ސްރީ ލަންކާގެ އާ ބޮޑުވަޒީރަކަށް އެގައުމުގެ ރައީސް ގޮޓަބަޔަ ރާޖަޕަކްސަ ރަނިލް ވިކްރެމެސިންހެ އައްޔަން ކުރައްވައިފިއެވެ.
މީގެ ކުރިންވެސް ސްރީ ލަންކާގެ ބޮޑުވަޒީރުކަން އެތައް ފަހަރެއްގެ މަތިން އަދާ ކުރައްވާފައިވާ ރަނިލް، އެގައުމުގެ ބޮޑުވަޒީރުކަމަށް އައްޔަން ކުރައްވާފައި މިވަނީ، ބޮޑުވަޒީރުކަމުގައި ހުންނެވި، މިހާރުގެ ރައީސްގެ ބޭބޭފުޅު، މަހިންދަ ރާޖަޕަކްސަ މަގާމުން އިސްތިއުފާ ދެއްވުމާއި ގުޅިގެންނެވެ.
އުމުރުފުޅުން 76 އަހަރުގެ މަހިންދަ ރާޖަޕަކްސަ މަގާމުން އިސްތިއުފާ ދެއްވާފައިވަނީ، ސްރީ ލަންކާއަށް ކުރިމަތިވެފައިވާ އިގްތިސާދީ ކާރިސާއިން އެގައުމަށް އަރައިގަނެވޭނެ މަގެއް ނުފެނި، ސްރީ ލަންކާގައި ބޮޑެތި ހަމަނުޖެހުންތައް ހިނގަން ފަށާފައި ވަނިކޮށެވެ.
ތިން ފަހަރަށް ސްރީ ލަންކާގެ ބޮޑުވަޒީރުކަން ކުރައްވާފައިވާ މަހިންދަ ރާޖަޕަކްސަގެ އަމިއްލަފުޅު ގޭގައި މިހަފްތާގެ ހޯމަ ދުވަހު މުޒާހިރާ ކުރަމުންދިޔަ ފަރާތްތަކުން ވަނީ ރޯވެސް ކޮށްލާފައެވެ.
އަދި، ރައްކާތެރި މާހައުލެއް ނެތުމުގެ ސަބަބުން، މަހިންދަ ރާޖަޕަކްސައާއި އަބިކަނބަލުންގެ އިތުރުން އާއިލާގެ އެހެން މެމްބަރުންވެސް, ރަސްމީ ގެކޮޅު, ޓެމްޕްލް ޓްރީ ދޫކޮށް ނޭވަލް ބޭސްގައި އިއްޔެވަނީ ހިމާޔަތް ހޯއްދަވާފައެވެ. ނޭވަލް ބޭސްގައި މަހިންދަ އަސްކަރިއްޔާގެ ހިމާޔަތަށް ވަޑައިގަންނަވަން ޖެހިވަޑައިގަތީ، އޭނާގެ ސަޕޯޓަރުނާއި މުޒާހިރާ ކުރަމުންދިޔަ ފަރާތްތަކާ ދެމެދު ހިގަމުންދާ ހަމަނުޖެހުންތަކާއި ގުޅިގެންނެވެ.
އަލަށް ބޮޑުވަޒީރުކަމަށް އައްޔަން ކުރެވުނު ވިކްރެމެހިންހެއަކީ، ފަސް ފަހަރުމަތިން ސްރީ ލަންކާގެ ބޮޑުވަޒީރުކަން ކުރައްވާފައިވާ ބޭފުޅެކެވެ. އަދި އޭނާއަކީ މިހާރު ސްރީ ލަންކާގައި ހުންނެވި ސިޔާސީ ގޮތުން އެންމެ ތަޖުރިބާކާރު އެއް ބޭފުޅާވެސްމެއެވެ.
ރަނިލް އެންމެ ފުރަތަމަ ސްރީ ލަންކާގެ ބޮޑުވަޒީރުކަމަށް އައްޔަން ކުރެވުނީ، 1993 އިން 1994 ވަނަ އަހަރަށް، އެގައުމުގެ ކުރީގެ ރައީސް، ނަރަސިންގހެ ޕްރެމަދާސާ އަވަހާރަ ކޮށްލެވުމާއި ގުޅިގެންނެވެ.
އެއަށްފަހު، 2015ވަނަ އަހަރު ދެވަނަފަހަރަށް ސްރީ ލަންކާގެ ބޮޑުވަޒީރުކަމަށް ރަނިލް އައްޔަން ކުރެވުނީ، އެގައުމުގެ ރައީސްކަން މައިތިރިޕަލަ ސިރިސޭނާގެ ކޯލިޝަންއަށް ކާމިޔާބު ކުރުމާއި ގުޅިގެންނެވެ. އަދި އެއަށްފަހު، 2018ވަނަ އަހަރު ސިރިސޭނާވަނީ ރަނިލް ބޮޑުވަޒީރުކަމުގެ މަގާމުން ދުރުކުރައްވާފައެވެ. އެހެންނަމަވެސް، އޭގެ 4 މަސްފަހުން، ސިރިސޭނާ އެގައުމުގެ ގާނޫނުހަދާ މަޖިލިސް އުވާލެއްވީ ގާނޫނު އަސާސީއާއި ޚިލާފަށް ކަމަށް އެގައުމުގެ ސުޕްރިމް ކޯޓުން ހުކުމް ކުރުމާއި ގުޅިގެން އަނެއްކާވެސް ސިރިސޭނާ ހަމަ އެއަހަރު ރަނިލް ބޮޑުވަޒީރުކަމަށް އައްޔަން ކުރައްވާފައި ވެއެވެ.
ރަނިލް ބޮޑުވަޒީރުކަމުން އިސްތިއުފާ ދެއްވާފައިވަނީ، 2019ވަނަ އަހަރުގެ ނޮވެމްބަރުމަހު، ޔޫއެންޕީ އެއަހަރު ބޭއްވުނު އާންމު އިންތިޚާބުން ބަލި ވުމާއި ގުޅިގެންނެވެ.
ސްރީ ލަންކާއަށް ކުރިމަތިވެފައިވާ އިގްތިސާދީ މައްސަލަތައް ހައްލު ކުރުމަށް، ގޮޓަބަޔަރ ރާޖަޕަކްސަވަނީ ގައުމީ އެއްބައިވަންތަ ސަރުކާރެއް އެކުލަވާލައްވާނެކަމަށް ވައުދު ވެފައެވެ. އަދި ވަނީ ސިޔާސީ ބާރުތައްވެސް ހަނިކޮށް، ގިނަ ބާރުތަކެއް ގާނޫނުހަދާ މަޖިލިހަށް ދޫކުރައްވާނެކަމަށްވެސް ވިދާޅުވެފައެވެ.
