ގއ.މާމެންދޫގައި މީހުން ދިރިއުޅޭ ގެއެއްގައި އަލިފާން ރޯވެ ބޭނުންކުރެވޭވަރަށް އަނދައި ހުލިވެއްޖެއެވެ.
މި ހާދިސާ ހިނގާފައިވަނީ ރޭ ދަންވަރު 1:30 ހާއިރުއެވެ. މިހާދިސާގައި އަނދާ ހުލިވެފައިވަނީ އެރަށު، ލޯންގްލައިފްގެއެވެ. އެރަށު ރައްޔިތުން ކުރި މަސައްކަތުން އަލިފާންގަނޑު ނިއްވާލެވުނޫ ދެ ގަޑިއިރެއްހާއިރު ފަހުންނެވެ.
އަލިފާނުގެ ހާދިސާ ހިނގިއިރު، އެ ގޭގެ ވެރިފަރާތް ކަމަށްވާ ދޮށީ އުމުރުގެ ދެމަފިރިން ތިބީ ބޭސްފަރުވާ އަށް މާލޭގައިކަމަށް އެރަށޫން ވާހަކަދެއްކި މީހަކު ބުންޏެވެ. ގއ.ކޫއްޑޫގެ ދޯންޏެއްގައި ކައްޕިއަކަށް އުޅޭ އެ ފިރިހެން މީހާ އަކީ ހިތުގެ ބައިޕާސް ސާޖަރީއެއްކޮށް، ބަލިވެ އުޅޭމީހެއްކަމަށްވެސް ބުންޏެވެ.
އަލިފާން ރޯވި ވަގުތު އެ ގޭގައި ދިރިއުޅުނީ ޖުމްލަ ހަތަރު މީހުންނެވެ. އެއީ މާލޭގައި ތިބި ދެމަފިރިންގެ ދެ ދަރިން ކަމުގައިވާ އަންހެން ކުއްޖަކާ ފިރިހެން ކުއްޖަކާއި، އަންހެން ކުއްޖާގެ ފިރިމީހާއާއި އެ މީހުންގެ ދަރިފުޅެވެ.
މި ހާދިސާގައި ގޭ އަނދާ ހުލިވެފައިވާއިރު ހިފާ ގެންގުޅޭ ހުރިހާ ސާމާނެއްވެސް ވަނީ ހަލާކުވެފައެވެ.
ނޭޝަނަލް ޑިޒާސްޓަރ މެނޭޖްމަންޓް ސެންޓަރުން ގެންދަނީ މި ހާދިސާގައިި ގެއްލުންވި ގޭގެ އާއިލާއަށް އެހީތެރިކަން ފޯރުކޮށްދިނުމުގެ މަސައްކަތް ކުރަމުންނެވެ.
