރިޔާއަށް މިއަދު ތިޔަކަން އިޚްސާސް ކުރެވުނީތީ ހިތްހަމަޖެހުމެއް ލިބިއްޖެ، 2018 ގެ ރިޔާސީ އިންތިހާބު ވަގަށް ނަގާ، އެތައް ރައްޔިތުންއެއްގެ ހައްޤު ގެއްލި، ރައީސް ޔާމީންގެ ހައްގު ގެއްލިގެން ދިޔަތަން ހަނދާނަށް ގެންނަވާ! 2018 އޮޅޮވާލުމުގެ ހަދިޔާ އިހަށް ދުވަހު ސްޓެލްކޯގެ މަތިފަޑިއަށް އައި ބަދަލުން ފެނިގެން އެ ދިޔައީ، ތިޔަބައި މީހުން ދިރި ތިބިހާ ދުވަހަކު އެ ޕެކޭޖު ގެންގުޅެން ޖެހޭނެ. ކޮމަންޑޫ ދާއިރާގެ އިންތިހާބަށް ހަދާލިގޮތް ހަނދާނަށް ގެންނަވާ!
– ނިމާލް ވިދާޅުވިއެވެ.
ނިމާލް ވިދާޅުވީ މިއަދު ފަސާދައާއި ކޮރަޕްޝަން، ނުފޫޒާއި ބިރު ދެއްކުން، ހުދުމުހުތާރުކަން އަދި ރެޔާއި ދުވާލު ޤައުމު ލޫޓުވުމާއި، އާއިލީ ވެރިކަމުގެ ސިފަތައް ނޫން އެެހެން އެއްވެސް ކަމެއް ނަމުން ޑިމޮކްރެޓިކް ކަމުން ހުދުމުހުތާރު ޕާޓީގައި ނެތްކަން ރައްޔިތުންނަށް އެގިއްޖެކަމަށެވެ. އަދި މިހާރު އޮތް ކޯލިޝަން ސަރުކާރާއިއެކު ރާއްޖޭގައި މިނިވަން އިންސާފުވެރި އިންތިޚާބެއް ނުބޭއްވޭނެކަން ހާމަވެފައިވާކަމަށް ނިމާލް ވިދާޅުވިއެވެ.
މިނިވަންކަން ގެއްލިއްޖެ! ޤައުމަށް އިންތިހާއަށް ޤައްދާރު ވެއްޖެ! ކުރިމަގުގެ ޖީލަށް މިނިވަން ކަމުގެ ދަންމަރު ހަވާލުކުރެވޭނެ ކަމާއި ދޭތެރޭ މިއަދުގެ ޖީލަށް ޝައްކު އުފެދިއްޖެ. 2023 ގައި މިނިވަން އިންސާފުވެރި އިންތިޚާބެއް ތިޔަ ޕާޓިއާއި ތިޔަ ޕާޓީ އެކުގައިވާ މަވެތި ކޯލިޝަން ނުބާއްވާނެކަން މިއަދު ރައްޔިތުން ގަބޫލުކޮށްފި! ހުރިހާ ރައްޔިތުންވެސް ވަގުތު ފާއިތު ނުވަނީސް ވަތަނީ ރޫހެއްގައި އިންޑިއާ ސިފައިން ބޭރު ކުރުމަށް އެންމެން އަތުގުޅައިލަން ވެއްޖެ. ދިވެހި ފަސްގަނޑަށް އުފަން، ދިވެހި ދަރިޔެކޭ މިއީ، ޤައުމުގެ ލޭ ހިނގާ މިތާ، ފުރާނަ ދޭން ތައްޔާރުގާ، ވާމީ ދަރިޔެކޭ ހުވާ.
– ނިމާލް ވިދާޅުވިއެވެ.
ނިމިދިޔަ އެމްޑީޕީގެ އެތެރޭގެ އިންތިޚާބަށްފަހު، އެޕާޓީ ވަނީ ދެބަޔަކަށް ބެހިފައެވެ. ރައީސް ޞާލިހާއި، ރައީސް ނަޝީދަށް ތާއީދު ކުރާ ފަރާތްތަކުން މިހާރުގެ އަމާޒު ހުރީ ރިޔާސީ ޓިކެޓަށެވެ.
