ދެވަނަ ދައުރަކަށް ރައީސް އިބްރާހީމް މުޙައްމަދު ޞާލިޙަށް ރިޔާސީ ޓިކެޓް ދިނުމަށް ވަރަށް ބޮޑަށް ތަޢީދުކުރައްވާކަމަށް އެމްޑީޕީ ޗެއަރޕާސަން އިންތިޚާބުގައި ވާދަކުރައްވާ އިކޮނޮމިކް މިނިސްޓަރ ފައްޔާޒް އިސްމާޢީލް ވިދާޅުވެއްޖެއެވެ. ރޭ ރާއްޖެ ޓީވީން ގެނެސްދިން ޗެއަރޕާސަން އިންތިޚާބުގެ ބަހުސްގައި ފައްޔާޒްގެ އިތުރުން މި އިންތިޚާބުގައި ވާދަކުރައްވާ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީވެސް ބައިވެރިވެވަޑައިގެންނެވިއެވެ.
ބަހުސްގެ ސުވާލުތަކަށް ޖަވާބުދެއްވަމުން ފައްޔާޒް ވިދާޅުވީ، އަންނަ ރިޔާސީ ދައުރަށް ރައީށް ޞާލިޙަށް ރިޠާސީ ޓިކެޓް ދިނުމަށް "ގަދަޔަށް" ތަޢީދުކުރައްވާކަމަށެވެ. ފައްޔާޒް ވިދާޅުވީ، އެމްޑީޕީގެ އެތެރޭގައި ތެރޭގައި އުފެދިފައިވާ ފިތުނަ ނައްތާލާއި، 2023 ކާމިޔާބު ކުރުމަށް މަސައްކަތް ކުރަން ޖެހޭކަމަށެވެ. މިނިސްޓަރ ފައްޔާޒް ވިދާޅުވީ، ރިޔާސީ އިންތިޚާބު ކާމިޔާބު ކުރުމަށް ގެއްލިފައިވާ އިތުބާރު އަނބުރާ ގެންނަ ޖެހޭކަމަށާއި، ޕާޓީގެ ތެރޭގައި ވަކި ބަޔަކު ބޭނުން ގޮތަކަށް ކުރާ ކަންކަން ހުއްޓުވަން ޖެހޭ ކަަމަށެވެ.
ފައްޔާޒު ވިދާޅުވީ، ޗެއާޕަރސަންގެ އިންތިޚާބަކީ 2018ގެ ފަހުން ބޭއްވޭ، އެމްޑީޕީއަށް އެންމެ މުހިންމު އިންތިޚާބު ކަމަށެވެ. އަދި މިހާރު އޮތް ސަރުކާރު ދިފާއުކޮށް ސަރުކާރަށް އެއްބާރުލުން ދީގެން ނޫނިީ 2023 ކާމިޔާބު ނުކުރެވޭނެ ކަމަށެވެ. އެހެންކަމުން އެމްޑީޕީގެ ޗެއަރޕާސަންގެ މަގާމަށް ގެންނަން ޖެހޭނީ ސަރުކާރަށް ތާއީދުކޮށް ސަރުކާރަށް އެއްބާރުލުންދޭ މީހެއް ކަމަށެވެ.
އެމްޑީޕީގެ ޗެއަރޕާސަން އިންތިޚާބު އަންނަ ހޮނިހިރު ދުވަހު އޮންނާނެއެވެ. މި އިންތިޚާބުގެ ވާދަވެރިކަން ބޮޑުވެ ދެ ކެނޑިޑޭޓުންގެ ކެމްޕެއިން ޓީމުން އަންނަނީ ހޫނު ބަހުގެ ހަމަލާތަކެއް ރައްދުކުރަމުންނެވެ. ބައެއް ފަރާތްތަކުން ސިފަކުރާގޮތުގައި މިއީ ރައީސް ޞާލިހާއި ރައީސް ނަޝިދުގެ އިންތިޚާބެކެވެ.
