އިނގިރޭސި ޕްރިމިއާ ލީގުގައި ޓޮޓެންހަމް ހޮޓްސްޕާއާ އެއްވަރުވެ، ލީގު ހޯދުމުގެ ރޭހުގައި ލިވަޕޫލަށް އުނދަގޫ ހާލަތެއް ކުރިމަތިވެއްޖެއެވެ.
ލިވަޕޫލުގެ ދަނޑުގައި ކުޅުނު މި މެޗު އެއްވަރުވީ 1-1 ގެ ނަތީޖާއަކުންނެވެ. ލިވަޕޫލް ދަނޑުގައި ޓޮޓެންހަމް އިން ވަނީ ރަނގަޅު ކުޅުމެއް ދައްކައިފައެވެ. ފުރަތަމަ ހާފުގައި ލިވަޕޫލްގެ ވާޖިލް ވެން ޑައިކް ބޮލުން ޖެހި ބޯޅައެއް ގޯލުގެ ހުރަސްދަނޑީގައި ޖެހިފައި ބޭރަށް ދިޔައިރު، ޓޮޓެންހަމްގެ ޕިއޭ އެމީލް ހޮއިބިއާ އޭރިއާބޭރުން ޖެހި ބޯޅަ ބޭރުވީ ދަނޑީގައި ޖެހިފައެވެ. ޓޮޓެންހަމުން މެޗުގެ 56 ވަނަ މިނިޓްގައި ލީޑުނެގީ ސޮން ހެއުން މިން ޖެހި ގޯލުންނެވެ. މިއީ ލީގުގައި ސޮން ޖެހި 20 ވަނަ ގޯލެވެ.
ނަތީޖާ ހަމަހަމަކުރަން ލިވަޕޫލުން ކެނޑިނޭޅި ކުރަމުންދިޔަ މަސައްކަތް ކާމިޔާބުވީ ނަސީބުގެ އެހީއާ އެކުގައެވެ. މެޗުގެ 74 ވަނަ މިނިޓްގައި ލިވަޕޫލްގެ ކޮލަމްބިއާ ފޯވާޑް ލުއިސް ޑިއާޒް ޖެހި ބޯޅަ ގޯލަށް ވަނީ ޓޮޓެންހަމްގެ ރޮޑްރީގޯ ބެންޓަކޫރު ފައިގައި ޖެހިފައެވެ.
މި ނަތީޖާއާއެކު ތާވަލުގެ އެއްވަނައިގައި ލިވަޕޫލް އޮތީ ކުޅުނު 35 މެޗުން ލިބުނު 83 ޕޮއިންޓާއެކުއެވެ. ދެވަނައިގައި އޮތް އެންމެ ފަހުގެ ޗެމްޕިއަން މެންޗެސްޓާ ސިޓީއަށް 34 މެޗުން 83 ޕޮއިންޓް ލިބިފައިވާއިރު، މިރޭ ނިއުކާސަލް ޔުނައިޓެޑް އަތުން މޮޅުވެގެން ސިޓީއަށް އެއް ވަނައިގައި ތިން ޕޮއިންޓުގެ ލީޑެއް ނެގޭނެއެވެ.
