ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ދެވަނަ ރިޔާސީ ދައުރެއް ދެވޭނެ މަގުން މުޅި އެމްޑީޕީ މަސައްކަތް ކުރުމަކީ ރާއްޖެއަށް އެންމެ ފައިދާ ހުރި ގޮތް ކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އިކްރާމް ޙަސަން ވިދާޅުވެއްޖެއެވެ.
އެމްޑީޕީގެ ރިޔާސީ ޓިކެޓް ހޯއްދަވައި އެ ޕާޓީގެ ފަރާތުން 2023 ވަނަ އަހަރު ރިޔާސީ އިންތިޚާބުގައި ވާދަކުރައްވާނެ ކެނޑިޑޭޓަކު ކަނޑައެޅުމާއި ގުޅޭގޮތުން ބޮޑެތި ބަހުސްތަކެއް ކުރެވެމުންދާ މި ދަނޑިވަޅުގައި މެމްބަރު އިކްރާމް ވިދާޅުވީ ރައީސް ޞާލިހުގެ ހެޔޮ ވެރިކަން ރާއްޖޭގެ ބޮޑު އައުލަބިއްޔަތު ބަލައި ގަންނަ ކަމަށެވެ.
"ރައީސް ޞާލިހަށް ދެވަނަ ރިޔާސީ ދައުރެއް ދެވޭނެ މަގުން މުޅި އެމްޑީޕީ މަސައްކަތް ކުރުމަކީ ރާއްޖެއަށް އެންމެ ފައިދާ ހުރި ގޮތް"
– އިކްރާމް
RSolihge heyo verikan raajjeyge bodu agulabiyyath balaiganey. RSolih ah dhevana riyaasee dhaureh dheveyney magun mulhi MDP masahkaii kurumakee raajje ah emme faidhaa huri goii. #RSolih2023 pic.twitter.com/1yhoXQXGYt
— Ikram Hassan MP (@ikramhassan) May 16, 2022
އެމްޑީޕީގެ އެތެރޭގެ އިންތިޚާބާއެކު އެޕާޓިގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ތާޢީދުކުރާ ފަރާތްތަކާއި ރައީސް ޞާލިޙަށް ތާޢީދުކުރާ ފަރާތްތަކުން ގެންދަނީ އެމްޑީޕީގެ ރިޔާސީ ކެނޑިޑޭޓު ކަނޑައެޅުމާ ގުޅޭގޮތުން ތަފާތު އެކި ގޮތްގޮތަށް ވާހަކަ ދައްކަމުންނެވެ.
މީގެ އިތުރުން ރައީސް ނަޝީދުވެސް ވަނީ އެމްޑީޕީގެ ރިޔާސީ ޕްރައިމަރީއަށް އެމަނިކުފާނު ނުކުމެވަޑައިގަންނަވާނެ ކަމަށާއި ނަމަވެސް ރައީސް ޞާލިޙް ޕްރައިމަރީގައި ވާދަކުރައްވާނެ ކަމަށް ދެކެވަޑައި ނުގަންނަވާކަމަށް ދާދިފަހުން ވިދާޅުވެފައެވެ. އެހެންނަމަވެސް މިކަމާގުޅޭގޮތުން ރައީސް ޞާލިޙް ވިދާޅުވީ އެމަނިކުފާނު ޕްރައިމަރީގައި ވާދަނުކުރައްވަން ނުވަތަ ރިޔާސީ އިންތިޚާބުގައި ވާދަނުކުރައްވަންވެސް ނުނިންމަވާ ކަމަށެވެ.
ރައީސް ނަޝީދު އަބަދުވެސް ވިދާޅުވަމުން ގެންދަވަނީ ޕާޓީގެ ރިޔާސީ ކެނޑިޑޭޓު ކަނޑައަޅާނީ ޕްރައިމަރީއަކުން އާންމު މެމްބަރުން ކަމަށެވެ. ނަމަވެސް ރައީސް ޞާލިޙަށް ތާޢީދުކުރައްވާ އެކިއެކި ބޭފުޅުން ވިދާޅުވަމުން ގެންދަވަނީ ކޮންމެ ގޮތަކުން ވިޔަސް ރައީސް ޞާލިޙަށް ދެވަނަ ދައުރެއް ދެއްވަން ޖެހޭ ކަމަށެވެ.
