ސައުތުގެ މަޝްހޫރު ދެ އެކްޓަރުންނާއެކު ބޮލީވުޑްގެ ތަރި އާލިއާ ބަޓް ކުޅެފައިވާ ފިލްމު "އާރްއާރްއާރް" ނެޓްފްލިކްސް އިން ޕްރީމިއާކުރާ ދުވަސް އިއުލާން ކޮށްފިއެވެ.
މި ފިލްމް އަކީ މި އަހަރު މިހާތަނަށް ބޮލީވުޑްގައި ނެރުނު ކުރި ފިލްމު ތަކުގެ ތެރެއިން އެންމެ ކާމިޔާބު އެއް ފިލްމެއެވެ. އެސްއެސް ރާޖާ މޯލިގެ މި ފިލްމުގައި ފެނިގެން ދަނީ ސައުތުގެ 2 ސުޕަސްޓާރުން ކަމަށްވާ ރާމް ޗަރަން އާއި އެންޓީއާރް ޖޫނިއާއެވެ. އަދި މީގެ ކާސްޓްގައި ބޮލީވުޑްގެ ތަރިން ކަމަށްވާ އާލިއާ ބަޓާއި އަޖޭ ދޭވްގަން ވެސް ހިމެނެއެވެ.
އެކްޝަން ޑްރާމާ "އާރްއާރްއާރް"އަކީ ބޮޑު ބަޖެޓުގެ ފިލްމްތަކުގެ ތެރޭގައި ހިމެނޭ ފިލްމެކެވެ. މި ފިލްމު ސިނަމާ ތަކަށް ގެެނެސްފައިވަނީ މި އަހަރު މާރިޗު މަހުގެ 25 ވަނަ ދުވަހުއެވެ.
"އާރްއާރްއާރް"ގެ ހިންދީ ވާޝަން ޖޫން މަހުގެ 2 ގައި ނެޓްފްލިކްސް އިން ޕްރިމިއާކުރާ ގޮތަށް ހަމަޖެއިފައި ވާއިރު، މި މަހުގެ 20 ގައި އިންޑިއާގެ އެހެން ބަހުރުވަތަކުގެ ވާޝަންތައް އިނގިރޭސި ބަހުން ސަބް-ޓައިޓަލްކޮށްގެން ޒީ5 އިން ގެނެސްދޭނެއެވެ.
