ވެރިކަން ކުރާ އެމްޑީޕީގެ ޗެއާޕާސަންގެ މަޤާމަށް ވާދަކުރާ އިކޮނޮމިކް މިނިސްޓަރ ފައްޔާޟު އިސްމާއިލާއި، އިމްތިޔާޒު ފަހުމީގެ މެދުގައި ބާއްވާ ބަހުސް މިމަހުގެ 12 ވަނަ ދުވަހު ބޭއްވުމަށް ހަމަޖެހިއްޖެއެވެ.
މިބަހުސް އިންތިޒާމު ކުރަނީ "ސަންގު ޓީވީ" އިންނެވެ. ބަހުސްގައި އިންތިޚާބުގައި ވާދަކުރާ ދެ ކެނޑިޑޭޓުންވެސް ބައިވެރިވާނެކަން ވަނީ ކަށަވަރުކޮށް ދީފައެވެ. ސަންގު ޓީވީގެ ބަހުސްގައި ބައިވެރިވުމަށް އިންތި ނިންމާފައިވާއިރު، ރާއްޖެ ޓީވީން އިންތިޒާމު ކުރި ބަހުސްގައި ވަގުތ ނެތިގެން ބައިވެރިވެވެން ނެތްކަމަށް އިންތި ވަނީ ވިދާޅުވެފައެވެ.
ސަންގު ބަހުސް މިމަހު 12ވާ ބުރާސްފަތި ދުވަހުގެ ރޭ 2100 ގަ އޮންނާނެ. މި ބަހުސްގައި ބައިވެރިވެވަޑައިގަންނަވާނެކަން ކެންޑިޑޭޓް އިމްތިޔާޒް ފަހުމީ (1)، ފައްޔާޒް އިސްމާއިލް(2)ވަނީ ސަންގަށް ކަށަވަރުކޮށްދެއްވާފަ.
ބަހުސް ސްޕޮންސަރކުރެއްވުމަށް 9309000 އަށް ގުޅާލައްވާ! pic.twitter.com/tINAV644d8— Sangu TV (@Sangu_TV) May 8, 2022
އެމްޑީޕީގެ ޗެއާޕާސަން އިންތިޚާބުގައި ދެކެނޑިޑޭޓުންވެސް އެންމެ ބޮޑަށް އިސްކަންދެނީ އާންމު މެމްބަރުންނާއި ބައްދަލު ކުރުމަށެެވެ. އެގޮތުން ރަށްރަށަށް ގޮސް އާންމު މެމްބަރުންނާއި ބައްދަލުކޮށް ވޯޓު ހޯދުމަށް ގިނަ މަސައްކަތްތަކެއް ދަނީ ކުރަމުންނެވެ.
ދެކެނޑިޑޭޓުންގެވެސް އަޒުމަކީ އިންތިޚާބުގެ ވޯޓުލުމުގެ ކުރިން ރާއްޖޭގެ ހުރިިހާ ރަށެއްގައި ތިބި އެމްޑީޕީގެ އާންމު މެމްބަރުންނާއި ހަމައަށް ގޮސް ކެމްޕެއިން ކުރުމެވެ. މިޓާގެޓަށް ވާސިލްވުމަށް ކުުރިއަށް އޮތީ މަދު ދުވަސްތަކަކަށް ވުމުން ދަތުތައް އިތުރަށް ބާރުބޮޑުވެގެންދާނެ ކަމަށް ބެލެވެއެވެ.
އެމްޑީޕީގެ ޗެއާޕާސަންގެ އިންތިޚާބު ބޭއްވުމަށް ހަމަޖެހިފައިވަނީ މިމަހުގެ 14 ވަނަ ދުވަހުއެވެ.
